ବଲିଉଡ୍ ଏବଂ ମରାଠୀ ସିନେମାର ଜଣାଶୁଣା ଅଭିନେତା ରିତେଶ ଦେଶମୁଖ ଏବେ ନିଜ ଫିଲ୍ମ 'ରାଜା ଶିବାଜୀ' (Raja Shivaji) ର ସଫଳତାକୁ ଉପଭୋଗ କରୁଛନ୍ତି । କିଛି ଦିନ ପୂର୍ବେ ଆୟୋଜିତ ଏହି ଫିଲ୍ମର ସକ୍ସେସ୍ ପାର୍ଟି (Success Party) ରେ ସଲମାନ ଖାନ୍ ମଧ୍ୟ ସାମିଲ ହୋଇଥିଲେ । କିନ୍ତୁ ଏହି ସଫଳତା ମଝିରେ ଏକ ବଡ଼ ବିବାଦ ସୃଷ୍ଟି ହୋଇଛି, ଯାହା ସୋସିଆଲ ମିଡିଆରେ ବେଶ୍ ଚର୍ଚ୍ଚାର ବିଷୟ ପାଲଟିଛି ।

ସକସେସ୍ ପାର୍ଟିର ଏକ ଭିଡିଓ ଇଣ୍ଟରନେଟ୍‌ରେ ଭାଇରାଲ ହେବାରେ ଲାଗିଛି, ଯେଉଁଥିରେ ରିତେଶ ଦେଶମୁଖ ଛତ୍ରପତି ଶିବାଜୀ ମହାରାଜଙ୍କ ନାଁ ଥିବା ଏକ ଟି-ସାର୍ଟ ପିନ୍ଧି ଡାନ୍ସ କରୁଥିବା ଦେଖିବାକୁ ମିଳିଛି । ଏହି ଭିଡିଓକୁ ନେଇ କିଛି ଲୋକ ଆପତ୍ତି ଉଠାଇବା ସହ ରିତେଶ ସେହି ସମୟରେ ମଦ୍ୟପାନ କରିଥିଲେ ବୋଲି ଅଭିଯୋଗ ଆଣିଛନ୍ତି ।

ଏବେ ଏହି ସମଗ୍ର ମାମଲାରେ ରିତେଶ ଦେଶମୁଖ ନିଜର ସ୍ପଷ୍ଟୀକରଣ ରଖିଛନ୍ତି । ସେ ସୋସିଆଲ ମିଡିଆରେ ଏକ ଲମ୍ବା ପୋଷ୍ଟ ଶେୟାର କରି କହିଛନ୍ତି ଯେ ସେ ଜୀବନରେ କେବେବି ମଦ ପିଇନାହାନ୍ତି । ଏହାସହ ଶିବାଜୀ ମହାରାଜଙ୍କ ନାଁ ଥିବା ଟି-ସାର୍ଟ ପିନ୍ଧି ନାଚିବା ନେଇ ସେ ସମସ୍ତଙ୍କୁ କ୍ଷମା ମାଗିଛନ୍ତି ଏବଂ ଟ୍ରୋଲର୍ସଙ୍କୁ କଡ଼ା ଜବାବ ଦେଇଛନ୍ତି ।

କାହିଁକି ବଦଳାଇ ନଥିଲେ ଟି-ସାର୍ଟ?

ରିତେଶ ଦେଶମୁଖ ନିଜ ଅଫିସିଆଲ ଇନଷ୍ଟାଗ୍ରାମ ଷ୍ଟୋରିରେ ମରାଠୀ ଭାଷାରେ ଏକ ଆଧିକାରୀକ ବୟାନ ଜାରି କରି ଲେଖିଛନ୍ତି:

"ମୁଁ ସମ୍ପୂର୍ଣ୍ଣ ନମ୍ରତାର ସହ ସ୍ପଷ୍ଟ କରିବାକୁ ଚାହେଁ ଯେ ଛତ୍ରପତି ଶିବାଜୀ ମହାରାଜଙ୍କ ନାଁ ଥିବା ଟି-ସାର୍ଟ ପିନ୍ଧି ଉତ୍ସବ ମନାଇବା ପଛରେ ମୋର ଉଦ୍ଦେଶ୍ୟ ତାଙ୍କୁ ଅପମାନିତ କରିବା ଆଦୌ ନଥିଲା । ସେହି ଟି-ସାର୍ଟଟିକୁ ମୁଁ ଫିଲ୍ମର ପ୍ରମୋସନାଲ କ୍ୟାମ୍ପେନ୍  ସମୟରେ ବ୍ୟବହାର କରୁଥିଲି । ସେହିଦିନ ମଧ୍ୟ ମୁଁ ସିଧାସଳଖ ପ୍ରମୋସନ କାମ ସାରି କାର୍ଯ୍ୟକ୍ରମରେ ପହଞ୍ଚିଥିଲି, ଯେଉଁଥିପାଇଁ ବ୍ୟସ୍ତତା ହେତୁ ଟି-ସାର୍ଟ ବଦଳାଇବା କଥା ମୋର ମନେ ରହିନଥିଲା ଏବଂ ମୁଁ ସେହିପରି ଇଭେଣ୍ଟକୁ ଚାଲିଯାଇଥିଲି ।"

ମଦ୍ୟପାନ ଅଭିଯୋଗକୁ ସମ୍ପୂର୍ଣ୍ଣ ପ୍ରତ୍ୟାଖ୍ୟାନ କଲେ ରିତେଶ

ଭିଡିଓ ଭାଇରାଲ ହେବା ପରେ କିଛି ୟୁଜର୍ସ ଦାବି କରିଥିଲେ ଯେ ରିତେଶ ନିଶାଗ୍ରସ୍ତ ଅବସ୍ଥାରେ ଥିଲେ । ଏହା ଉପରେ ଅଭିନେତା ଜଣକ କଠୋର ଆଭିମୁଖ୍ୟ ଗ୍ରହଣ କରି କହିଛନ୍ତି, "ମୋ ବିଷୟରେ ସୋସିଆଲ ମିଡିଆରେ ଯେଉଁସବୁ ଦାବି କରାଯାଉଛି, ସେ ସମ୍ପର୍କରେ ମୁଁ କହିବାକୁ ଚାହେଁ ଯେ, ମୁଁ ଆଜି ପର୍ଯ୍ୟନ୍ତ ମୋ ଜୀବନରେ କେବେବି ମଦ୍ୟପାନ କରିନାହିଁ କିମ୍ବା ଭବିଷ୍ୟତରେ ମଧ୍ୟ କେବେ କରିବି ନାହିଁ । ତେଣୁ ଏହି ସନ୍ଦର୍ଭରେ ଲାଗିଥିବା ସମସ୍ତ ଅଭିଯୋଗ ସମ୍ପୂର୍ଣ୍ଣ ଭିତ୍ତିହୀନ ଏବଂ ସତ୍ୟତାଠାରୁ ବହୁ ଦୂରରେ ।"

ବିନା ନିମନ୍ତ୍ରଣରେ ଭିଡିଓ ରେକର୍ଡ ହୋଇଥିଲା

ରିତେଶ ଏହା ମଧ୍ୟ ପ୍ରକାଶ କରିଛନ୍ତି ଯେ, ଏହି ଭିଡିଓ ଯେଉଁ ବ୍ୟକ୍ତିଜଣକ ରେକର୍ଡ କରିଛନ୍ତି, ତାଙ୍କୁ ଏହି ଇଭେଣ୍ଟକୁ ନିମନ୍ତ୍ରଣ କରାଯାଇନଥିଲା । ସେ କହିଛନ୍ତି ଯେ, ଏହି ଛୋଟ କାର୍ଯ୍ୟକ୍ରମଟି କେବଳ ସେହି କଳାକାର, ଟେକ୍ନିସିଆନ୍ ଏବଂ ପରଦା ପଛର ସାଥୀମାନଙ୍କୁ କୃତଜ୍ଞତା ଜଣାଇବା ପାଇଁ ରଖାଯାଇଥିଲା, ଯେଉଁମାନେ ‘ରାଜା ଶିବାଜୀ’ ଫିଲ୍ମ ପାଇଁ ସାଢ଼େ ତିନି ବର୍ଷ ଧରି ଦିନରାତି ପରିଶ୍ରମ କରିଛନ୍ତି ।

ଭାବନା ଆହତ ହୋଇଥିବାରୁ ମାଗିଲେ କ୍ଷମା

ନିଜ ପୋଷ୍ଟର ଶେଷରେ ରିତେଶ କ୍ଷମା ପ୍ରାର୍ଥନା କରି ଲେଖିଛନ୍ତି, "ଯଦି ମୋର ଏହି କାର୍ଯ୍ୟ ଯୋଗୁଁ ଅଜାଣତରେ ମଧ୍ୟ କାହାର ଭାବନା ଆହତ ହୋଇଛି, ତେବେ ମୁଁ ହୃଦୟରୁ କ୍ଷମା ମାଗୁଛି । ଛତ୍ରପତି ଶିବାଜୀ ମହାରାଜ ଆମ ସମସ୍ତଙ୍କର ଶ୍ରଦ୍ଧା, ପ୍ରେରଣା ଏବଂ ସ୍ୱାଭିମାନର ପ୍ରତୀକ ଅଟନ୍ତି । ତାଙ୍କ ପ୍ରତି ମୋ ମନରେ ଯେଉଁ ସମ୍ମାନ, ଭଲପାଇବା ଏବଂ ନିଷ୍ଠା ରହିଛି, ତାହା ସର୍ବଦା ଅଟଳ ରହିବ ।"

ରିତେଶ ନିଜର ଏହି ପୋଷ୍ଟକୁ ‘ଜୟ ଶିବରାୟ’ ଲେଖି ଶେଷ କରିଛନ୍ତି ।