ବାଲେଶ୍ୱର: ବାଲେଶ୍ୱର ଜିଲ୍ଲା ଭୋଗରାଇ ବ୍ଳକ ମୌନଲା ବସ୍ତିରେ ନବ ବଧୂର ସନ୍ଦେହ ଜନକ ମୃତ୍ୟୁ । ମୃତ ମହିଳା ଜଣକ ହେଲେ ସୀତାରା ଖାତୁନ । ତାଙ୍କ ସ୍ୱାମୀଙ୍କ ନାମ ସରାଫ ଖାଁ । ଯୌତୁକ ପାଇଁ ହତ୍ୟା କରାଯାଇଥିବା ନେଇ ପରିବାର ଲୋକ ଅଭିଯୋଗ କରିଛନ୍ତି । ଘଟଣା ପର ଠାରୁ ବେଳେ ଶାଶୁ ଘର ଲୋକେ ଫେରାର ଅଛନ୍ତି । 

ବାଲେଶ୍ୱର ଜିଲ୍ଲା ଭୋଗରାଇ ବ୍ଲକର ଭୋଗରାଇ ଗ୍ରାମର ମୌଲାନା ବସ୍ତିର ସରାଫ ଖାଁ ପଶ୍ଚିମବଙ୍ଗ ରାମନଗର ଥାନା ଅଧୀନ ମୁକୁନ୍ଦପୁର ଗ୍ରାମର ଲିଆଖତ ଅଲ୍ଲୀ ଖାଁଙ୍କ ଝିଅ ସୀତାରା ଖାତୁନଙ୍କୁ ମୁସଲମାନ ରୀତିନୀତି ଅନୁଯାୟୀ ୬ ମାସ ପୂର୍ବେ ବିବାହ କରିଥିଲେ l ବର ପକ୍ଷରୁ ଦାବି ମୁତାବକ ଏକ ବୁଲେଟ ଗାଡ଼ି, ୧୫୦ ଗ୍ରାମ ସୁନା ଅଳଙ୍କାର, ୫୦ ଗ୍ରାମ ରୂପା ସହ ଅନ୍ୟାନ୍ୟ ୧୦ ଲକ୍ଷ ଟଙ୍କାର ଆସବାବପତ୍ର ଦିଆଯାଇଥିଲା l ତେବେ ସୀତାରାଙ୍କର ମୃତ୍ୟୁ ହୋଇଥିବା ନେଇ ପରିବାର ଲୋକଙ୍କୁ ଖବର ଦିଆଯାଇଥିଲା । ବିବାହର କିଛିଦିନ ପରେ ନବବଧୂଙ୍କୁ ତାଙ୍କ ବାପଘରୁ ଅଧିକ ୨୦ ଲକ୍ଷ ଟଙ୍କା ଯୌତୁକ ବାବଦକୁ ଆଣିବା ନିମନ୍ତେ ଶ୍ୱଶୁର ଘର ଲୋକେ ବାରମ୍ବାର ଚାପ ପକାଉଥିଲେ ବୋଲି ପରିବାର ଲୋକ ଅଭିଯୋଗ କରିଛନ୍ତି । ସୀତାରା ଖାତୁନଙ୍କ ସ୍ୱାମୀ ସରାଫ ଖାଁ ବିଦେଶରେ ରହୁଥିବା ବେଳେ ଶାଶୁ, ଶ୍ୱଶୁର, ୩ ନଣନ୍ଦ ଓ ନଣଦେଇ ବୋହୂଙ୍କୁ ବାରମ୍ବାର ଶାରୀରିକ ଓ ମାନସିକ ନିର୍ଯ୍ୟାତନା ଦେଉଥିଲେ ବୋଲି ପରିବାର ଅଭିଯୋଗ କରିଛି । ସେମାନେ ମିଳିମିଶି ତାଙ୍କ ଝିଅକୁ ହତ୍ୟା କରିଥିବା ନେଇ ଥାନାରେ ଅଭିଯୋଗ କରିଛନ୍ତି । 

ପରିବାର ଲୋକଙ୍କୁ ନ୍ୟାୟ ନ ମିଳିବା ପର୍ଯ୍ୟନ୍ତ ପରିବାର ଲୋକେ ଶବ ନେଵ ନାହିଁ ବୋଲି ଜିଦରେ ଧରି ବସିଥିଲେ । ପୋଲିସ ବୁଝାସୁଝା କରିବା ପରେ ଶବ ବ୍ୟବଚ୍ଛେଦ କରାଯାଇ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି । ଅନ୍ୟପକ୍ଷରେ ଶାଶୁ ଘର ଲୋକେ ସମସ୍ତେ ଫେରାର ହୋଇଯାଇଥିବା ଜଣାପଡ଼ିଛି । ତେବେ ମୃତ ମହିଳାଙ୍କ ଭାଇ ରୌସନ ଖାଁଙ୍କ ଏତଲା ଆଧାରରେ ଭୋଗରାଇ ପୋଲିସ ରେ  ମାମଲା ରୁଜୁକରି ପ୍ରାଥମିକ ତଦନ୍ତ ଆରମ୍ଭ କରିଛି ।