ଦେଇର ଅଲ-ବାଲାହ: ଗାଜାରେ ଇସ୍ରାଏଲ ଶୁକ୍ରବାର ଦିନ ଅନେକ ବିମାନ ଦ୍ବାରା ଆକ୍ରମଣ କରିଛି। ସ୍ଥାନୀୟ ଅଧିକାରୀଙ୍କ ଅନୁଯାୟୀ  ଏହି ଆକ୍ରମଣରେ ୧୦୮ ଜଣ ପ୍ରାଣ ହରାଇଛନ୍ତି। ସେମାନଙ୍କ ମଧ୍ୟରୁ ଅଧିକାଂଶ ମହିଳା ଏବଂ ଶିଶୁ ଥିଲେ। ଏହି ଆକ୍ରମଣଗୁଡ଼ିକ ଦେଇର ଅଲ-ବାଲାହର ଉପକଣ୍ଠ ଏବଂ ଖାନ ୟୁନିସ ସହରକୁ ମଧ୍ୟ ଟାର୍ଗେଟ କରିଥିଲା।

ଏହି ଆକ୍ରମଣ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଉପସାଗରୀୟ ଦେଶ ଗସ୍ତ ସମୟରେ ଘଟିଥିଲା। ଯାତ୍ରା ସମୟରେ ଟ୍ରମ୍ପ ତିନୋଟି ଉପସାଗରୀୟ ଦେଶରେ ଅଟକିଥିଲେ। କିନ୍ତୁ ଇସ୍ରାଏଲରେ ନୁହେଁ। ତାଙ୍କ ଗସ୍ତର ଶେଷ ଦିନରେ ଆବୁଧାବିରେ ସାମ୍ବାଦିକମାନଙ୍କ ସହ କଥାବାର୍ତ୍ତା କରି ଟ୍ରମ୍ପ କହିଛନ୍ତି ଯେ ସେ ଗାଜା ସମେତ ଅନେକ ବିଶ୍ୱ ସଙ୍କଟ ସମାଧାନ କରିବାକୁ ଚେଷ୍ଟା କରୁଛନ୍ତି।

ଇସ୍ରାଏଲ କହିଛି ଯେ ଗାଜାରେ ଆତଙ୍କବାଦୀଙ୍କ ବିରୁଦ୍ଧରେ ଏହାର ଅଭିଯାନ ଜାରି ରହିଛି ଏବଂ ଗୋଟିଏ ଦିନ ପୂର୍ବରୁ ଏହା ୧୫୦ଟି ଲକ୍ଷ୍ୟସ୍ଥଳକୁ ଆକ୍ରମଣ କରିଥିଲା। ଏଥିରେ ଟ୍ୟାଙ୍କ-ବିରୋଧୀ କ୍ଷେପଣାସ୍ତ୍ର ପୋଷ୍ଟ ଏବଂ ସାମରିକ ଗଠନ ଧ୍ୱଂସ ପାଇଥିଲା।

ଇସ୍ରାଏଲ କହିଛି ଯେ ଏହା ଉତ୍ତର ଗାଜାର ଏକ କମ୍ପାଉଣ୍ଡରୁ କାର୍ଯ୍ୟ କରୁଥିବା ଅନେକ ଆତଙ୍କବାଦୀଙ୍କୁ ନିପାତ କରିଛି। ଶୁକ୍ରବାର ସକାଳେ ମଧ୍ୟ ଆକ୍ରମଣ ଜାରି ରହିଥିଲା। ଲୋକମାନଙ୍କୁ ଜାବାଲିଆ ଶରଣାର୍ଥୀ ଶିବିର ଏବଂ ବେଇଟ୍ ଲାହିଆ ସହରରୁ ପଳାଇବାକୁ ପଡିଲା। ଜାବାଲିଆ ଉପରେ କଳା ଧୂଆଁ ଉଠୁଥିବା ଦେଖାଯାଇଥିଲା।

ଇସ୍ରାଏଲ ସରକାରଙ୍କ ମୁଖପାତ୍ର ଡେଭିଡ୍ ମେନସର କହିଛନ୍ତି ଯେ ସେନା ଅଭିଯାନକୁ ଜୋରଦାର କରୁଛି। ଆମର ଲକ୍ଷ୍ୟ ହେଉଛି ବନ୍ଧକମାନଙ୍କୁ ଫେରାଇ ଆଣିବା ଏବଂ ହମାସକୁ କ୍ଷମତାରୁ ହଟାଇବା। ସେ କହିଛନ୍ତି ଯେ ଇସ୍ରାଏଲ ହମାସ ଉପରେ ଚାପ ପକାଇବ ଏବଂ ଏହା ଫଳାଫଳ ପାଉଛି।

ଅଧିକ ପଢ଼ନ୍ତୁ: ଆକ୍ରମଣର ଜବାବ ଦେବା ପାଇଁ ନୀତିରେ ପରିବର୍ତ୍ତନ ଆଣିଛି ଭାରତ