ନୂଆଦିଲ୍ଲୀ: ଆହୁରି ଜଟିଳ ହେବାରେ ଲାଗିଛି ମଧ୍ୟପ୍ରାଚ୍ୟ ଯୁଦ୍ଧ। ଇସ୍ରାଏଲ ଓ ଆମେରିକା ଦ୍ଵାରା ଇରାନ ଉପରେ ଘନ ଘନ ହମଲା ଜାରି ରହିଛି। ସେପଟେ ଇରାନ ମଧ୍ୟ ମୁହଁତୋଡ଼ ଜବାବ ଦେଉଛି। ଏହା ମଧ୍ୟରେ ଇରାନୀ ଗଣମାଧ୍ୟମ ଦାବି କରିଛି ଯେ ହର୍ମୁଜ୍ ଦ୍ୱୀପ ନିକଟରେ ଏକ F-15 ଲଢ଼ୁଆ ବିମାନକୁ ଗୁଳି କରି ଖସାଇ ଦିଆଯାଇଛି। ରିପୋର୍ଟ ଅନୁଯାୟୀ, ଜେଟ୍ଟି ଶତ୍ରୁ ଦେଶର ଥିଲା ଏବଂ ଦକ୍ଷିଣ ଅଞ୍ଚଳ ଉପରେ ଉଡୁଥିଲା। ଇରାନର ବାୟୁ ପ୍ରତିରକ୍ଷା ପ୍ରଣାଳୀ ଏହାକୁ ଭୂମି-ଭିତ୍ତିକ କ୍ଷେପଣାସ୍ତ୍ର ସାହାଯ୍ୟରେ ଟାର୍ଗେଟ କରିଥିଲା। ସରକାରୀ ପ୍ରେସ୍ ଟିଭି ମଧ୍ୟ ଏହି ଘଟଣାର ପ୍ରସାରଣ କରିଛି ଏବଂ ଜେଟ୍ ଦୁର୍ଘଟଣାଗ୍ରସ୍ତ ହେଉଥିବାର ଏକ ଭିଡିଓ ଜାରି କରିଛି।

ତଥାପି, ଏହି ଦାବିକୁ ନେଇ ଆମେରିକା କିମ୍ବା ଇସ୍ରାଏଲ ପକ୍ଷରୁ କିଛି ପ୍ରତିକ୍ରିୟା ମିଳିନାହିଁ। ଇରାନ ସହିତ ଚାଲିଥିବା ଯୁଦ୍ଧରେ ଆମେରିକା ଏବଂ ଇସ୍ରାଏଲ ଭାରୀ କ୍ଷତି ସହିଛନ୍ତି। ମାତ୍ର ୨୧ ଦିନରେ, ଉଭୟ ଦେଶ ୨୮ରୁ ଅଧିକ ବିମାନ ଏବଂ ଅନେକ ମହଙ୍ଗା ସାମରିକ ଭିତ୍ତିଭୂମି ହରାଇଲେଣି। ଇରାନ ଅତି କମରେ ୧୭ ବିମାନକୁ ଗୁଳି କରି ଖସାଇ ଦେଇଛି କିମ୍ବା କ୍ଷତିଗ୍ରସ୍ତ କରିଛି ବୋଲି ଦାବି କରିଛି।

ଯୁଦ୍ଧରେ ଆମେରିକା ଏବଂ ଇସ୍ରାଏଲ କେତେ କ୍ଷତି ସହିଛି ?

ଆମେରିକା ୧୨ଟି MQ-9 ରିପର ଡ୍ରୋନ୍ ସମେତ ୧୬ ଟି ବିମାନ ହରାଇ ସାରିଛି। ପ୍ରତ୍ୟେକ ଡ୍ରୋନର ମୂଲ୍ୟ ପ୍ରାୟ ୫୬.୫ ବିଲିୟନ ଡଲାର  ଅର୍ଥାତ୍ କେବଳ ଡ୍ରୋନ୍ ପାଇଁ ୪,୭୦୦ କୋଟିରୁ ଅଧିକ କ୍ଷତି ହୋଇଛି। ଏହା ସହିତ, କୁଏତରେ ଆତ୍ମ-ଅଗ୍ନି ଦ୍ୱାରା ତିନୋଟି F-15 ଷ୍ଟ୍ରାଇକ୍ ଇଗଲ୍ ଦୁର୍ଘଟଣାବଶତଃ ନଷ୍ଟ ହୋଇଯାଇଛି। ମାର୍ଚ୍ଚ ୧୨ରେ, ଏକ KC-135 ଇନ୍ଧନ ଟ୍ୟାଙ୍କର୍ ବିମାନ ଇରାକ ଉପରେ ଦୁର୍ଘଟଣାଗ୍ରସ୍ତ ହୋଇଥିଲା, ଯେଉଁଥିରେ ଛଅ ଜଣଙ୍କର ମୃତ୍ୟୁ ହୋଇଥିଲା। ସମାନ ଘଟଣାରେ ଅନ୍ୟ ଏକ KC-135 ମଧ୍ୟ କ୍ଷତିଗ୍ରସ୍ତ ହୋଇଛି।

F-35 ମଧ୍ୟ ଗୁଳି କରି ଖସାଇ ଦିଆଯାଇଥିବା ଦାବି 

ମାର୍ଚ୍ଚ ୧୯ରେ ଇରାନ ଏକ F-35 ଗୁପ୍ତ ଯୁଦ୍ଧ ବିମାନକୁ ଟାର୍ଗେଟ କରିଥିବା ଦାବି କରିଥିଲା। ଆମେରିକୀୟ ସେନା କହିଛି ଯେ ବିମାନକୁ ଜରୁରୀକାଳୀନ ଅବତରଣ କରିବାକୁ ପଡିଥିଲା, କିନ୍ତୁ କାରଣ ସ୍ପଷ୍ଟ ଜଣା ପଡ଼ିଣ ଥିଲା। ଯଦି ଏହି ଦାବି ସତ୍ୟ ହୁଏ, ତେବେ ଏପରି ଏକ ଆଧୁନିକ ଜେଟ୍ ଟାର୍ଗେଟ କରାଯିବା ପ୍ରଥମ ଘଟଣା ହେବ। ଇରାନ ଅଞ୍ଚଳରେ ଏକ ଡଜନରୁ ଅଧିକ ଇସ୍ରାଏଲୀ ଡ୍ରୋନ୍ ମଧ୍ୟ ନଷ୍ଟ କରାଯାଇଛି, ଯାହା ଫଳରେ ଉଭୟ ଦେଶର ପ୍ରଭାବିତ ବିମାନ ସଂଖ୍ୟା ୨୮କୁ ବୃଦ୍ଧି ପାଇଛି।