ଲାହୋର: ପାକିସ୍ତାନର ପଞ୍ଜାବରେ ଗତ ମଙ୍ଗଳବାର ଦୁଇ ନାବାଳିକା ନିଜ ବାପାଙ୍କୁ ଜାଳି ହତ୍ୟା କରିଛନ୍ତି। ଝିଅମାନେ ଅଭିଯୋଗ କରିଛନ୍ତି ଯେ ତାଙ୍କ ବାପା ଦୁଇ ଭଉଣୀଙ୍କୁ ଯୌନ ନିର୍ଯାତନା ଦେଉଥିଲେ। ତେଣୁ ସେମାନେ ବାପାଙ୍କୁ ହତ୍ୟା କରିଥିଲେ। ଅନ୍ୟପକ୍ଷରେ ପୁଲିସ ଏବେ ଉଭୟ ଅଭିଯୁକ୍ତ ଭଉଣୀଙ୍କୁ ଗିରଫ କରିଛି। ମୃତକଙ୍କ ଦୁଇ ପତ୍ନୀଙ୍କ ବୟାନ ରେକର୍ଡ କରାଯାଇଛି। ବୁଧବାର ପୁଲିସ ଏହି ସୂଚନା ଦେଇଛି। 

ସହରର ଜଣେ ବରିଷ୍ଠ ପୁଲିସ ଅଧିକାରୀ ରିଜୱାନ ତାରିକ୍ ଗଣମାଧ୍ୟମକୁ କହିଛନ୍ତି ଯେ ଯୌନ ନିର୍ଯାତନାର ପ୍ରତିଶୋଧ ନେବା ପାଇଁ ସେ ଏହି ପଦକ୍ଷେପ ନେଇଛନ୍ତି। ଲାହୋରଠାରୁ ପ୍ରାୟ ୮୦ କିଲୋମିଟର ଦୂର ଗୁଜରାନୱାଲାର ମୋଗଲ ଛକରେ ସୋମବାର ଏହି ଘଟଣା ଘଟିଛି। ୪୮ ବର୍ଷୀୟ ଅଲ୍ଲୀ ଆକବରଙ୍କର ତିନୋଟି ବିବାହ ଥିଲା ଏବଂ ସେମାନଙ୍କ ସହିତ ତାଙ୍କର ୧୦ଟି ସନ୍ତାନ ଥିଲେ ଏବଂ ଆକବରଙ୍କ ପ୍ରଥମ ପତ୍ନୀଙ୍କର ଦେହାନ୍ତ ହୋଇଥିଲା ଏବଂ ଦୁଇ ପତ୍ନୀ ଓ ପିଲା ଏକ ଭଡ଼ା ଘରେ ରହୁଥିଲେ।

ପୁଲିସ ସୂଚନା ଅନୁଯାୟୀ, ଆକବର ସୋମବାର ଶୋଇଥିବା ବେଳେ ତାଙ୍କ ଉପରକୁ ପେଟ୍ରୋଲ ଢାଳି ୧୨ ଓ ୧୫ ବର୍ଷୀୟ ଝିଅ ନିଆଁ ଲଗାଇ ଦେଇଥିଲେ। ସେ ଗୁରୁତର ଭାବେ ଜଳିଯାଇଥିବାରୁ ତାଙ୍କୁ ଡାକ୍ତରଖାନା ନିଆଯାଇଥିଲା, ଯେଉଁଠାରେ ତାଙ୍କର ମୃତ୍ୟୁ ଘଟିଥିଲା। ଦୁଇ ନାବାଳିକାଙ୍କୁ ଅଟକ ରଖାଯାଇଥିଲା ଏବଂ ସେମାନେ ପୁଲିସକୁ ଦେଇଥିବା ବୟାନରେ କହିଛନ୍ତି ଯେ ସେମାନଙ୍କ ବାପା ସେମାନଙ୍କୁ ଯୌନ ନିର୍ଯାତନା ଦେଉଥିଲେ। 

ଅଭିଯୁକ୍ତମାନେ କହିଛନ୍ତି, ଆମେ ଦୁହେଁ ମୋ ବାପାଙ୍କୁ ହତ୍ୟା କରିବାକୁ ଯୋଜନା କରିଥିଲୁ। ଏଥି ସହିତ ଯୌନ ନିର୍ଯାତନାର ପ୍ରତିଶୋଧ ନେଇଥିଲୁ। ଆମେ ବାଇକ୍ରୁ ପେଟ୍ରୋଲ୍ ନେଇ ନିଆଁ ଲଗାଇବା ପୂର୍ବରୁ ସେମାନଙ୍କ ଉପରେ ସିଞ୍ଚନ କରିଥିଲୁ। ହତ୍ୟା ମାମଲା ରୁଜୁ କରିବା ପୂର୍ବରୁ ମୃତକଙ୍କ ଦୁଇ ପତ୍ନୀଙ୍କ ବୟାନ ରେକର୍ଡ କରାଯାଇଥିବା ପୁଲିସ କହିଛି।

ଦୁଇ ସାବତ ଭଉଣୀ ପୁଲିସକୁ କହିଛନ୍ତି ଯେ ତାଙ୍କ ବାପା ଏକ ବର୍ଷ ଧରି ବଡ଼ ଝିଅକୁ ଦୁଷ୍କର୍ମ କରୁଥିଲେ ଏବଂ ସାନ ଝିଅକୁ ଦୁଇଥର ଦୁଷ୍କର୍ମ କରିବାକୁ ଚେଷ୍ଟା କରିଥିଲେ। ଖାଲି ସେତିକି ନୁହେଁ, ସେମାନଙ୍କ ମା' ଏସବୁ ଜାଣିଥିଲେ। ଜଣେ ପତ୍ନୀଙ୍କୁ ମଧ୍ୟ ଗିରଫ କରାଯାଇଥିବା ବେଳେ ଅନ୍ୟ ଜଣଙ୍କୁ ପଚରାଉଚରା କରାଯାଉଛି। କିଛି ଦିନ ମଧ୍ୟରେ ସେମାନଙ୍କୁ କୋର୍ଟ ଚାଲାଣ କରାଯିବ ବୋଲି ପୁଲିସ କହିଛି।

ଅଧିକ ପଢ଼ନ୍ତୁ: ଭାରତ-ବାଂଲାଦେଶ ସୀମାରେ ଅନୁପ୍ରବେଶ ହେବନି ସହଜ!