ନୂଆଦିଲ୍ଲୀ: ଦିଲ୍ଲୀର ସମସ୍ତ ୧୫ଟି ଜିଲ୍ଲାର ବସ୍ତିରେ ବେଆଇନ ଭାବେ ରହୁଥିବା ଲକ୍ଷଲକ୍ଷ ବାଂଲାଦେଶୀ ନାଗରିକଙ୍କୁ ନିଜ ଦେଶକୁ ଫେରିବାକୁ ପଡ଼ିବ। ଗୃହ ମନ୍ତ୍ରଣାଳୟ ଏବଂ ଉପରାଜ୍ୟପାଳଙ୍କ ନିର୍ଦ୍ଦେଶକ୍ରମେ ଦିଲ୍ଲୀ ପୁଲିସ ସେମାନଙ୍କୁ ଚିହ୍ନଟ କରି ବାଂଲାଦେଶ ପଠାଇବା ପାଇଁ କସରତକୁ ଜୋରଦାର କରିଛି।

ବେଆଇନ ଭାବେ ଆଧାରକାର୍ଡ ତିଆରି କରିଥିବା ସନ୍ଦିଗ୍ଧ ବାଂଲାଦେଶୀଙ୍କ ସମସ୍ତ କାଗଜପତ୍ର ଓ ଅନ୍ୟାନ୍ୟ ଭାରତୀୟ କାଗଜପତ୍ର ଜବତ କରି ପୁଲିସ ସମ୍ପୃକ୍ତ ବିଭାଗସହାୟତାରେ କାର୍ଯ୍ୟ କରୁଛି। ସେମାନେ ଜାଲିଆତି କରି ଆଧାର ଓ ଅନ୍ୟାନ୍ୟ ଭାରତୀୟ ଦସ୍ତାବିଜ ତିଆରି କରିଥିବା ନିଶ୍ଚିତ ହେବା ମାତ୍ରେ ସେମାନଙ୍କ ଉକ୍ତ କାଗଜପତ୍ର ରଦ୍ଦ କରି ସେମାନଙ୍କୁ ଧରି ବାଂଲାଦେଶ ଫେରାଇ ଦିଆଯିବ।

ଏକ ମାସ ମଧ୍ୟରେ ୧୫ଟି ଜିଲ୍ଲାର ପୁଲିସ ୧୬ ହଜାର ସନ୍ଦିଗ୍ଧ ବାଂଲାଦେଶୀଙ୍କ ତାଲିକା ପ୍ରସ୍ତୁତ କରିଛି। ସେମାନଙ୍କୁ ପଚରାଉଚରା କରାଯିବା ସହ ପର୍ଯ୍ୟାୟକ୍ରମେ ସେମାନଙ୍କ କାଗଜପତ୍ର ଯାଞ୍ଚ କରାଯାଉଛି। ଏମାନଙ୍କ ମଧ୍ୟରୁ ୭୫୦ ଜଣ ବାଂଲାଦେଶୀ ହୋଇପାରନ୍ତି ବୋଲି ପୁଲିସ ସନ୍ଦେହ କରୁଛି। ସେମାନଙ୍କ ପାଖରେ ପଶ୍ଚିମବଙ୍ଗ, ଆସାମ, ବିହାର, ଝାଡ଼ଖଣ୍ଡ, ଦିଲ୍ଲୀ, ୟୁପି ଓ ହରିୟାଣାର ଆଧାର କାର୍ଡ ଓ ଭୋଟର କାର୍ଡ ରହିଛି।

ସେମାନଙ୍କ ମଧ୍ୟରୁ କେତେକଙ୍କ ନିକଟରେ ନୂଆ ଓ କିଛି ବର୍ଷ ପୁରୁଣା କାଗଜପତ୍ର ଥିବା ଜଣାପଡ଼ିଥିଲା। ଏହି ୭୫୦ ସନ୍ଦିଗ୍ଧଙ୍କ ଆଧାରକାର୍ଡ ସମ୍ପର୍କରେ ଦିଲ୍ଲୀ ପୁଲିସ ୟୁନିକ୍ ଆଇଡେଣ୍ଟିଫିକେସନ୍ ଅଥରିଟି ଅଫ୍ ଇଣ୍ଡିଆ (ୟୁଆଇଡିଏଆଇ)ଠାରୁ ତଥ୍ୟ ମାଗିଛି। ୟୁନିକ୍ ଆଇଡେଣ୍ଟିଫିକେସନ୍ ଅଥରିଟି ଅଫ୍ ଇଣ୍ଡିଆ (ୟୁଆଇଡିଏଆଇ)କୁ ଆଧାରକାର୍ଡ ତିଆରି ପାଇଁ ଦାଖଲ କରାଯାଇଥିବା ଦସ୍ତାବିଜ ସମ୍ପର୍କରେ ସ୍ପଷ୍ଟୀକରଣ ଦେବାକୁ କୁହାଯାଇଛି। 

ୟୁନିକ୍ ଆଇଡେଣ୍ଟିଫିକେସନ୍ ଅଥରିଟି ଅଫ୍ ଇଣ୍ଡିଆ ମଧ୍ୟ ସମ୍ପୃକ୍ତ ଲୋକଙ୍କୁ ଡକାଇବ। ଦିଲ୍ଲୀ ପୁଲିସ ମୁଖ୍ୟାଳୟ ସୂତ୍ର ଅନୁଯାୟୀ, ଗତ ଏକ ମାସ ମଧ୍ୟରେ ୭୫ ଜଣ ବାଂଲାଦେଶୀଙ୍କୁ ବାଂଲାଦେଶ ଫେରାଇ ଦିଆଯାଇଛି। ଏହି ତାଲିକା ବିଦେଶୀ ଆଞ୍ଚଳିକ ପଞ୍ଜୀକରଣ କାର୍ଯ୍ୟାଳୟକୁ ମଧ୍ୟ ପଠାଯାଇଛି। ଅଧିକାଂଶ ବାଂଲାଦେଶୀ ଦକ୍ଷିଣ, ଦକ୍ଷିଣ-ପୂର୍ବ ଏବଂ ଦକ୍ଷିଣ-ପଶ୍ଚିମ ଜିଲ୍ଲାରେ ଧରାପଡ଼ିଛନ୍ତି।

ଅଧିକ ପଢ଼ନ୍ତୁ: ଇସ୍ତଫା ଦେଇପାରନ୍ତି ଜଷ୍ଟିନ ଟ୍ରୁଡୋ