ୱାଶିଂଟନ୍ ଡିସି: ଅପରେସନ୍ ସିନ୍ଦୂର ପରେ ଭାରତ ଏବଂ ଆମେରିକା ମଧ୍ୟରେ ସମ୍ପର୍କ ଉପରେ ପ୍ରଶ୍ନ ଉଠିଥିଲା। ଭାରତ ଆମେରିକା ରାଷ୍ଟ୍ରପତି ଟ୍ରମ୍ପଙ୍କ ଅସ୍ତ୍ରବିରତି ଦାବିକୁ ସମ୍ପୂର୍ଣ୍ଣ ପ୍ରତ୍ୟାଖ୍ୟାନ କରିଥିଲା, ଯାହା ପରେ ଅନୁମାନ କରାଯାଉଥିଲା ଯେ ହୁଏତ ଟ୍ରମ୍ପ ଏବେ ଭାରତ ପ୍ରତି କଠୋର ମନୋଭାବ ନେଇପାରିବେ। କିନ୍ତୁ ହ୍ୱାଇଟ୍ ହାଉସ୍ ଏହି ଅନୁମାନ ଉପରେ ପୂର୍ଣ୍ଣଛେଦ ପକାଇଛି।

ହ୍ୱାଇଟ୍ ହାଉସ୍ ମିଡିଆ ସଚିବ କାରୋଲିନ୍ ଲେଭିଟ୍ ସ୍ପଷ୍ଟ କରିଛନ୍ତି ଯେ ରାଷ୍ଟ୍ରପତି ଟ୍ରମ୍ପଙ୍କର ପ୍ରଧାନମନ୍ତ୍ରୀ ମୋଦୀଙ୍କ ସହିତ ଭଲ ସମ୍ପର୍କ ରହିଛି। ଏହା ସହିତ ସେ ଭାରତ-ପ୍ରଶାନ୍ତ ମହାସାଗରରେ ଭାରତର ଭୂମିକାକୁ ମଧ୍ୟ ପ୍ରଶଂସା କରିଛନ୍ତି।

ଭାରତ-ପ୍ରଶାନ୍ତ ମହାସାଗରରେ ଚୀନର ବଢ଼ୁଥିବା ପ୍ରାଧାନ୍ୟ ବିଷୟରେ କଥା ହୋଇ କାରୋଲିନ କହିଛନ୍ତି, ଏସିଆ ପ୍ରଶାନ୍ତ ମହାସାଗରରେ ଭାରତ ଆମର ଅତ୍ୟନ୍ତ ଗୁରୁତ୍ୱପୂର୍ଣ୍ଣ ରଣନୈତିକ ଅଂଶୀଦାର। ରାଷ୍ଟ୍ରପତି ଟ୍ରମ୍ପଙ୍କର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହିତ ଏକ ଉତ୍କୃଷ୍ଟ ସମ୍ପର୍କ ରହିଛି। ଏହି ବନ୍ଧୁତା ଭବିଷ୍ୟତରେ ମଧ୍ୟ ଜାରି ରହିବ।"

କାରୋଲିନଙ୍କ ଏହି ବୟାନ ଏପରି ସମୟରେ ଆସିଛି ଯେତେବେଳେ ବୈଦେଶିକ ମନ୍ତ୍ରୀ ଏସ. ଜୟଶଙ୍କର କ୍ବାର୍ଡ ବୈଠକରେ ଯୋଗଦେବା ପାଇଁ ଆମେରିକା ଗସ୍ତରେ ଅଛନ୍ତି। ସମ୍ପ୍ରତି ସେ ଜାତିସଂଘରେ ଆତଙ୍କବାଦ ପ୍ରତି ସମସ୍ତଙ୍କ ଦୃଷ୍ଟି ଆକର୍ଷଣ କରିବା ପାଇଁ ଏକ ପ୍ରଦର୍ଶନୀ ମଧ୍ୟ ଉଦଘାଟନ କରିଛନ୍ତି, ଯାହାର ନାମ - The Human Cost of Terrorism।

କ୍ୱାଡ୍ ବିଷୟରେ କହିବାକୁ ଗଲେ, ଏହା ଚାରି ଦେଶ- ଅଷ୍ଟ୍ରେଲିଆ, ଭାରତ, ଜାପାନ ଏବଂ ଆମେରିକା ମଧ୍ୟରେ କୂଟନୈତିକ ସହଭାଗୀତାର ଏକ ଉଦାହରଣ, ଯାହାର ଲକ୍ଷ୍ୟ ଭାରତ-ପ୍ରଶାନ୍ତ ମହାସାଗରରେ ସ୍ଥିରତା ବଜାୟ ରଖିବା। ଏହି ଗୋଷ୍ଠୀ ୨୦୦୪ ମସିହାରେ ଭାରତ ମହାସାଗରରେ ଆସିଥିବା ସୁନାମି ପରେ ଗଠିତ ହୋଇଥିଲା।

ଭାରତ ଆସିବେ ଟ୍ରମ୍ପ

କ୍ୱାଡ୍ ଶିଖର ସମ୍ମିଳନୀ ଖୁବ୍ ଶୀଘ୍ର ନୂଆଦିଲ୍ଲୀରେ ଅନୁଷ୍ଠିତ ହେବାକୁ ଯାଉଛି, ଯାହା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରାଷ୍ଟ୍ରପତି ଟ୍ରମ୍ପଙ୍କୁ ନିମନ୍ତ୍ରଣ କରିଥିଲେ। ଟ୍ରମ୍ପ ମଧ୍ୟ ଜୁନ ୧୮ରେ ପ୍ରଧାନମନ୍ତ୍ରୀ ମୋଦୀଙ୍କ ନିମନ୍ତ୍ରଣକୁ ଗ୍ରହଣ କରିଛନ୍ତି। ଟ୍ରମ୍ପ କାନାଡାରେ ଜି-୭ ସମ୍ମିଳନୀ ସମୟରେ ପ୍ରଧାନମନ୍ତ୍ରୀ ମୋଦୀଙ୍କୁ ମଧ୍ୟ ଡାକିଥିଲେ। ଉଭୟଙ୍କ ମଧ୍ୟରେ ଏହି ଆଲୋଚନା ୩୫ ମିନିଟ୍ ଧରି ଚାଲିଥିଲା।

ଡୋନାଲ୍ଡ ଟ୍ରମ୍ପଙ୍କ ଭାରତ ଗସ୍ତ ସମ୍ପର୍କରେ ସୂଚନା ଦେଇ ବୈଦେଶିକ ସଚିବ ବିକ୍ରମ ମିଶ୍ର କହିଛନ୍ତି- ପ୍ରଧାନମନ୍ତ୍ରୀ ମୋଦୀ କ୍ୱାଡର ପରବର୍ତ୍ତୀ ବୈଠକ ପାଇଁ ଟ୍ରମ୍ପଙ୍କୁ ଭାରତ ଆସିବାକୁ ନିମନ୍ତ୍ରଣ କରିଛନ୍ତି। ଟ୍ରମ୍ପ ମଧ୍ୟ ଏହାକୁ ଗ୍ରହଣ କରିଛନ୍ତି ଏବଂ ଭାରତ ଆସିବାକୁ ଆଗ୍ରହ ପ୍ରକାଶ କରିଛନ୍ତି।

ଅଧିକ ପଢ଼ନ୍ତୁ: ତେଲେଙ୍ଗାନା ଔଷଧ କାରଖାନାରେ ବିସ୍ଫୋରଣ ପରେ ଅଗ୍ନିକାଣ୍ଡ