ଅମେଠି, ମଇ ୨୬ (ଖବର ଓଡିଶା) :
ଲୋକସଭା ନିର୍ବାଚନରେ ସ୍ମୃତି ଇରାନୀଙ୍କ ପାଇଁ ଜୋରଶୋରରେ ପ୍ରଚାର କରିଥିବା ବିଜେପି ନେତା ଏବଂ ବରୌଲିୟା ଗ୍ରାମର ପୂର୍ବତନ ପ୍ରଧାନ ସୁରେନ୍ଦ୍ର ସିଂହଙ୍କୁ ଗତକାଲି ରାତିରେ ଗୁଳି କରି ହତ୍ୟା କରାଯାଇଛି । କେଜିଏମୟୁ ଲକ୍ଷ୍ନୌରେ ତାଙ୍କର ଶବ ବ୍ୟବଚ୍ଛେଦ କରାଯାଇଛି । ଏବେ ତାଙ୍କର ଅନ୍ତିମ ଯାତ୍ରା ବରୌଲିୟା ଗ୍ରାମରୁ ବାହାରିଛି । ସ୍ମୃତି ଇରାନୀ ମଧ୍ୟ ଏହି ଅନ୍ତିମ ଯାତ୍ରାରେ ସାମିଲ ହୋଇଛନ୍ତି ଏବଂ ଏନେଇ ତୁରନ୍ତ କାର୍ଯ୍ୟାନୁଷ୍ଠାନ ନେବାକୁ ପ୍ରତିଶୃତି ଦେଇଛନ୍ତି ।
ଅନ୍ୟ ପକ୍ଷରେ ଗ୍ରାମରେ ଅସନ୍ତୋଷଜନକ ପରିସ୍ଥିତିକୁ ଦୃଷ୍ଟିରେ ରଖି ବହୁ ସଂଖ୍ୟାରେ ସୁରକ୍ଷା ବାହିନୀ ନିୟୋଜିତ ହୋଇଛନ୍ତି । ଏହି ଘଟଣା ପରେ ପୁଲିସ ଆଶଙ୍କା କରି କେତେକ ସନ୍ଦିଗ୍ଧଙ୍କୁ ଗିରଫ କରିଛି । ତେବେ ଗ୍ରାମବାସୀଙ୍କ କହିବା ଅନୁଯାୟୀ, ବିଳମ୍ବିତ ରାତ୍ରୀରେ ଦୁଇ ଚକିଆ ଯାନରେ କିଛି ବଦମାସ୍ ଆସିଥିଲେ ଏବଂ ସୁରେନ୍ଦ୍ରଙ୍କୁ ଘର ବାହାରକୁ ଡାକି ନେଇଥିଲେ । ସୁରେନ୍ଦ୍ର ଘରୁ ବାହାରକୁ ଆସିବା ପରେ ତାଙ୍କୁ ଗୁଳି ମାରି ଫେରାର ହୋଇଯାଇଥିଲେ । ଏହା ପରେ ସୁରେନ୍ଦ୍ରଙ୍କୁ ଆହତ ଅବସ୍ଥାରେ ପିଏଚସି ନିଆଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ରାଜନୈତିକ ରାଗ ରଖି ତାଙ୍କୁ ହତ୍ୟା କରାଯାଇଥିବା କୁହାଯାଉଛି । ବରୌଲିୟାରେ ସୁରେନ୍ଦ୍ରଙ୍କ ଖୁବ୍ ଖାତିର ରହିଛି । ଯାହାର ଲାଭ ସ୍ମୃତି ଇରାନୀଙ୍କୁ ମିଳିଛି । ଯାହା ଫଳରେ ବିପକ୍ଷମାନେ ରାଗ ରଖି ଏଭଳି କରିଥିବା କୁହାଯାଉଛି । ମୃତକଙ୍କ ପୁଅଙ୍କ କହିବା ଅନୁଯାୟୀ, ତାଙ୍କ ପିତା ସ୍ମୃତି ଇରାନୀଙ୍କ ନିକଟସ୍ଥ ଥିଲେ । ଚଳିତ ଲୋକସଭା ନିର୍ବାଚନରେ ସେ ଗୁରୁତ୍ୱପୂର୍ଣ୍ଣ ଭୂମିକା ନିଭେଇ ଥିଲେ । ନିର୍ବାଚନ ଫଳାଫଳ ପରେ ବିଜୟ ଯାତ୍ରା ପାଇଁ ପ୍ରସ୍ତୁତି କରାଯାଇଥିଲା । କିନ୍ତୁ କଂଗ୍ରେସ ନେତାଙ୍କୁ ଏହା ଭଲ ଲାଗି ନଥିଲା । ଯାହା ଫଳରେ ଷଡଯନ୍ତ୍ର କରାଯାଇ ତାଙ୍କ ପିତାଙ୍କୁ ହତ୍ୟା କରାଯାଇଛି ।