ମୁମ୍ବାଇ: ଝାଡ଼ଖଣ୍ଡର ରାଜଧାନୀ ରାଞ୍ଚିରେ ଲୋକଙ୍କଠାରୁ ସାଢ଼େ ୨୨ ଲକ୍ଷ ଟଙ୍କା ଠକେଇ କରିବା ପରେ ଅଭିଯୁକ୍ତ ମୁମ୍ବାଇରେ ପହଞ୍ଚି ପୁଲିସଠାରୁ ବର୍ତ୍ତିବା ପାଇଁ ସେଠାରେ ଚାଉମିନ୍‌ ଷ୍ଟଲ୍ ଖୋଲିବା ଆରମ୍ଭ କରିଥିଲା। ରାଞ୍ଚିରେ ତାଙ୍କ ବିରୋଧରେ ମାମଲା ରୁଜୁ ହେବା ପରେ ପୁଲିସର ଟେକ୍ନିକାଲ ସେଲ୍ ତାଙ୍କୁ ଠାବ କରିଥିଲା। ଏହାପରେ ରାଞ୍ଚି ପୁଲିସ ଅଭିଯୁକ୍ତ ରବୀନ୍ଦ୍ର ରାଣାଙ୍କୁ ମୁମ୍ବାଇରୁ ଗିରଫ କରିଥିଲା। 

ଅଭିଯୁକ୍ତ ଜଣକ ରାଞ୍ଚିର ସୁଖଦେବ ନଗର ଅଞ୍ଚଳରେ ଏଚ୍‌ଆର୍‌ ଏଣ୍ଟରପ୍ରାଇଜେସ୍ ନାମରେ ଏକ ଦୋକାନ ଚଳାଉଥିଲା। ରାଞ୍ଚି ପୁଣ୍ଡାଗର ବ୍ୟବସାୟୀ ଶୈଳେନ୍ଦ୍ର କୁମାର ପାଠକ ସୁଖଦେବ ନଗର ଥାନାରେ ରବୀନ୍ଦ୍ର ରାଣାଙ୍କ ବିରୋଧରେ ୨୨.୫୦ ଲକ୍ଷ ଟଙ୍କା ଠକେଇ କରିଥିବା ଅଭିଯୋଗ ଆଣିଥିଲେ। 

ସୁଖଦେବ ନଗର ଥାନା ଅଧିକାରୀ ମନୋଜ କୁମାର କହିଛନ୍ତି ଯେ ଅଭିଯୁକ୍ତମାନେ ଶୈଳେନ୍ଦ୍ର କୁମାର ପାଠକଙ୍କଠାରୁ ବିଦ୍ୟୁତ ତାର କିଣିବା ପାଇଁ ଟଙ୍କା ନେଇଥିଲେ। ଦୀର୍ଘ ଦିନ ପରେ ଶୈଳେନ୍ଦ୍ର କୁମାର ପାଠକ ଟଙ୍କା ଫେରସ୍ତ ମାଗିବାରୁ ଅଭିଯୁକ୍ତ ମାନେ ମୋବାଇଲ ବନ୍ଦ କରି ମୁମ୍ବାଇ ପଳାଇଯାଇଥିଲେ। କେବଳ ଏତିକି ନୁହେଁ ଅଭିଯୁକ୍ତ ଶୈଳେନ୍ଦ୍ର କୁମାର ପାଠକଙ୍କୁ ଏକ ଚେକ୍ ମଧ୍ୟ ଦେଇଥିଲେ, ଯାହା ବାଉନ୍ସ ହୋଇଥିଲା।    

ଅଭିଯୁକ୍ତ ରବୀନ୍ଦ୍ର ରଣାଙ୍କ ବିରୋଧରେ ଠକେଇ ମାମଲା ରୁଜୁ ହେବା ପରଠାରୁ ଟେକ୍ନିକାଲ ସେଲ୍ ତାଙ୍କ ପଛରେ ରହିଥିଲା। ଅଭିଯୁକ୍ତମାନେ ମୁମ୍ବାଇରେ ଆଶ୍ରୟ ନେଉଥିବା ସୂଚନା ମିଳିବା ମାତ୍ରେ ସୁଖଦେବ ନଗର ପୁଲିସ ଟିମ୍ ମୁମ୍ବାଇ ଯାଇ ଅଭିଯୁକ୍ତଙ୍କୁ ଧରିଥିଲା।  

ଫେରାର ଅଭିଯୁକ୍ତ ମୁମ୍ବାଇ ଯିବା ପୂର୍ବରୁ ବିହାରର ଗୟା ଓ ଝାଡ଼ଖଣ୍ଡର ବୋକାରୋରେ ଆଶ୍ରୟ ନେଇଥିଲା ବୋଲି ପୁଲିସ ଇନ୍ସପେକ୍ଟର କହିଛନ୍ତି। ସୂଚନା ପାଇବା ପରେ ସେଠାରେ ମଧ୍ୟ ପୁଲିସ ପକ୍ଷରୁ ନୋଟିସ୍ ପଠାଯାଇଥିଲା, କିନ୍ତୁ ସେ ପୁଲିସକୁ ଚକମା ଦେଇ ଫେରାର ହୋଇଯାଇଥିଲା। ଏହାପରେ ଟେକ୍ନିକାଲ ସେଲରୁ ଖବର ମିଳିଥିଲା ଯେ ଅଭିଯୁକ୍ତ ରବୀନ୍ଦ୍ର ରାଣା ମୁମ୍ବାଇରେ ଲୁଚି ରହିଛି। ଖବର ପାଇ ସୁଖଦେବ ନଗର ଥାନାର ଏକ ଟିମ୍ ମୁମ୍ବାଇରେ ପହଞ୍ଚି ଜାଣିବାକୁ ପାଇଥିଲେ ଯେ ଅଭିଯୁକ୍ତ ରବୀନ୍ଦ୍ର ରାଣା ମୁମ୍ବାଇରେ ଏକ ଚାଉମିନ୍‌ ଦୋକାନ ପରିଚାଳନା କରୁଥିଲା। 

ଅଧିକ ପଢ଼ନ୍ତୁ: ପ୍ରଥମ ୬ ଘଣ୍ଟାରେ ସଙ୍ଗମରେ ସ୍ନାନ କଲେ ୬୦ ଲକ୍ଷରୁ ଊର୍ଦ୍ଧ୍ବ ଶ୍ରଦ୍ଧାଳୁ