କୋଲକାତା: ଗତ ଏକ ବର୍ଷ ଧରି ସମଗ୍ର ଦେଶରେ ସାଇବର ଅପରାଧ ମାମଲା ବଢ଼ି ଚାଲିଛି। ସାଇବର ଅପରାଧ ସହିତ ଜଡ଼ିତ ଦୁର୍ବୃତ୍ତମାନେ ଡିଜିଟାଲ ଗିରଫ କରି ଧନଶାଳୀ ଓ ସୂଚନା ପ୍ରଯୁକ୍ତିବିଦ୍ୟା ଉପରେ କମ୍‌ ଜ୍ଞାନ ରଖିଥିବା ଲୋକଙ୍କୁ ଟାର୍ଗେଟ କରୁଛନ୍ତି। ଏପର୍ଯ୍ୟନ୍ତ ଏହି ପ୍ରକାରର ଠକେଇରେ ଦେଶବ୍ୟାପୀ ଲୋକମାନେ କୋଟି କୋଟି ଟଙ୍କା ହରାଇଛନ୍ତି। ଏପରି ଏକ ମାମଲାରେ ପଶ୍ଚିମବଙ୍ଗର ଏକ କୋର୍ଟ ପ୍ରଥମ ଥର ପାଇଁ ତାଙ୍କ ରାୟ ଦେଇଛନ୍ତି। କୋର୍ଟ ୯ ଜଣ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରି ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି।

ପଶ୍ଚିମବଙ୍ଗର ନାଦିଆ ଜିଲ୍ଲାର କଲ୍ୟାଣୀ କୋର୍ଟ ଏହି ରାୟ ଦେଇଛନ୍ତି। ସମସ୍ତ ୯ ଜଣଙ୍କୁ ଗୁରୁବାର ଦୋଷୀ ସାବ୍ୟସ୍ତ କରାଯାଇଥିଲା ଏବଂ ଅତିରିକ୍ତ ସେସନ୍ସ ଜଜ୍ ଶୁକ୍ରବାର ଦଣ୍ଡାଦେଶ ଘୋଷଣା କରିଛନ୍ତି। ସ୍ୱତନ୍ତ୍ର ସରକାରୀ ଓକିଲ ବିବାସ ଚାଟାର୍ଜୀ କହିଛନ୍ତି ଯେ ଦେଶର ଡିଜିଟାଲ ଗିରଫ ମାମଲାରେ ଏହା ପ୍ରଥମ ଦଣ୍ଡ। ୨୦୨୫ ଫେବୃଆରୀ ୨୪ରେ ବିଚାର ଆରମ୍ଭ ହୋଇଥିଲା ଏବଂ ମାତ୍ର ସାଢ଼େ ଚାରି ମାସ ମଧ୍ୟରେ ସମାପ୍ତ ହୋଇଥିଲା। ଘଟଣାର ଆଠ ମାସ ମଧ୍ୟରେ ସମ୍ପୂର୍ଣ୍ଣ ବିଚାର ପ୍ରକ୍ରିୟା ସମାପ୍ତ ହୋଇଥିଲା।

୨୦୨୪ ନଭେମ୍ବର ୬ରେ ଅବସରପ୍ରାପ୍ତ ବୈଜ୍ଞାନିକ ପାର୍ଥ କୁମାର ମୁଖାର୍ଜୀ ପୋଲିସରେ ଅଭିଯୋଗ କରିଥିଲେ। ସେ କହିଛନ୍ତି ଯେ ତାଙ୍କୁ ଏକ ହ୍ୱାଟସଆପ୍ କଲ୍ ମିଳିଥିଲା ଯେଉଁଥିରେ କଲର ନିଜକୁ ମୁମ୍ବାଇ ପୋଲିସ ସବ-ଇନସ୍ପେକ୍ଟର ହେମରାଜ କୋଲି ବୋଲି ପରିଚୟ ଦେଇଥିଲେ। ସେ ପାର୍ଥ ମୁଖାର୍ଜୀଙ୍କୁ କହିଥିଲେ ଯେ ସେ ଏକ ଆର୍ଥିକ ଠକେଇର ଅଭିଯୁକ୍ତ ଏବଂ କିଛି କାଗଜପତ୍ର ମଧ୍ୟ ପଠାଇଥିଲେ। ଅଭିଯୁକ୍ତ ତାଙ୍କୁ ଧମକ ଦେଇଥିଲେ ଯେ ଯଦି ସେ ତାଙ୍କ କଥା ନ ମାନିବେ, ତେବେ ତାଙ୍କୁ ଏବଂ ତାଙ୍କ ସ୍ତ୍ରୀଙ୍କୁ ଗିରଫ କରାଯିବ।

କଲର ତାଙ୍କୁ କଲ୍ ବିଚ୍ଛିନ୍ନ ନକରିବାକୁ ନିର୍ଦ୍ଦେଶ ଦେଇଥିଲେ ଏବଂ ‘ଡିଜିଟାଲ୍ ଗିରଫ’ ନାମରେ ବିଭିନ୍ନ ବ୍ୟାଙ୍କ ଆକାଉଣ୍ଟରେ ମୋଟ ୧ କୋଟି ଟଙ୍କା ଜମା କରିବାକୁ କହିଥିଲେ। ଯେତେବେଳେ କଲରଙ୍କ ନମ୍ବର ବନ୍ଦ ହୋଇଗଲା, ପାର୍ଥ କୁମାର ଜାଣିପାରିଲେ ଯେ ସେ ଠକାମିର ଶିକାର ହୋଇଛନ୍ତି। 

ଦୋଷୀମାନଙ୍କ ତାଲିକା

• ଜାଟିନ୍ ଅନୁପ ଲଡୱାଲ୍ - ମହାରାଷ୍ଟ୍ରର ନାଲାସୋପାରା 
• ରୋହିତ ସିଂ - ହିସାର, ହରିୟାଣା 
• ରୂପେଶ ଯାଦବ - ରେୱାରୀ, ହରିୟାଣା 
• ସାହିଲ ସିଂ - ରେୱାରୀ, ହରିୟାଣା 
• ସୁମାୟା ବାନୋ ପଠାନ - ଗୁଜୁରାଟର ସୁରଟ 
• ଅଶୋକ ଫାଲଡୁ - ଜାମନଗର, ଗୁଜୁରାଟ 
• ମହମ୍ମଦ ଇମତିଆଜ ଅନସାରୀ - ମହାରାଷ୍ଟ୍ରର ଉଲହସନାଗର
• ସହିଦ ଅଲି ଶେଖ - ମହାରାଷ୍ଟ୍ରର ଉଲହସନଗର
• ଶାହାରୁଖ ରଫିକ୍ ଶେଖ - ଥାନେ, ମହାରାଷ୍ଟ୍ର 

ପ୍ରତାରଣା, ଜାଲିଆତି ଏବଂ ସାଇବର ଅପରାଧ ସହ ଜଡିତ ଆଇଟି ଆକ୍ଟର ଧାରା ୬୬ସି ଓ ୬୬ଡି ଅନୁଯାୟୀ ସମସ୍ତ ଦୋଷୀଙ୍କୁ ଭାରତୀୟ ଦଣ୍ଡବିଧି ସଂହିତା ଏବଂ ଧାରା ୬୬ସି ଓ ୬୬ଡି ଅନୁଯାୟୀ ଅଭିଯୋଗ କରାଯାଇଛି।

ଅଧିକ ପଢ଼ନ୍ତୁ: ଇସ୍ରାଏଲ ଓ ସିରିଆ ମଧ୍ୟରେ ଯୁଦ୍ଧବିରତି ଘୋଷଣା