ଇଟାନଗର: ଆସାମରୁ ଆସିଥିବା ଜଣେ ପ୍ରବାସୀ ଯୁବକଙ୍କୁ ଭିଡ଼ ହିଂସା ଦ୍ୱାରା ହତ୍ୟା କରାଯିବା ପରେ ଉତ୍ତେଜନା ବୃଦ୍ଧି ପାଇବାରୁ ଅରୁଣାଚଳ ପ୍ରଦେଶର ଲୋୟର ଦିବାଙ୍ଗ ଉପତ୍ୟକା ଜିଲ୍ଲାର ରୋଇଂ ସହରରେ କର୍ଫ୍ୟୁ ଜାରି କରାଯାଇଛି। ଅନେକ ଝିଅଙ୍କୁ ଯୌନ ନିର୍ଯାତନା ଦେବାର ଅଭିଯୋଗରେ ଅଭିଯୁକ୍ତ ପ୍ରବାସୀ ଯୁବକଙ୍କୁ ଭିଡ଼ହିଂସାରେ ପିଟିପିଟି ହତ୍ୟା କରାଯାଇଛି।

ଆଇନ ଶୃଙ୍ଖଳା ବଜାୟ ରଖିବା ପାଇଁ ଅତିରିକ୍ତ ସୁରକ୍ଷା ବାହିନୀ ମୁତୟନ କରାଯାଇଛି। ରୋଇଂରେ ପରିସ୍ଥିତି ଉତ୍ତେଜନାପୂର୍ଣ୍ଣ ରହିଛି। କିନ୍ତୁ ନିୟନ୍ତ୍ରଣରେ ଅଛି ବୋଲି ପୋଲିସ ଅଧୀକ୍ଷକ କହିଛନ୍ତି। ଆସାମର ବୋଙ୍ଗାଇଗାଓଁର ବାସିନ୍ଦା ୧୯ ବର୍ଷୀୟ ଯୁବକ ରିୟାଜ-ଉଲ୍ କୁରିମ୍ ଅନେକ ସ୍କୁଲ ଛାତ୍ରୀଙ୍କୁ ଯୌନ ନିର୍ଯାତନା ଦେଇଥିବା ଅଭିଯୋଗ ହୋଇଛି।

ଶିଶୁ ଯୌନ ନିର୍ଯାତନା ଏବଂ ଭିଡ଼ ହିଂସା ସମେତ ଅନ୍ୟାନ୍ୟ ଅନେକ ଅଭିଯୋଗରେ ପୋଲିସ ଏକ ମାମଲା ରୁଜୁ କରିଛି। ଅବହେଳା ଏବଂ ପିଲାମାନଙ୍କ ସୁରକ୍ଷା ସୁନିଶ୍ଚିତ କରିବାରେ ବିଫଳତା ପାଇଁ ସ୍କୁଲ ଏବଂ ହଷ୍ଟେଲ ପରିଚାଳନା ବିରୁଦ୍ଧରେ ମଧ୍ୟ ତଦନ୍ତ ଚାଲିଛି।

ଜିଲ୍ଲା ପ୍ରଶାସନ ସ୍କୁଲ ହଷ୍ଟେଲକୁ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ କରିଦେଇଛି। ଅଭିଭାବକମାନଙ୍କୁ ସେମାନଙ୍କ ପିଲାମାନଙ୍କୁ ସେଠାରୁ ଫେରାଇ ଆଣିବା ଏବଂ ନିକଟବର୍ତ୍ତୀ ସରକାରୀ କିମ୍ବା ସ୍ୱୀକୃତିପ୍ରାପ୍ତ ବେସରକାରୀ ସ୍କୁଲରେ ଭର୍ତ୍ତି କରିବାକୁ ନିର୍ଦ୍ଦେଶ ଦିଆଯାଇଛି। ଏହି ଘଟଣାର ସ୍ୱାଧୀନ ତଦନ୍ତ କରିବା ପାଇଁ ଅରୁଣାଚଳ ପ୍ରଦେଶ ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗର ଏକ ଦଳ ରୋଇଙ୍ଗରେ ଅଛି।

ଅଧିକ ପଢ଼ନ୍ତୁ: କାର୍ଲୋସଙ୍କୁ ଫାଇନାଲ ମୁକାବିଲାରେ ଭେଟିବେ ଜାନିକ୍