ଶ୍ରୀନଗର: ଜମ୍ମୁ କଶ୍ମୀରର ପହଲଗାମରେ ଗତ ଏପ୍ରିଲ ୨୨ ତାରିଖରେ ହୋଇଥିବା ଆତଙ୍କବାଦୀ ଆକ୍ରମଣରେ ୨୬ ଜଣ ନିର୍ଦ୍ଦୋଷ ଲୋକ ପ୍ରାଣ ହରାଇଥିଲେ। ଏବେ ଏହି ଆକ୍ରମଣର ଜଣେ ପ୍ରତ୍ୟକ୍ଷଦର୍ଶୀଙ୍କ ଦ୍ୱାରା ଜାତୀୟ ତଦନ୍ତ ସଂସ୍ଥାକୁ ଦିଆଯାଇଥିବା ସୂଚନା ଆଶ୍ଚର୍ଯ୍ୟଜନକ। ସୂତ୍ର ଅନୁଯାୟୀ ଏହି ସାକ୍ଷୀ କହିଛନ୍ତି ଯେ ଆକ୍ରମଣ ପରେ ତିନି ଜଣ ପାକିସ୍ତାନୀ ଆତଙ୍କବାଦୀ ଖୁସି ମନାଇବା ପାଇଁ ଆକାଶରେ ଚାରି ରାଉଣ୍ଡ ଗୁଳି ଚଳାଇଥିଲେ।

ତଦନ୍ତ ସଂସ୍ଥାଗୁଡ଼ିକ ଏହି ସ୍ଥାନୀୟ ପ୍ରତ୍ୟକ୍ଷଦର୍ଶୀଙ୍କୁ ଷ୍ଟାର ପ୍ରୋଟେକ୍ଟଡ୍ ସାକ୍ଷୀ ଘୋଷଣା କରିଛନ୍ତି। ଜମ୍ମୁ କଶ୍ମୀର ପୋଲିସ ଏବଂ କେନ୍ଦ୍ରୀୟ ଗୁଇନ୍ଦା ସଂସ୍ଥାଗୁଡ଼ିକର ସହାୟତାରେ ଏନ୍‌ଆଇଏ ଏହି ସାକ୍ଷୀଙ୍କୁ ପାଇଥିଲା। ଆକ୍ରମଣ ପରେ ଏହି ବ୍ୟକ୍ତି ଘଟଣାସ୍ଥଳ ନିକଟରେ ଥିଲେ ଏବଂ ସେ ଆତଙ୍କବାଦୀଙ୍କ ସହ ମୁହାଁମୁହିଁ ହୋଇଥିଲେ।

ଜଣେ ତଦନ୍ତକାରୀ ଅଧିକାରୀ ଇଣ୍ଡିଆନ ଏକ୍ସପ୍ରେସକୁ କହିଛନ୍ତି, ଆତଙ୍କବାଦୀମାନେ ତାଙ୍କୁ ଅଟକାଇ କଲମା ପାଠ କରିବାକୁ କହିଥିଲେ। ସେ ସ୍ଥାନୀୟ କାଶ୍ମୀରୀ ଉଚ୍ଚାରଣରେ କଲମା ପାଠ କରିଥିଲେ, ଯାହା ଫଳରେ ଆତଙ୍କବାଦୀମାନେ ତାଙ୍କୁ ସନ୍ଦେହ କଲେ ନାହିଁ ଏବଂ ସେମାନେ ତାଙ୍କୁ ଛାଡିଦେଲେ। ଏହା ପରେ ତୁରନ୍ତ ସେମାନେ ଆକାଶରେ ଚାରି ରାଉଣ୍ଡ ଗୁଳି ଚଳାଇଲେ।" ସାକ୍ଷୀଙ୍କ ବୟାନ ଆଧାରରେ, ଏନ୍‌ଆଇଏ ଘଟଣାସ୍ଥଳରୁ ଚାରୋଟି ଖାଲି କାର୍ଟ୍ରିଜ୍ ଜବତ କରିଛି।

ସାକ୍ଷୀ ଏହା ମଧ୍ୟ କହିଛନ୍ତି ଯେ ସେ ପାହାଡ଼ି ଅଞ୍ଚଳରେ ପରଭେଜ୍ ଅହମ୍ମଦ ଜୋଥାର ଏବଂ ବଶିର ଅହମ୍ମଦ ନାମକ ଦୁଇ ସ୍ଥାନୀୟ ଲୋକଙ୍କୁ ଆତଙ୍କବାଦୀଙ୍କ ସାମଗ୍ରୀ ପରିଚାଳନା କରୁଥିବାର ଦେଖିଛନ୍ତି। କିଛି ସମୟ ପରେ ଆତଙ୍କବାଦୀମାନେ ସାମଗ୍ରୀ ନେଇ ଚାଲିଗଲେ। ତଦନ୍ତରୁ ଜଣାପଡିଛି ଯେ ଆତଙ୍କବାଦୀମାନଙ୍କୁ ସାହାଯ୍ୟ କରିବା ଅଭିଯୋଗରେ ପରଭେଜ୍ ଏବଂ ବଶିରଙ୍କୁ ଗିରଫ କରାଯାଇଛି।

ସୂତ୍ର ଅନୁଯାୟୀ, ଏପ୍ରିଲ ୨୨ ତାରିଖ ଅପରାହ୍ନ ୩ଟା ୩୦ରେ ତିନି ଜଣ ପାକିସ୍ତାନୀ ଆତଙ୍କବାଦୀ ପରଭେଜ୍‌ଙ୍କ ଘରେ ପହଞ୍ଚିଥିଲେ। ସେଠାରେ ସେମାନେ ଚାରି ଘଣ୍ଟା ଧରି ସମଗ୍ର ଅଞ୍ଚଳ ରେକ୍ କରିଥିଲେ, ଯେଉଁଥିରେ ସେମାନେ ସୁରକ୍ଷା ବ୍ୟବସ୍ଥା, ପର୍ଯ୍ୟଟନ ସ୍ଥଳ ଏବଂ ରାସ୍ତା ବିଷୟରେ ସୂଚନା ସଂଗ୍ରହ କରିଥିଲେ। ଯିବା ସମୟରେ, ସେମାନେ ପରଭେଜ୍ଙ୍କ ସ୍ତ୍ରୀଙ୍କଠାରୁ ମସଲା ଏବଂ ଚାଉଳ ପ୍ୟାକ୍ କରିଥିଲେ ଏବଂ ତାଙ୍କୁ ୫୦୦ ଟଙ୍କାର ପାଞ୍ଚଟି ନୋଟ ଦେଇଥିଲେ। ପରେ ସେମାନେ ବଶିରଙ୍କୁ ଭେଟି ଏପ୍ରିଲ ୨୨ ତାରିଖ ଦିନ ଅପରାହ୍ନ ୧୨:୩୦ ରେ ପ୍ରସ୍ତୁତ ରହିବାକୁ କହିଥିଲେ।

ଏନ୍‌ଆଇଏ ସନ୍ଦେହ କରୁଛି ଯେ ଲସ୍କର-ଏ-ତୈବା ଆତଙ୍କବାଦୀ ସୁଲେମାନ ଶାହ ଏହି ଆକ୍ରମଣରେ ଭୂମିକା ଗ୍ରହଣ କରିଛନ୍ତି, ଯିଏ ପୂର୍ବରୁ ଏକ ସୁଡ଼ଙ୍ଗ ପ୍ରକଳ୍ପରେ କାମ କରୁଥିବା ୭ ଜଣ ଶ୍ରମିକଙ୍କ ହତ୍ୟାରେ ମଧ୍ୟ ସାମିଲ ଥିଲା।

ଏନ୍‌ଆଇଏ ଏବେ ଆକ୍ରମଣ ପଛରେ ଥିବା ସମଗ୍ର ଆତଙ୍କୀ ନେଟୱାର୍କ, ସ୍ଥାନୀୟ ସହଯୋଗୀ ଏବଂ ପାକିସ୍ତାନ-ଭିତ୍ତିକ ଆତଙ୍କବାଦୀ ସଂଗଠନ ସହିତ ସମ୍ପର୍କର ତଦନ୍ତ କରୁଛି। ଲସ୍କର-ଏ-ତୈବା ସହିତ ଲିଙ୍କ୍ ପୂର୍ବରୁ ନିଶ୍ଚିତ ହୋଇସାରିଛି।

ଅଧିକ ପଢ଼ନ୍ତୁ: ଚଳନ୍ତା ବସ୍‌ରେ ଶିଶୁକୁ ଜନ୍ମ ଦେଲେ ମହିଳା