ନୂଆଦିଲ୍ଲୀ, ଅଗଷ୍ଟ ୦୫ (ଖବର ଓଡ଼ିଶା): ନ୍ୟାସନାଲ ହେରାଲ୍ଡ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ ଗୁରୁବାର ପୂର୍ବତନ କେନ୍ଦ୍ରମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ମଲ୍ଲିକାର୍ଜୁନ ଖଡ଼ଗେଙ୍କୁ ପ୍ରାୟ ୭ ଘଣ୍ଟା ପର୍ଯ୍ୟନ୍ତ ପଚରାଉଚରା କରିଛି । ଖଡ଼ଗେଙ୍କୁ ଇଡି ଅପରାହ୍ନ ସାଢ଼େ ୧ଟାରୁ ପଚରାଉଚରା ଆରମ୍ଭ କରିଥିଲା, ଯାହାକି ରାତି ସାଢ଼େ ୮ଟା ପର୍ଯ୍ୟନ୍ତ ଜାରି ଥିଲଶ । କଂଗ୍ରେସ ନେତାଙ୍କ କହିବା ନଅୁସାରେ ରାଜନୀତିର ସୀମା ଟପିଛି । ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ ମଲ୍ଲିକାର୍ଜୁନ ଖଡ଼ଗେଙ୍କୁ ୟଙ୍ଗ ଇଣ୍ଡିଆନର ପୂର୍ବ କର୍ମଚାରୀ, ଦରମା ଓ ବ୍ୟବସାୟ ସଂପର୍କିତ ପ୍ରଶ୍ନ ପଚରାଯାଇଛି ।
ମଲ୍ଲିକାର୍ଜୁନ ଖଡ଼ଗେଙ୍କୁ ଇଡି ପଚରାଉଚରାକୁ ନେଇ ପୂର୍ବତନ ମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ଜୟରାମ ରମେଶ ଗୁରୁବାର ପ୍ରତିକ୍ରିୟା ଦେଇଛନ୍ତି । ସେ କହିଛନ୍ତି ଯେ, ମଲ୍ଲିକାର୍ଜୁନ ଖଡ଼ଗେ ଆଜି ବିରୋଧୀ ଦଳର ଉପରାଷ୍ଟ୍ରପତି ପ୍ରାର୍ଥୀଙ୍କ ପାଇଁ ରାତ୍ରିଭୋଜନର ଆୟୋଜନ କରିଥାନ୍ତେ । କିନ୍ତୁ ସେ ଏବେ ଇଡି ସହିତ ଅଛନ୍ତି । ଏହା କେନ୍ଦ୍ର ସରକାରଙ୍କ ପ୍ରତିଶୋଧ ନୁହେଁ ତ ଆଉ କ’ଣ?