ପାଟଣା: ବିହାରର ବେଗୁସରାଇରୁ ଏକ ବଡ଼ ଖବର ସାମ୍ନାକୁ ଆସୁଛି, ଯେଉଁଠି ଗୋଟିଏ ପରିବାରର ୫ ଜଣ ସଦସ୍ୟଙ୍କୁ ଶୁକ୍ରବାର ବିଳମ୍ବିତ ରାତିରେ ଏକ ଧାରୁଆ ଅସ୍ତ୍ରରେ ପ୍ରାଣାନ୍ତକ ଆକ୍ରମଣ କରାଯାଇଛି। ଏହି ଘଟଣାରେ ସ୍ୱାମୀ, ସ୍ତ୍ରୀ ଓ ଝିଅଙ୍କୁ ଗଳା କାଟି ହତ୍ୟା କରାଯାଇଛି। ଗୋଟିଏ ପୁଅର ଅବସ୍ଥା ସଙ୍କଟାପନ୍ନ ଥିବା ବେଳେ ଗୋଟିଏ ପୁଅ କୌଣସି ପ୍ରକାରେ ଜୀବନ ବଞ୍ଚାଇ ପଳାଇବାରେ ସକ୍ଷମ ହୋଇଛି। ଘଟଣାଟି ହେଉଛି ବଚୱାରା ଥାନା ଅନ୍ତର୍ଗତ ରସିଦପୁର ଚିରଞ୍ଜୀବୀପୁରସ୍ଥିତ ୧୨ ନମ୍ବର ୱାର୍ଡରେ। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି। ଆହତ ପୁଅକୁ ଚିକିତ୍ସା ପାଇଁ ପିଏସସିରେ ଭର୍ତ୍ତି କରାଯାଇଥିବା ବେଳେ ତାଙ୍କ ଅବସ୍ଥା ସଙ୍କଟାପନ୍ନ ରହିଛି। 

ପୁଲିସର ସୂଚନା ଅନୁଯାୟୀ, ସଞ୍ଜୀବନ ମାହାତୋ ତାଙ୍କ ପରିବାର ସହ ଘରେ ଶୋଇଥିବା ବେଳେ ଦୁର୍ବୃତ୍ତମାନେ ଘରେ ପଶିଥିଲେ। ଧାରୁଆ ଅସ୍ତ୍ରରେ ସ୍ୱାମୀ-ସ୍ତ୍ରୀ, ପୁଅ ଓ ଝିଅଙ୍କ ବେକ କାଟି ଦେଇଥିଲେ, ଯେଉଁଥିରେ ସ୍ୱାମୀ-ସ୍ତ୍ରୀ ଓ ଝିଅଙ୍କ ମୃତ୍ୟୁ ଘଟିଥିବା ବେଳେ ଜଣେ ପୁଅ ଗୁରୁତର ଆହତ ହୋଇଛନ୍ତି।

ଘଟଣା ସମ୍ପର୍କରେ ସ୍ଥାନୀୟ ଲୋକେ ପୁଲିସକୁ ଖବର ଦେଇଥିଲେ। ପୁଲିସ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଚଳାଇଛି। କୁହାଯାଉଛି ଯେ ସଞ୍ଜୀବନ ମାହାତୋଙ୍କର ଦୁଇଟି ବିବାହ ହୋଇଥିଲା। ପାରିବାରିକ ଶତ୍ରୁତାକୁ କେନ୍ଦ୍ର କରି ଅଭିଯୁକ୍ତମାନେ ଏହି ବଡ଼ ଘଟଣା ଘଟାଇଥିବା ଗ୍ରାମବାସୀ କହିଛନ୍ତି। ଏହା ମଧ୍ୟ କୁହାଯାଉଛି ଯେ ଅଭିଯୁକ୍ତମାନେ ସମସ୍ତ ଲୋକଙ୍କ ଶରୀରରେ ଏସିଡ୍ ଢାଳିଛନ୍ତି। ଯଦିଓ ପୁଲିସ ଏ ପର୍ଯ୍ୟନ୍ତ ଏହି ଘଟଣାକୁ ନିଶ୍ଚିତ କରିନାହିଁ, କିନ୍ତୁ ଘଟଣାର ପ୍ରକୃତ କାରଣ ଜଣାପଡ଼ିନାହିଁ। ପୁଲିସ ଘଟଣାର ତଦନ୍ତ ଜାରି ରଖିଥିବା ବେଳେ ଅଧିକାରୀଙ୍କ ସ୍ପଷ୍ଟୀକରଣ ପରେ ହିଁ ଘଟଣାର ପ୍ରକୃତ କାରଣ ଜଣାପଡ଼ିବ।  ଏହି ଘଟଣା ପରେ ସମଗ୍ର ଅଞ୍ଚଳରେ ଆତଙ୍କର ବାତାବରଣ ସୃଷ୍ଟି ହୋଇଛି।  

ସୂଚନାଯୋଗ୍ୟ ଗତ ଜୁଲାଇ ୧୫ରେ ଦରଭଙ୍ଗାରେ ଏଭଳି ଏକ ଘଟଣା ସାମ୍ନାକୁ ଆସିଥିଲା, ଯେଉଁଠାରେ ଭିଆଇପି ପାର୍ଟିର ରାଷ୍ଟ୍ରୀୟ ସଭାପତି ମୁକେଶ ସାହାନୀଙ୍କ ପିତାଙ୍କୁ ଶୋଇଥିବା ସମୟରେ ଧାରୁଆ ଅସ୍ତ୍ରରେ ହତ୍ୟା କରାଯାଇଥିଲା। ଖଣ୍ଡବିଖଣ୍ଡିତ ମୃତଦେହ ଘର ଭିତରୁ ମିଳିବା ପରେ ବିରୋଧୀ ଏହି ଘଟଣାକୁ ନେଇ ସରକାରଙ୍କୁ ତୀବ୍ର ନିନ୍ଦା କରିଛନ୍ତି।