ୱାଶିଂଟନ: ଆମେରିକା ଏବେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଡେନମାର୍କ ସ୍ୱାୟତ୍ତ ଅଞ୍ଚଳ ଗ୍ରୀନଲ୍ୟାଣ୍ଡ ଦଖଲ କରିବାର ଉଦ୍ଦେଶ୍ୟକୁ ଭିନ୍ନ ଭାବରେ ବ୍ୟାଖ୍ୟା କରିବାକୁ ଚେଷ୍ଟା କରୁଛି। ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ ଗ୍ରୀନଲ୍ୟାଣ୍ଡ ଉପରେ ଆମେରିକାର ନିୟନ୍ତ୍ରଣକୁ ୟୁରୋପୀୟ ସୁରକ୍ଷା ପାଇଁ ଲାଭଦାୟକ ବୋଲି ବର୍ଣ୍ଣନା କରିଛନ୍ତି। ନାଟୋ ସଚିବ ଜେନେରାଲ ମାର୍କ ରୁଟେଙ୍କ ସହ ଏକ ଆଲୋଚନାରେ ରୁବିଓ କହିଛନ୍ତି, ଗ୍ରୀନଲ୍ୟାଣ୍ଡ ଏକ ରଣନୈତିକ ଗୁରୁତ୍ୱପୂର୍ଣ୍ଣ ଅଞ୍ଚଳ। ଚୀନ୍ ଏବଂ ରୁଷ ଏହା ଚାରିପାଖରେ ସେମାନଙ୍କର କାର୍ଯ୍ୟକଳାପ ବୃଦ୍ଧି କରୁଛନ୍ତି। ତେଣୁ, ସେଠାରେ ଆମେରିକାର ଉପସ୍ଥିତି ଅତ୍ୟାବଶ୍ୟକ। ସେଥିପାଇଁ ଆମେରିକା ଗ୍ରୀନଲ୍ୟାଣ୍ଡ ଉପରେ ନିୟନ୍ତ୍ରଣ ଚାହୁଁଛି। ଡେନମାର୍କ ପ୍ରଧାନମନ୍ତ୍ରୀ ଏବଂ ଅନେକ ୟୁରୋପୀୟ ନେତା ଗ୍ରୀନଲ୍ୟାଣ୍ଡ ପ୍ରସଙ୍ଗ ଉପରେ ଚିନ୍ତା ପ୍ରକାଶ କରିବା ପରେ ଆମେରିକାର ବୈଦେଶିକ ମନ୍ତ୍ରୀ ରୁବିଓ ଏହି ବିବୃତ୍ତି ଦେଇଛନ୍ତି।

ଏହି ପରିପ୍ରେକ୍ଷୀରେ ଇଟାଲୀ ପ୍ରଧାନମନ୍ତ୍ରୀ ଜିଓର୍ଜିଓ ମେଲୋନି କହିଛନ୍ତି ଯେ ସେ ବିଶ୍ୱାସ କରନ୍ତି ନାହିଁ ଯେ ଆମେରିକା କେବଳ ସାମରିକ କାରଣ ପାଇଁ ଗ୍ରୀନଲ୍ୟାଣ୍ଡର ନିୟନ୍ତ୍ରଣ ଚାହୁଁଛି। ସେ କହିଛନ୍ତି, ନାଟୋ ସାମରିକ ମେଣ୍ଟକୁ ସୁଦୃଢ଼ କରି ଆଞ୍ଚଳିକ ସୁରକ୍ଷା ବିଷୟରେ ଆମେରିକାର ଚିନ୍ତାକୁ ଦୂର କରାଯାଇପାରିବ। ସେ କହିଛନ୍ତି, ଗ୍ରୀନଲ୍ୟାଣ୍ଡରେ ଯେକୌଣସି ସାମରିକ କାର୍ଯ୍ୟାନୁଷ୍ଠାନ କାହାର ସ୍ୱାର୍ଥରେ ରହିବ ନାହିଁ ଏବଂ ନାଟୋ ମେଣ୍ଟ ପାଇଁ ଗମ୍ଭୀର ପରିଣାମ ଆଣିବ। ଏହା ଉଲ୍ଲେଖନୀୟ ଯେ ପ୍ରାୟ ସମସ୍ତ ୟୁରୋପୀୟ ଦେଶ ଆମେରିକା ନେତୃତ୍ୱାଧୀନ ସାମରିକ ମେଣ୍ଟ ନାଟୋର ଅଂଶ।

ଏହି ସମୟରେ, ଡେନମାର୍କ ସାଂସଦ ରାସମୁସ୍ ଜାରଲୋଭ ଆଶା ପ୍ରକାଶ କରିଥିଲେ ଯେ ଯଦି ଆମେରିକା ବଳପୂର୍ବକ ଗ୍ରୀନଲ୍ୟାଣ୍ଡ ଦଖଲ କରିବାକୁ ଚେଷ୍ଟା କରେ ତେବେ ଭାରତ ତାଙ୍କ ଦେଶ ସହିତ ଠିଆ ହେବ। ସାଂସଦ କହିଛନ୍ତି ଯେ, ଆମେରିକାର ଏହି ପଦକ୍ଷେପ ଡେନମାର୍କ ଏବଂ ଗ୍ରୀନଲ୍ୟାଣ୍ଡର ସାର୍ବଭୌମତ୍ୱକୁ ଉଲ୍ଲଂଘନ କରିବ। ଭାରତ ନିଶ୍ଚିତ ଭାବରେ ଅନ୍ତର୍ଜାତୀୟ ଆଇନ ପାଳନ କରିବା ସହିତ ଡେନମାର୍କକୁ ସମର୍ଥନ କରିବ।

ଅଧିକ ପଢ଼ନ୍ତୁ: 'ବାଂଲାଦେଶରେ ସାମ୍ପ୍ରଦାୟିକ ଘଟଣାଗୁଡ଼ିକୁ ଦୃଢ଼ ଭାବରେ ମୁକାବିଲା କରିବା ଆବଶ୍ୟକ'