ରାୟପୁର: କେନ୍ଦ୍ର ସରକାର ୨୦୨୬ ମଧ୍ୟରେ ଦେଶରୁ ନକ୍ସଲ ସଂଗଠନ ଓ ନକ୍ସଲ ଗତିବିଧିର ମୂଳପୋଛ କରିବା ପାଇଁ ବ୍ୟାପକ ପଦକ୍ଷେପ ନେଇଛନ୍ତି। ଏଥି ପାଇଁ କେନ୍ଦ୍ରୀୟ ବଳ ଓ ରାଜ୍ୟ ପୁଲିସର ମିଳିତ ଉଦ୍ୟମରେ ନକ୍ସଲ ପ୍ରଭାବିତ ଅଞ୍ଚଳରେ ସୁରକ୍ଷା ବାହିନୀର ଯବାନମାନେ ସର୍ଚ୍ଚ ଅପରେସନ ଜାରି ରଖିଛନ୍ତି। ଚଳିତ ବର୍ଷ ଏପର୍ଯ୍ୟନ୍ତ କେବଳ ଛତିଶଗଡ଼ରେ ବିଭିନ୍ନ ଏନକାଉଣ୍ଟରରେ ୧୪୦ ଜଣ ନକ୍ସଲ ନିହତ ହୋଇଛନ୍ତି। ଏଥିମଧ୍ୟରୁ ନାରାୟଣପୁର ଏବଂ କୋଣ୍ଡାଗାଓଁ ସମେତ ସାତଟି ଜିଲ୍ଲାକୁ ନେଇ ଗଠିତ ବସ୍ତର ଡିଭିଜନରେ ୧୨୩ ଜଣଙ୍କର ମୃତ୍ୟୁ ହୋଇଥିଲା।

ସଦ୍ୟତମ ଘଟଣା ଅନୁଯାୟୀ ମଙ୍ଗଳବାର ଦିନ ଛତିଶଗଡ଼ର କୋଣ୍ଡାଗାଓଁ-ନାରାୟଣପୁର ସୀମାରେ ସୁରକ୍ଷା ବାହିନୀ ଏବଂ ନକ୍ସଲବାଦୀଙ୍କ ମଧ୍ୟରେ ଗୁଳିବିନିମୟ ହୋଇଛି। ଏହି ଏନକାଉଣ୍ଟରରେ ସୁରକ୍ଷା ବାହିନୀକୁ ବଡ଼ ସଫଳତା ମିଳିଛି। ବସ୍ତର ଆଇଜି ପି ସୁନ୍ଦରରାଜ କହିଛନ୍ତି ଯେ ଏନକାଉଣ୍ଟରରେ ଦୁଇ ଜଣ ହାର୍ଡକୋର ନକ୍ସଲ ନିହତ ହୋଇଛନ୍ତି। ସେ କହିଛନ୍ତି ଯେ ଏନକାଉଣ୍ଟର ପରେ ସୁରକ୍ଷା ବାହିନୀ ଗୋଟିଏ ଏକେ-୪୭ ବନ୍ଧୁକ ଏବଂ ଦୁଇଟି ମୃତଦେହ ଉଦ୍ଧାର କରିଛି। ଆଇଜି କହିଛନ୍ତି ଯେ ଏହି ଏନକାଉଣ୍ଟର ପରେ, ଅଞ୍ଚଳରେ ନିରନ୍ତର ସର୍ଚ୍ଚ ଅପରେସନ୍ ଜାରି ରହିଛି।

ବରିଷ୍ଠ ପୋଲିସ ଅଧିକାରୀ କହିଛନ୍ତି ଯେ କୋଣ୍ଡାଗାଓଁର ରାଜ୍ୟ ପୋଲିସର ଉଭୟ ୟୁନିଟ୍, ଜିଲ୍ଲା ରିଜର୍ଭ ଗାର୍ଡ  ଏବଂ ବସ୍ତର ଫାଇଟର୍ସର କର୍ମଚାରୀମାନେ ଏହି ଅପରେସନରେ ସାମିଲ ଥିଲେ। ସେ କହିଛନ୍ତି ଯେ ଏପର୍ଯ୍ୟନ୍ତ ଦୁଇ ଜଣ ନକ୍ସଲଙ୍କ ମୃତଦେହ, ଗୋଟିଏ ଏକେ-୪୭ ରାଇଫଲ୍ ଏବଂ ଅନ୍ୟାନ୍ୟ ଅସ୍ତ୍ରଶସ୍ତ୍ର ଏବଂ ବିସ୍ଫୋରକ ଜବତ କରାଯାଇଛି। ବସ୍ତର ରେଞ୍ଜର ଆଇଜି କହିଛନ୍ତି ଯେ ଅଞ୍ଚଳରେ ସର୍ଚ୍ଚ ଅପରେସନ ଚାଲିଛି। ନିହତ ନକ୍ସଲମାନଙ୍କୁ ଜଣେ ଭୟଙ୍କର ମାଓ କମାଣ୍ଡର ହାଲଦାର ଏବଂ ମାଓବାଦୀଙ୍କ ପୂର୍ବ ବସ୍ତର ଡିଭିଜନର ସଦସ୍ୟ ରାମେ ଭାବରେ ଚିହ୍ନଟ କରାଯାଇଛି। ହାଲଦାର ଏବଂ ରାମେଙ୍କ ନାମରେ ଯଥାକ୍ରମେ ୮ ଲକ୍ଷ ଏବଂ ୫ ଲକ୍ଷ ଟଙ୍କା ପୁରସ୍କାର ରାଶି ଥିଲା।

ଅଧିକ ପଢ଼ନ୍ତୁ: ମହାରାଷ୍ଟ୍ରରେ ବିଜେପି ନେତାଙ୍କୁ ଧାରୁଆ ଅସ୍ତ୍ରରେ ହତ୍ୟା