ଅମୃତସର: ଦକ୍ଷିଣ କଶ୍ମୀରର ପହଲଗାମ ଆତଙ୍କବାଦୀ ଆକ୍ରମଣ ପରେ ପାକିସ୍ତାନୀ ନାଗରିକଙ୍କୁ ସେମାନଙ୍କ ଦେଶକୁ ପଠାଇବା ପରେ ଅଟାରୀ ସୀମା ବନ୍ଦ କରାଯାଇଛି। କିନ୍ତୁ ଚିକିତ୍ସା କାରଣରୁ ଦୁଇ ଦିନର ଅବଧି ବୃଦ୍ଧି ଯୋଗୁଁ ସୋମବାର ମଧ୍ୟ ଅନେକ ପାକିସ୍ତାନୀ ଅଟାରୀରେ ପହଞ୍ଚିଛନ୍ତି। ଏଥିରେ ଏପରି ଲୋକମାନେ ମଧ୍ୟ ସାମିଲ ଥିଲେ ଯେଉଁମାନେ କୌଣସି ଡାକ୍ତରୀ କାରଣ ବିନା ଗୋଟିଏ ଦିନ ବିଳମ୍ବରେ ସୀମାରେ ପହଞ୍ଚିଥିଲେ।

ସାଧାରଣ ଲୋକଙ୍କ ପାଇଁ ସମୟସୀମା ଶେଷ ହୋଇଥିଲେ ମଧ୍ୟ ସୀମା ଅଧିକାରୀମାନେ କୌଣସି ପାକିସ୍ତାନୀଙ୍କୁ ସୀମା ପାର ହେବାରୁ ଅଟକାଇ ନଥିଲେ। ସୋମବାର ଦିନ ମୋଟ ୧୨୪ ଜଣ ପାକିସ୍ତାନୀ ନିଜ ଦେଶକୁ ଫେରିଥିବା ବେଳେ ୨୨୦ ଜଣ ଭାରତୀୟ ମଧ୍ୟ ସ୍ୱଦେଶ ଫେରିଛନ୍ତି। ଏପର୍ଯ୍ୟନ୍ତ ୫୩୭ ଜଣ ପାକିସ୍ତାନୀ ନାଗରିକ ସେମାନଙ୍କ ଦେଶକୁ ଯାଇଥିବାବେଳେ ୮୫୦ ଜଣ ଭାରତୀୟ ଫେରି ଆସିଛନ୍ତି।  

ୟାକୁବ କହିଛନ୍ତି ତାଙ୍କ ମାଆ ୟାସିନଙ୍କୁ ମେଡିକାଲ ଭିସାରେ ଭାରତ ଆଣିଛନ୍ତି। ତାଙ୍କ ମା’ଙ୍କ ଦୁଇଟି କିଡନୀ କ୍ଷତିଗ୍ରସ୍ତ ହୋଇଛି। ପାକିସ୍ତାନରେ ଚିକିତ୍ସା ସମ୍ଭବ ନ ଥିବାରୁ ସେଠାକାର ଡାକ୍ତରମାନେ ତାଙ୍କୁ ଭାରତକୁ ରେଫର କରିଥିଲେ। ମୁଁ ୪୦ ଦିନର ଭିସା ନେଇ ଏଠାକୁ ଆସିଥିଲି। କିନ୍ତୁ ୨୦ ଦିନ ପରେ ମୋତେ ଫେରିଯିବାକୁ ନିର୍ଦ୍ଦେଶ ଦିଆଯାଇଥିଲା। ମା’ଙ୍କ ଚିକିତ୍ସା ସମ୍ପୂର୍ଣ୍ଣ ହୋଇପାରିଲା ନାହିଁ। ଏବେ ମୁଁ ଚିନ୍ତିତ ଯେ ମୋ ମା’ଙ୍କ ସହିତ କିପରି ବ୍ୟବହାର କରାଯିବ।

ରୁଖସାର କହିଥିଲେ ଯେ ସେ ତାଙ୍କ ଚାରି ପିଲାଙ୍କ ସହିତ ତାଙ୍କ ପିତାମାତାଙ୍କୁ ଭେଟିବା ପାଇଁ ଭାରତ ଆସିଥିଲେ। ଯେତେବେଳେ ମୋତେ ହଠାତ୍ ଭାରତ ଛାଡିବା ପାଇଁ ନିର୍ଦ୍ଦେଶ ମିଳିଲା, ମୁଁ ମୋ ପିଲାମାନଙ୍କ ସହିତ ଅଟାରୀ ସୀମାରେ ପହଞ୍ଚିଲି, କିନ୍ତୁ ମୋ ପାଖରେ ଭାରତୀୟ ପାସପୋର୍ଟ ଥିବାରୁ ମୋତେ ଯିବାକୁ ଅନୁମତି ଦିଆଗଲା ନାହିଁ।

ସମସ୍ତ ଚାରି ପିଲାଙ୍କ ପାଖରେ ପାକିସ୍ତାନୀ ପାସପୋର୍ଟ ଥିଲା, ତେଣୁ ସେମାନଙ୍କୁ ଅଟାରୀ ସୀମାରେ ଛାଡି ଦିଆଯାଇଥିଲା। ମୋ ସ୍ୱାମୀ ଏବଂ ପରିବାର ସଦସ୍ୟମାନେ ୱାଘା ସୀମାରେ ଅପେକ୍ଷା କରିଥିଲେ। ମୁଁ ପିଲାମାନଙ୍କୁ ସେମାନଙ୍କ ପାଖକୁ ପଠାଇଛି କିନ୍ତୁ ଏବେ ମୁଁ ସେଠାକୁ କିପରି ଯାଇପାରିବି ସେ ବିଷୟରେ ଚିନ୍ତିତ।

ପାକିସ୍ତାନର ପେଶାୱରର ୭୦ ବର୍ଷୀୟ ଜନମରାଜ କହିଛନ୍ତି ଯେ ସେ ୪୫ ଦିନିଆ ଭିସାରେ ଭାରତ ଆସିଥିଲେ। ମୁଁ ପ୍ରଥମ ଥର ପାଇଁ ଭାରତ ଆସିଥିଲି। କିନ୍ତୁ ମଝି ରାସ୍ତାରେ ଫେରିବାକୁ ପଡିଲା। ପାକିସ୍ତାନରୁ ଯୋଧପୁର ଆସିଥିବା ଚାନ୍ନୁ ମଲ୍ କହିଛନ୍ତି ଯେ ଆତଙ୍କବାଦୀମାନେ ଧର୍ମ ନାମରେ ଲୋକଙ୍କୁ ହତ୍ୟା କରିଛନ୍ତି।

ପାକିସ୍ତାନୀ ନାଗରିକ ଭାନି କହିଛନ୍ତି ଯେ ସେ ତାଙ୍କ ପରିବାର ସହିତ ଧାର୍ମିକ ସ୍ଥଳ ପରିଦର୍ଶନ କରିବାକୁ ଭାରତ ଆସିଥିଲେ। ମୋ ପାଖରେ ୪୦ ଦିନର ଭିସା ଥିଲା କିନ୍ତୁ ମୋତେ ୨୦ ଦିନ ମଧ୍ୟରେ ଫେରିବାକୁ ପଡିଲା। ଉଭୟ ଦେଶର ସରକାର ଆତଙ୍କବାଦ ବିରୋଧରେ କଠୋର ଆଭିମୁଖ୍ୟ ଗ୍ରହଣ କରିବା ଉଚିତ, ଯାହା ଦ୍ଵାରା ନିର୍ଦ୍ଦୋଷ ଲୋକଙ୍କୁ ହତ୍ୟା ନ କରାଯାଏ ଏବଂ ଲୋକଙ୍କୁ ଏହିପରି ଦେଶ ଛାଡିବାକୁ ନ ପଡ଼େ।

ଅଧିକ ପଢ଼ନ୍ତୁ: ଇତିହାସ ରଚିଲେ ବୈଭବ ସୂର୍ଯ୍ୟବଂଶୀ, ଭାଙ୍ଗିଲେ ଅନେକ ରେକର୍ଡ