ନୂଆଦିଲ୍ଲୀ: ଗୋଆ ନାଇଟ୍ କ୍ଲବ୍ ଅଗ୍ନିକାଣ୍ଡରେ ୨୫ ଜଣଙ୍କ ମୃତ୍ୟୁ ପରେ ଫୁକେଟ୍ ପଳାଇଯାଇଥିବା ଲୁଥ୍ରା ଭାଇମାନଙ୍କୁ ଖୁବ୍ ଶୀଘ୍ର ଗୋଆ ଅଣାଯିବ। ଗୋଆ ପୋଲିସ ସ୍ପଷ୍ଟ କରିଛି ଯେ ସୋମବାର ବିଳମ୍ବିତ ରାତିରେ ଏକ ସ୍ୱତନ୍ତ୍ର ପୋଲିସ ଦଳ ଦିଲ୍ଲୀ ଯିବ, ଯେଉଁଠାରେ କେନ୍ଦ୍ରୀୟ ଏଜେନ୍ସିଗୁଡ଼ିକ ଆନୁଷ୍ଠାନିକ ଭାବରେ ଲୁଥ୍ରା ଭାଇଙ୍କ ହେପାଜତକୁ ଗୋଆ ପୋଲିସକୁ ହସ୍ତାନ୍ତର କରିବେ।

ନିର୍ଦ୍ଧାରିତ ସମୟ ଅନୁଯାୟୀ, ଲୁଥ୍ରା ଭାଇମାନଙ୍କୁ ମଙ୍ଗଳବାର ବିଳମ୍ବିତ ରାତିରେ ଗୋଆ ଅଣାଯିବ। ତା’ପରେ ସେମାନଙ୍କୁ ଅଞ୍ଜୁନା ପୋଲିସ ଷ୍ଟେସନରେ ପଚରାଉଚରା କରାଯିବ। ଅଭିଯୁକ୍ତମାନଙ୍କୁ ଡିସେମ୍ବର ୧୭ ତାରିଖରେ ମାପୁସା କୋର୍ଟରେ ହାଜର କରାଯିବାର ଆଶା କରାଯାଉଛି। ଏହି ସମୟରେ କୋର୍ଟରେ ମାମଲାକୁ ପ୍ରଭାବଶାଳୀ ଭାବରେ ଉପସ୍ଥାପନ କରିବା ପାଇଁ ଗୋଆ ସରକାର ଓକିଲମାନଙ୍କର ଏକ ସ୍ୱତନ୍ତ୍ର ଦଳ ଗଠନ କରିଛନ୍ତି।

ପୋଲିସ ଅଭିଯୁକ୍ତଙ୍କ ବିରୁଦ୍ଧରେ ଭାରତୀୟ ଦଣ୍ଡ ସଂହିତାର ଧାରା ୧୦୫ ଅନୁଯାୟୀ ଏକ ମାମଲା ରୁଜୁ କରିଛି, ଯେଉଁଥିରେ ଦୋଷୀ ସାବ୍ୟସ୍ତ ହେଲେ ୧୦ ବର୍ଷ ପର୍ଯ୍ୟନ୍ତ ଜେଲଦଣ୍ଡ ହୋଇପାରେ। ଏକ ଦୃଢ଼ ଚାର୍ଜସିଟ୍ ପ୍ରସ୍ତୁତ କରିବା ପାଇଁ, ତଦନ୍ତକାରୀ ଅଧିକାରୀମାନେ ଲୁଥ୍ରା ଭାଇଙ୍କ ବିରୁଦ୍ଧରେ ନିୟମ ଉଲ୍ଲଂଘନ ସହିତ ଜଡିତ ସମସ୍ତ ପ୍ରମାଣ ସଂଗ୍ରହ କରିଛନ୍ତି।

ଏହି ସମୟରେ, ଥାଇଲ୍ୟାଣ୍ଡରୁ ଲୁଥ୍ରା ଭାଇମାନଙ୍କୁ ପ୍ରତ୍ୟର୍ପଣ ପ୍ରକ୍ରିୟା ମଧ୍ୟ ଶେଷ ପର୍ଯ୍ୟାୟରେ ପହଞ୍ଚିଛି। ଶୀର୍ଷ ସୂତ୍ର ଅନୁଯାୟୀ, ଉଭୟଙ୍କୁ ଖୁବ୍ ଶୀଘ୍ର ଦିଲ୍ଲୀ ପଠାଯିବାର ସମ୍ଭାବନା ଅଛି। ଭାରତୀୟ କର୍ତ୍ତୃପକ୍ଷ ସେମାନଙ୍କ ପାସପୋର୍ଟ ବାତିଲ ପରେ ଜାରି ହୋଇଥିବା ଜରୁରୀକାଳୀନ ପ୍ରମାଣପତ୍ର ସମେତ ସମସ୍ତ ଆବଶ୍ୟକୀୟ କାଗଜପତ୍ର ଥାଇ ପକ୍ଷକୁ ହସ୍ତାନ୍ତର କରିଛନ୍ତି।

ବର୍ତ୍ତମାନ ବ୍ୟାଙ୍କକର ସ୍ଥାନୀୟ କୋର୍ଟରେ କେବଳ ଚୂଡ଼ାନ୍ତ ଆଇନଗତ ସମୀକ୍ଷା ବାକି ଅଛି, ଯାହା ଥାଇ ଆଇନ ଅନୁଯାୟୀ ବାଧ୍ୟତାମୂଳକ।-ଇନସେଟ୍-ହାଇକୋର୍ଟ ଗୋଆ ସରକାରଙ୍କଠାରୁ ଜବାବ ତଲବ କରିଛନ୍ତି ସୋମବାର ବମ୍ବେ ହାଇକୋର୍ଟର ଗୋଆ ବେଞ୍ଚ ଗୋଆ ନାଇଟ୍ କ୍ଲବ୍ ଘଟଣା ବିରୁଦ୍ଧରେ ଦାୟର ହୋଇଥିବା ଦେୱାନୀ ମାମଲାକୁ ଏକ ଜନସ୍ୱାର୍ଥ ମାମଲାରେ ପରିଣତ କରି କହିଛନ୍ତି ଯେ ଏହି ଘଟଣା ପାଇଁ କାହାକୁ ଦାୟୀ କରାଯିବା ଆବଶ୍ୟକ। କୋର୍ଟ ଗୋଆ ସରକାରଙ୍କୁ ଏକ ନୋଟିସ୍ ଜାରି କରିଛନ୍ତି।

ଅଧିକ ପଢ଼ନ୍ତୁ: ଆଜି ପଶ୍ଚିମବଙ୍ଗରେ ପ୍ରକାଶ ପାଇବ ଡ୍ରାଫ୍ଟ ଭୋଟର ତାଲିକା