ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ୬ଟି ଦେଶ ଉପରେ ନୂତନ ଶୁଳ୍କ ହାର ଲାଗୁ କରିବାକୁ ଘୋଷଣା କରିଛନ୍ତି। ଏହି ଦେଶଗୁଡ଼ିକ ମଧ୍ୟରେ ଫିଲିପାଇନ୍ସ, ଇରାକ, ମାଲଡୋଭା, ଆଲଜେରିଆ, ଲିବିଆ ଏବଂ ବ୍ରୁନେଇ ଅନ୍ତର୍ଭୁକ୍ତ। ନୂତନ ଶୁଳ୍କ ୨୦୨୫ ଅଗଷ୍ଟ ୧ରୁ କାର୍ଯ୍ୟକାରୀ ହେବ। ଏହି ନିଷ୍ପତ୍ତି ଏପରି ସମୟରେ ଆସିଛି ଯେତେବେଳେ ଟ୍ରମ୍ପ ଦକ୍ଷିଣ କୋରିଆ ଏବଂ ଜାପାନ ସମେତ ୧୪ଟି ଅନ୍ୟ ଦେଶ ଉପରେ ଶୁଳ୍କ ଘୋଷଣା କରିସାରିଛନ୍ତି। ଏବେ ଏହି ୬ଟି ନୂତନ ଦେଶ ମଧ୍ୟ ଶୁଳ୍କ ତାଲିକାରେ ଯୋଡି ହୋଇଛି।

କେଉଁ ଦେଶ ଉପରେ କେତେ ଶୁଳ୍କ ?

ଫିଲିପାଇନ୍ସ: ୨୫%

ବ୍ରୁନେଇ: ୨୫%

ମୋଲଡୋଭା: ୨୫%

ଇରାକ: ୩୦%

ଆଲଜେରିଆ: ୩୦%

ଲିବିଆ: ୩୦%

ରାଷ୍ଟ୍ରପତି ଟ୍ରମ୍ପ ଏହି ଦେଶଗୁଡ଼ିକର ରାଷ୍ଟ୍ରାଧ୍ୟକ୍ଷଙ୍କୁ ଶୁଳ୍କର ସମ୍ପୂର୍ଣ୍ଣ ବିବରଣୀ ପ୍ରଦାନ କରି ସରକାରୀ ଚିଠି ପଠାଇଛନ୍ତି। ଏହି ନିଷ୍ପତ୍ତି ଅନୁଯାୟୀ, ସର୍ବାଧିକ ଶୁଳ୍କ ୩୦% ସ୍ଥିର କରାଯାଇଛି, ଯାହା ଇରାକ, ଆଲଜେରିଆ ଏବଂ ଲିବିଆ ଉପରେ ଲାଗୁ ହେବ। ଟ୍ରମ୍ପ ପ୍ରଶାସନ ବିଶ୍ୱାସ କରେ ଯେ ଆମେରିକୀୟ ବାଣିଜ୍ୟ ସ୍ୱାର୍ଥକୁ ସୁରକ୍ଷା ଦେବା ପାଇଁ ଏହି ପଦକ୍ଷେପ ନିହାତି ଆବଶ୍ୟକ। 

ବ୍ରିକ୍ସ ଦେଶଗୁଡ଼ିକ ଉପରେ ମଧ୍ୟ ୧୦% ଶୁଳ୍କ

ଟ୍ରମ୍ପ ଗୋଟିଏ ଦିନ ପୂର୍ବରୁ ବ୍ରିକ୍ସ ଦେଶଗୁଡ଼ିକ ବ୍ରାଜିଲ, ରୁଷ, ଭାରତ, ଚୀନ ଏବଂ ଦକ୍ଷିଣ ଆଫ୍ରିକାରୁ ଆସୁଥିବା ସାମଗ୍ରୀ ଉପରେ ୧୦% ଶୁଳ୍କ ଲଗାଇବାକୁ ଘୋଷଣା କରିଥିଲେ। ଏହି ପଦକ୍ଷେପ ଆମେରିକା ଏବଂ ବିକାଶମୂଳକ  ଅର୍ଥନୀତି ଦେଶ ମଧ୍ୟରେ ବାଣିଜ୍ୟ ଉତ୍ତେଜନାକୁ ଆହୁରି ବୃଦ୍ଧି କରିପାରେ।

ରାଷ୍ଟ୍ରପତି ଟ୍ରମ୍ପ ଏହା ମଧ୍ୟ କହିଛନ୍ତି ଯେ ଆମେରିକାରେ ତମ୍ବା ଉପରେ ୫୦% ଶୁଳ୍କ ଲଗାଯିବ। ଏହା ସହିତ ଔଷଧ ଉତ୍ପାଦ ଉପରେ ଶୁଳ୍କ ଗୋଟିଏ ବର୍ଷ ମଧ୍ୟରେ ୨୦୦% ପର୍ଯ୍ୟନ୍ତ ବୃଦ୍ଧି ପାଇପାରେ। ଟ୍ରମ୍ପଙ୍କ ଏସବୁ ନିଷ୍ପତ୍ତି ବିଶ୍ୱ ବଜାରରେ ଅନିଶ୍ଚିତତା ଓ ଆନ୍ତର୍ଜାତୀୟ ବ୍ୟବସାୟ ଉପରେ ବଡ଼ ପ୍ରଭାବ ପକାଇପାରେ।