ନୂଆଦିଲ୍ଳୀ: ମଣିପୁରର ଚାଣ୍ଡେଲ ଜିଲ୍ଲାରେ ବୁଧବାର ଦିନ ଆସାମ ରାଇଫଲ୍ସ ଏବଂ ଉଗ୍ରବାଦୀଙ୍କ ମଧ୍ୟରେ ଏକ ଭୟଙ୍କର ଏନକାଉଣ୍ଟର ହୋଇଛି। ଏହି ମୁହାଁମୁହିଁ ପରିସ୍ଥିତିରେ ସେନାକୁ ବଡ଼ ସଫଳତା ମିଳିଛି, ଯେଉଁଥିରେ ଅତି କମରେ ୧୦ ଜଣ ଉଗ୍ରବାଦୀ ନିପାତ ହୋଇଛନ୍ତି। ସେନାର ଅ‌ପରେସନ ଏବେ ବି ଜାରି ରହିଛି। ମିଆଁମାର ସୀମାନ୍ତରେ ଥିବା ନ୍ୟୁ ସାମତାଲ ଗ୍ରାମ ନିକଟରେ ସନ୍ଦିଗ୍ଧ ସଶସ୍ତ୍ର ଉଗ୍ରବାଦୀମାନଙ୍କ ଗତିବିଧି ବିଷୟରେ ବିଶ୍ୱସ୍ତ ଗୁଇନ୍ଦା ସୂଚନା ପରେ ସେନା ଅଧିକାରୀମାନେ ନିଶ୍ଚିତ କରିଛନ୍ତି ଯେ ଅପରେସନ୍ ଆରମ୍ଭ କରାଯାଇଥିଲା।

ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ'ରେ ସୂଚନା ସେୟାର କରି ଭାରତୀୟ ସେନାର ପୂର୍ବ କମାଣ୍ଡ କହିଛି ଯେ ମେ’ ୧୪ ତାରିଖରେ, ଆସାମ ରାଇଫଲ୍ସର ଏକ ୟୁନିଟ୍ ସ୍ପିୟର କୋର୍ପସ ଅଧୀନରେ ଖେଙ୍ଗଜୋୟ ତହସିଲର ନ୍ୟୁ ସାମତାଲ ଗାଁରେ ଏହି ଅପରେସନ ଆରମ୍ଭ କରିଥିଲା। ଏହି ଅଞ୍ଚଳ ଭାରତ-ମିଆଁମାର ଅନ୍ତର୍ଜାତୀୟ ସୀମା ନିକଟରେ ଅବସ୍ଥିତ, ଯାହା ପ୍ରାୟତଃ ଆତଙ୍କବାଦୀ କାର୍ଯ୍ୟକଳାପର କେନ୍ଦ୍ର ହୋଇ ରହିଥାଏ।

ସେନା ଅନୁଯାୟୀ, ଅପରେସନ୍ ସମୟରେ ଯେତେବେଳେ ସୈନିକମାନେ ଅଞ୍ଚଳକୁ ଘେରାବନ୍ଦୀ କରିଥିଲେ। ସନ୍ଦିଗ୍ଧ ଉଗ୍ରବାଦୀମାନେ ସେମାନଙ୍କ ଉପରେ ଗୁଳି ଚଳାଇବା ଆରମ୍ଭ କରିଦେଇଥିଲେ। ପ୍ରତିଶୋଧ ସ୍ୱରୂପ, ସୈନିକମାନେ ସଂଯମତା ଏବଂ ରଣନୀତି ସହିତ ଗୁଳି ଚଳାଇଥିଲେ। ଏହି ଏନକାଉଣ୍ଟରରେ ୧୦ ଜଣ ଉଗ୍ରବାଦୀ ନିହତ ହୋଇଛନ୍ତି। ସେନା ଏହା ମଧ୍ୟ କହିଛି ଯେ ବିପୁଳ ପରିମାଣର ଅସ୍ତ୍ରଶସ୍ତ୍ର ଏବଂ ଗୁଳିଗୋଳା ମଧ୍ୟ ଉଦ୍ଧାର କରାଯାଇଛି। ଏହି କାର୍ଯ୍ୟକୁ 'କ୍ୟାଲିବ୍ରେଟେଡ୍' ଅର୍ଥାତ୍ ଯୋଜନାବଦ୍ଧ ଏବଂ ସଠିକ୍ ଭାବରେ ବର୍ଣ୍ଣନା କରାଯାଇଛି।

ସୂତ୍ର ଅନୁଯାୟୀ, ଅଞ୍ଚଳରେ ଆହୁରି ଆତଙ୍କବାଦୀ ଲୁଚି ରହିଥିବା ସମ୍ଭାବନାକୁ ଦୃଷ୍ଟିରେ ରଖି ସର୍ଚ୍ଚ ଅପରେସନ୍ ଜାରି ରହିଛି। ଅପରେସନ୍ ସମୟରେ କୌଣସି ସୈନିକ ଆହତ ହେବାର କୌଣସି ଖବର ନାହିଁ। ମଣିପୁରରେ ଚାଲିଥିବା ଅଶାନ୍ତି ମଧ୍ୟରେ ସୁରକ୍ଷା ବାହିନୀ ଦ୍ୱାରା ଏହି କାର୍ଯ୍ୟାନୁଷ୍ଠାନକୁ ଏକ ଗୁରୁତ୍ୱପୂର୍ଣ୍ଣ ସଫଳତା ବୋଲି ବିବେଚନା କରାଯାଉଛି।

ଅଧିକ ପଢ଼ନ୍ତୁ: ଦୁଇ ଆତଙ୍କବାଦୀଙ୍କୁ ଘେରିଲେ ସୁରକ୍ଷା ବାହିନୀ