ନୂଆଦିଲ୍ଲୀ: ଯୁଦ୍ଧ ସମୟରେ ଇରାନରେ ଫସି ରହିଥିବା ୧୧୦ ଜଣ ଭାରତୀୟ ଛାତ୍ର ଦିଲ୍ଲୀର ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ ପହଞ୍ଚିଛନ୍ତି। ଏହି ଛାତ୍ରମାନଙ୍କ ମଧ୍ୟରୁ ଅଧିକାଂଶ ଜମ୍ମୁ କଶ୍ମୀରର ବାସିନ୍ଦା। ଏମାନେ ଉର୍ମିଆ ମେଡିକାଲ ବିଶ୍ୱବିଦ୍ୟାଳୟର ଛାତ୍ରଛାତ୍ରୀ। ଏମାନେ ବୁଧବାର ବିଳମ୍ବିତ ସନ୍ଧ୍ୟାରେ ଆର୍ମେନିଆ ଏବଂ ଦୋହା ଦେଇ ଦିଲ୍ଲୀରେ ପହଞ୍ଚିଛନ୍ତି। ସେମାନଙ୍କର ବିମାନ ମଧ୍ୟ ପ୍ରାୟ ୩ ଘଣ୍ଟା ବିଳମ୍ବରେ ପହଞ୍ଚିଥିଲା।

ଇରାନ ଏବଂ ଇସ୍ରାଏଲ ମଧ୍ୟରେ ଚାଲିଥିବା ଯୁଦ୍ଧକୁ ଦୃଷ୍ଟିରେ ରଖି, ଭାରତ ସରକାର ଇରାନରେ ଫସି ରହିଥିବା ଭାରତୀୟ ନାଗରିକଙ୍କ ସୁରକ୍ଷିତ ପ୍ରତ୍ୟାବର୍ତ୍ତନ ପାଇଁ 'ଅପରେସନ୍ ସିନ୍ଧୁ' ଆରମ୍ଭ କରିଥିଲେ। ସରକାରଙ୍କ ଏହି ସ୍ୱତନ୍ତ୍ର ଅଭିଯାନ ଅଧୀନରେ, ଜୁନ୍ ୧୭ ତାରିଖରେ ଇରାନର ଉତ୍ତର ଭାଗରେ ଫସି ରହିଥିବା ୧୧୦ ଜଣ ଭାରତୀୟ ଛାତ୍ରଙ୍କୁ ସୁରକ୍ଷିତ ଭାବରେ ବାହାର କରାଯାଇଥିଲା। ଭାରତୀୟ ଦୂତାବାସର ତତ୍ତ୍ୱାବଧାନରେ ଏହି ଛାତ୍ରମାନଙ୍କୁ ଇରାନରୁ ଆର୍ମେନିଆର ରାଜଧାନୀ ୟେରେଭାନକୁ ସଡ଼କ ପଥରେ ପଠାଯାଇଥିଲା। ସେମାନେ ଏହି ରାସ୍ତା ଦେଇ ଦିଲ୍ଲୀ ଆସିଛନ୍ତି।

ବୁଧବାର ଦିନ ଅପରାହ୍ନ ୨:୫୫ ରେ ଏକ ସ୍ୱତନ୍ତ୍ର ବିମାନ ଯୋଗେ ସମସ୍ତ ଛାତ୍ରଛାତ୍ରୀମାନେ ଭାରତ ଅଭିମୁଖେ ଯାତ୍ରା କରିଥିଲେ ଏବଂ ଗୁରୁବାର ସକାଳେ ନୂଆଦିଲ୍ଲୀରେ ପହଞ୍ଚିଛନ୍ତି। ଏହା ଅପରେସନ ସିନ୍ଧୁର ପ୍ରଥମ ପର୍ଯ୍ୟାୟ। ଭାରତ ସରକାର ଏହି ସମ୍ପୂର୍ଣ୍ଣ ଅପରେସନରେ ସହଯୋଗ ପାଇଁ ଇରାନ ଏବଂ ଆର୍ମେନିଆ ସରକାରଙ୍କୁ ବିଶେଷ କୃତଜ୍ଞତା ଜଣାଇଛନ୍ତି, ଯେଉଁମାନେ ଉଦ୍ଧାର କାର୍ଯ୍ୟକୁ ସହଜ ଏବଂ ସୁରକ୍ଷିତ କରିବାରେ ସାହାଯ୍ୟ କରିଥିଲେ।

ଇରାନରେ ପରିସ୍ଥିତି ଖରାପ ହେଉଥିବାରୁ ଭାରତୀୟ ଦୂତାବାସ ଯୁଦ୍ଧ ପ୍ରଭାବିତ ଅଞ୍ଚଳରୁ ଭାରତୀୟ ନାଗରିକଙ୍କୁ ନିରାପଦ ସ୍ଥାନକୁ ପଠାଇବାକୁ ନିରନ୍ତର ଉଦ୍ୟମ ଜାରି ରଖିଛି। ଏହା ସହିତ ଭାରତ ସରକାର ଜରୁରୀକାଳୀନ ଯୋଗାଯୋଗ ନମ୍ବର, ହ୍ୱାଟ୍ସଆପ୍ ନମ୍ବର ଏବଂ ଇମେଲ୍ ଆଇଡି ଜାରି କରିଛନ୍ତି, ଯେଉଁଠାରୁ ଲୋକମାନେ ସାହାଯ୍ୟ ପାଇପାରିବେ।

ଅଧିକ ପଢ଼ନ୍ତୁ: ଯୁଦ୍ଧ ଭିତରେ ଖାମେନେଇଙ୍କ ଚେତାବନୀ