ବ୍ରହ୍ମପୁର : ଦକ୍ଷିଣ ଓଡ଼ିଶାବାସୀଙ୍କୁ ଉତ୍ତମ ସ୍ୱାସ୍ଥ୍ୟ ସେବା ଯୋଗାଇଦେବା ଲକ୍ଷ୍ୟରେ ଆରମ୍ଭ ହୋଇଥିବା ଇନ୍‌ଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍‌ସେସ୍ ଆଣ୍ଡ ସମ୍ ହସ୍ପିଟାଲ୍‌ର ଶୀତଳାପଲ୍ଲୀ କ୍ୟାମ୍ପସ୍‌ରେ ବର୍ତ୍ତମାନ ଅତ୍ୟାଧୁନିକ ଚିକିତ୍ସା ଓ ଅସ୍ତ୍ରୋପଚାର ଉପଲବ୍ଧ ହେଉଛି । 

ଏହି ହସ୍ପିଟାଲ୍‌ରେ ଗର୍ଭବତୀଙ୍କ କ୍ଷେତ୍ରରେ ଜଟିଳ ଗର୍ଭଧାରଣ ସମୟରେ ଯତ୍ନ ଓ ଚିକିତ୍ସା, ପ୍ରସବ, ଅସ୍ତ୍ରୋପଚାର ମାଧ୍ୟମରେ ପ୍ରସବ ଓ ଅନ୍ୟାନ୍ୟ ଅତ୍ୟାଧୁନିକ ଚିକିତ୍ସା ହୋଇପାରୁଛି । ସେହିପରି ନବଜାତ ଶିଶୁଙ୍କ ସ୍ୱାସ୍ଥ୍ୟସେବା ମଧ୍ୟ ଅତ୍ୟାଧୁନିକ ଉପାୟରେ କରାଯାଉଛି । ସ୍ତ୍ରୀ ଓ ପ୍ରସୂତି ବିଭାଗର ବିଶେଷଜ୍ଞ, ଶିଶୁରୋଗ ବିଭାଗର ଡାକ୍ତର, ପ୍ରଶିକ୍ଷିତ ନର୍ସ ଓ ଟେକ୍ନିସିଆନ୍ ମାନଙ୍କ ଦ୍ୱାରା କାର୍ଯ୍ୟ ସଂପାଦନ କରାଯାଉଛି । ଶିଶୁ ରୋଗ ବିଶେଷଜ୍ଞ ଡାକ୍ତର ମୀନାକ୍ଷୀ ସାହୁଙ୍କ ତତ୍ୱାବଧାନରେ ଶିଶୁରୋଗ ବିଭାଗର ସମସ୍ତ ଚିକିତ୍ସା କରାଯାଉଛି । ଏହି ହସ୍ପିଟାଲ୍‌ରେ ଅତ୍ୟାଧୁନିକ ଓଟି, ଲେବର୍ ରୁମ୍ ଓ ନବଜାତ ଶିଶୁମାନଙ୍କ ନିମନ୍ତେ ଏନ୍‌ଆଇସିୟୁ ସେବା ମଧ୍ୟ ଖୁବ୍ ସୁଲଭ ମୂଲ୍ୟରେ ଉପଲବ୍ଧ । 

ସେହିପରି ରୋଗୀମାନଙ୍କ ନିମନ୍ତେ ଏଠାରେ ସଂପୂର୍ଣ୍ଣ ହିପ୍ ରିପ୍ଲେସ୍‌ମେଂଟ ଭଳି ଅତ୍ୟାଧୁନିକ ଅସ୍ତ୍ରୋପଚାର  କରାଯାଉଛି । ଗତ ଦୁଇ ମାସ ତଳେ ଜଣେ ମହିଳା ଘରେ ପଡ଼ିଯିବା ଫଳରେ ଗୁରୁତର ଅସୁସ୍ଥ ହୋଇ ଶଯ୍ୟାଶାୟୀ ଅବସ୍ଥାରେ ହସ୍ପିଟାଲକୁ ଆସିଥିଲେ । ସେ ଚାଲିବା କିମ୍ବା ବସିବା ଅବସ୍ଥାରେ ନଥିଲେ । ନିଜର ଦୈନନ୍ଦିନ କାର୍ଯ୍ୟ ମଧ୍ୟ କରିପାରୁ ନଥିଲେ । ବିଭିନ୍ନ ପରୀକ୍ଷା ନିରୀକ୍ଷା ପରେ ତାଙ୍କର ସମ୍ପୂର୍ଣ୍ଣ ହିପ୍ ରିପ୍ଲେସମେଂଟ ନିମନ୍ତେ ଡାକ୍ତରମାନେ ନିଷ୍ପତି ନେଇଥିଲେ । ତେବେ ତାଙ୍କର ଶରୀରରେ ରକ୍ତହୀନତା ଦେଖା ଦେଇଥିବାରୁ ତାଙ୍କୁ ପ୍ରଥମେ ବ୍ଲଡ୍ ଟ୍ରାନ୍ସଫ୍ୟୁଜନ୍ କରାଯାଇ ଅସ୍ତ୍ରୋପଚାର କରାଯାଇଥିଲା । ଅସ୍ତ୍ରୋପଚାର ସମୟରେ କିମ୍ବା ପରେ ତାଙ୍କ ଶରୀରରେ କୌଣସି ଜଟିଳତା ଉପୁଜି ନଥିଲା। ବର୍ତ୍ତମାନ ସେ ସମ୍ପୂର୍ଣ୍ଣ ସୁସ୍ଥ ଅଛନ୍ତି । 

ସେହିପରି ସମ୍ ହସ୍ପିଟାଲ୍ ଶୀତଳାପଲ୍ଲୀ କ୍ୟାମ୍ପସ୍‌ରେ କର୍ଣ୍ଣ, ନାସା, ଗଳା ଇତ୍ୟାଦି ସମସ୍ୟାର ମଧ୍ୟ ଅତ୍ୟାଧୁନିକ ଚିକିତ୍ସା କରାଯାଉଛି । ଜଣେ ୪୨ ବର୍ଷୀୟା ମହିଳାଙ୍କ ନାକରୁ ନିୟମିତ ରକ୍ତ ବାହାରୁ ଥିବା ସମସ୍ୟା ନେଇ ଏହି ହସ୍ପିଟାଲର ଏମର୍ଜେନ୍ସି ବିଭାଗକୁ ଆସିଥିଲେ । ରୋଗୀଙ୍କୁ ଇଏନ୍‌ଟି ସ୍ପେଶିଆଲିଷ୍ଟ ଡାକ୍ତର ପ୍ରିୟଜୀତ୍ ପାଣିଗ୍ରାହୀ ପରୀକ୍ଷା କରିବା ପରେ ଏକ ସିଟି ସ୍କାନ୍ କରିବା ନିମନ୍ତେ ପରାମର୍ଶ ଦେଇଥିଲେ । ସିଟି ସ୍କାନ୍ ରିପୋର୍ଟରେ ତାଙ୍କର ନାକରେ ବାଇଲାଟେରାଲ୍ ମାକ୍ସିଲାରୀ ସାଇନସ୍ ଥିବାର ଜଣାପଡ଼ିଥିଲା । ରୋଗୀଙ୍କର ତା’ ପରଦିନ ଏଣ୍ଡୋସ୍କୋପିକ୍ ସାଇନସ୍ ସର୍ଜରୀ କରାଯାଇଥିଲା । ସଫଳ ଅସ୍ତ୍ରୋପଚାର ପରେ ରୋଗୀ ଏବେ ସଂପୂର୍ଣ୍ଣ ସୁସ୍ଥ ଅଛନ୍ତି । 

ରୋଗୀଙ୍କୁ ଉତ୍ତମ ସ୍ୱାସ୍ଥ୍ୟସେବା ପ୍ରଦାନ କ୍ଷେତ୍ରରେ ଏହି ହସ୍ପିଟାଲ୍ ୨୪ ଘଣ୍ଟା  ପ୍ରସ୍ତୁତ ରହିଛି ବୋଲି କହିଛନ୍ତି ହସ୍ପିଟାଲ୍‌ର ନିର୍ଦ୍ଦେଶକ ଶ୍ରୀ ଦେବପ୍ରସାଦ ଦାଶ ।