ଗଜପତି: ଗଜପତି ଜିଲ୍ଲା ଆର. ଉଦୟଗିରି ଥାନା ଅଞ୍ଚଳରେ ଏକ ବଡ଼ ଧରଣର ଲୁଟ ହୋଇଛି । ଗଡ଼ର ଗାଁ ରାସ୍ତାରୁ ରୁପା ଗହଣା ଚୋରି ଘଟଣାରେ ଆର. ଉଦୟଗିରି ଥାନା ପୋଲିସ ୨ ଜଣ ଅଭିଯୁକ୍ତଙ୍କୁ ଗିରଫ କରିଛି l ଗିରଫ ଅଭିଯୁକ୍ତମାନେ ହେଲେ ଗଞ୍ଜାମ ଜିଲ୍ଲାର ଏ. ରବି ଓ ଯାଜପୁର ଜିଲ୍ଲାର ଏ. ଅଜିତ l ସେମାନଙ୍କ ଠାରୁ ୫ କେଜି ରୁପା ଓ ଗୋଟିଏ ବାଇକ ଜବତ କରାଯାଇଛି l ଏ ନେଇ ମଙ୍ଗଳବାର ଏକ ସାମ୍ବାଦିକ ସମିଳନୀରେ ସୂଚନା ଦେଇଛନ୍ତି ଗଜପତି ଏସପି ସ୍ଵାତି ଏସ କୁମାର l 

ଏସପିଙ୍କ ସୂଚନା ମୁତାବକ, ଗତ ୧୦ ତାରିଖ ସକାଳ ପ୍ରାୟ ସାଢେ ୭ ଟାରେ ମୋହନା ଥାନା ଚନ୍ଦ୍ରଗିରିର ସନ୍ତୋଷ ମହାପାତ୍ର ଗୋଟିଏ ବାଇକରେ ରୁପା ଗହଣା ବିକ୍ରି ପାଇଁ ଛେଲାଗଡ ଅଞ୍ଚଳକୁ ଯାଉଥିଲେ l ଏହି ସମୟରେ ଗଡ଼ର ଗାଁ ନିକଟରେ ୨ଜଣ ଯୁବକ ତାଙ୍କୁ ଅଟକାଇ ତାଙ୍କ ପାଖରେ ଥିବା ରୁପା ଗହଣା ବ୍ୟାଗ ଛଡାଇ ନେଇ ଫେରାର ହୋଇଯାଇଥିଲେ l ଏନେଇ ସନ୍ତୋଷ ଆର. ଉଦୟଗିରି ଥାନାରେ ଅଭିଯୋଗ କରିଥିଲେ l ବ୍ୟାଗରେ ପ୍ରାୟ ୫ କେଜିର ରୁପା ଗହଣା ଥିବା ସେ ଅଭିଯୋଗ କରିଥିଲେ l ଅଭିଯୋଗ ଅନୁଯାଇ ଥାନାରେ  ମାମଲା ରୁଜୁ କରି ତଦନ୍ତ କରୁଥିଲା ପୋଲିସ l ଶେଷରେ ପୋଲିସ ଦୁଇ ଅଭିଯୁକ୍ତଙ୍କୁ ଧରିବାରେ ସଫଳ ହୋଇଛି । 

ତେବେ ବ୍ୟବସାୟୀ ସନ୍ତୋଷ ମହାପାତ୍ର ରୂପା ଗହଣା ଫେରି ପାଇବା ପରେ ବେଶ୍ ଖୁସି ଅନୁଭବ କରିବା ସହ ପୋଲିସକୁ ଧନ୍ୟବାଦ୍ ଦେଇଚିଛନ୍ତି ।