ନୂଆଦିଲ୍ଲୀ: ଭାରତୀୟ ଏବଂ ଇଂଲଣ୍ଡ ୧୯ ବର୍ଷରୁ କମ୍ କ୍ରିକେଟ୍ ଦଳ ମଧ୍ୟରେ ଯୁବ ଟେଷ୍ଟ ସିରିଜ୍ ଚାଲିଛି। ଏହାର ଦ୍ୱିତୀୟ ଟେଷ୍ଟ୍ ଚେମସଫୋର୍ଡର କାଉଣ୍ଟି ଗ୍ରାଉଣ୍ଡରେ ଖେଳାଯାଉଛି। ପ୍ରଥମ ଇନିଂସରେ ଭାରତୀୟ ବଂଶୋଦ୍ଭବ ଏକାଂଶ ସିଂହ ଇଂଲଣ୍ଡ ପାଇଁ ଏକ ଚମତ୍କାର ଶତକ ଖେଳିଛନ୍ତି। ଅନ୍ୟପକ୍ଷରେ ବୈଭବ ସୂର୍ଯ୍ୟବଂଶୀ ପ୍ରଥମ ଇନିଂସରେ ବିଫଳ ହୋଇଥିଲେ।

ଅଧିନାୟକ ଆୟୁଷ ମହାତ୍ରେ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ପ୍ରଥମ ଇନିଂସରେ ଇଂଲଣ୍ଡ ୩୦୯ ରନ କରିଥିଲା। ୮୦ ରନରେ ୫ ୱିକେଟ୍ ହରାଇବା ପରେ ଇଂଲଣ୍ଡ ଚାପରେ ଥିଲା, କିନ୍ତୁ ଏହା ପରେ ଇଂଲଣ୍ଡ ଦଳରେ ସାମିଲ ହୋଇଥିବା ଭାରତୀୟ ବଂଶୋଦ୍ଭବ ଖେଳାଳି ଏକାଂଶ ସିଂହ ୧୧୭ ରନର ଏକ ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିଲେ। ୧୫୫ ବଲ୍ ରେ ଖେଳାଯାଇଥିବା ଏହି ଇନିଂସରେ ଏକାଂଶ ୩ ଛକା ଏବଂ ୧୪ ଚୌକା ମାରିଥିଲେ।

ଗତ ସପ୍ତାହରେ ଏକାଂଶ ସିଂହ ୧୯ ବର୍ଷ ବୟସରେ ପଦାର୍ପଣ କରିଥିଲେ। ତାଙ୍କର ଜନ୍ମ ୧୬ ଜୁଲାଇ ୨୦୦୬ରେ ଲଣ୍ଡନର ଅର୍ଫିଂଟନରେ ହୋଇଥିଲା। ଏକାଂଶ ୨୦୨୫ ମସିହା ମେ ମାସରେ କେଣ୍ଟ ପାଇଁ ପ୍ରଥମ ଶ୍ରେଣୀ କ୍ରିକେଟରେ ଡେବ୍ୟୁ କରିଥିଲେ। ଗତ ବର୍ଷ ଜୁଲାଇରେ ସେ କେଣ୍ଟ ସହିତ ତାଙ୍କର ଆନୁଷ୍ଠାନିକ ଚୁକ୍ତିନାମା ସ୍ୱାକ୍ଷର କରିଥିଲେ। ତାଙ୍କ ବ୍ୟତୀତ ଅଧିନାୟକ ଥମାସ ରେଭ ୫୯ ରନର ଇନିଂସ ଖେଳିଥିଲେ, ଯେଉଁଥିରେ ସେ ୧ ଛକା ଏବଂ ୮ ଚୌକା ମାରିଥିଲେ। ନବମ ସ୍ଥାନରେ ଆସିଥିବା ଜେମ୍ସ ମିଣ୍ଟୋ ୪୬ ରନ କରି ଇଂଲଣ୍ଡକୁ ୩୦୯ ରନ ସ୍କୋରରେ ପହଞ୍ଚାଇଥିଲେ। ଭାରତ ପାଇଁ ନମନ ପୁଷ୍ପକ ସର୍ବାଧିକ ୱିକେଟ ନେଇଥିଲେ, ସେ ୧୭ ଓଭରରେ ୭୬ ରନ ଦେଇ ୪ ୱିକେଟ ନେଇଥିଲେ। ଆଦିତ୍ୟ ରାୱତ ଏବଂ ଅମ୍ବ୍ରିଶ ପ୍ରତ୍ୟେକ ୨-୨ ୱିକେଟ ନେଇଥିଲେ।

ସୋମବାର ଦ୍ୱିତୀୟ ଦିନ ଭାରତର ପ୍ରଥମ ଇନିଂସ ଆରମ୍ଭ ହୋଇଥିଲା, ବୈଭବ ସୂର୍ଯ୍ୟବଂଶୀ ଦ୍ରୁତ ଆରମ୍ଭ ଦେଇଥିଲେ। କିନ୍ତୁ ୨୦ ରନ କରି ଆଉଟ ହୋଇଥିଲେ। ୧୪ ବଲ୍‌ର ଏହି ଛୋଟ ଇନିଂସରେ ସେ ୨ଟି ଛକା ଏବଂ ଗୋଟିଏ ଚୌକା ମାରିଥିଲେ। ଦ୍ୱିତୀୟ ଦିନର ଖେଳ ଶେଷ ସୁଦ୍ଧା ଭାରତୀୟ ଦଳ ଗୋଟିଏ ୱିକେଟ ହରାଇ ୫୧ ରନ କରିଛି। ଅଧିନାୟକ ଆୟୁଷ ମହାତ୍ରେ ୨୪ ରନ ଏବଂ ବିହାନ ମାଲହୋତ୍ରା ୬ ରନ କରି ଅପରାଜିତ ଅଛନ୍ତି। ଆଜି ଚାରି ଦିନିଆ ଟେଷ୍ଟର ତୃତୀୟ ଦିନ।

ଅଧିକ ପଢ଼ନ୍ତୁ: ମୋ ଆଖି ସାମ୍ନାରେ ପିଲାମାନେ ଜୀବନ୍ତ ଜଳିଗଲେ