ହରିଦ୍ବାର: ଉତ୍ତରାଖଣ୍ଡରେ ହରିୟାଣାର ୪ ଜଣ କାଉଁଡିଆଙ୍କୁ ପାର୍କିଂ ଶୁଳ୍କ ନେଇ ଉପୁଜିଥିବା ବିବାଦ ପରେ ଗିରଫ କରାଯାଇଛି। ଅଭିଯୁକ୍ତମାନେ ପାର୍କିଂ କର୍ମଚାରୀଙ୍କୁ ଖଣ୍ଡାରେ ଆକ୍ରମଣ କରିଥିବା ନେଇ ଅଭିଯୋଗ ହୋଇଛି। ସ୍ଥାନୀୟ ପୁଲିସ ରବିବାର ଏହି ସୂଚନା ଦେଇଛି। ପୁଲିସ କହିବା ଅନୁସାରେ ନୀଳକଣ୍ଠ ମନ୍ଦିର ନିକଟରେ ଜାନକୀ ପୋଲ ପାର୍କିଂରେ ଶନିବାର ସନ୍ଧ୍ୟାରେ ଏହି ବିବାଦ ଦେଖାଯାଇଥିଲା। କାଉଁଡିଆମାନଙ୍କ ଆକ୍ରମଣରେ ପାର୍କିଂସ୍ଥଳର ଜଣେ କର୍ମଚାରୀ ଆହତ ହୋଇଥିଲେ। ତାଙ୍କ ମୁଣ୍ଡରେ ଆଘାତ ଲାଗିଥିଲା। ଥାନା ପ୍ରଭାରୀ ରିତେଶ ଶାହ କହିଛନ୍ତି, ଅଭିଯୁକ୍ତମାନେ ନିଜର ଟ୍ରାକ୍ଟର ଟ୍ରଲି ରଖିଥିଲେ। ଯେତେବେଳେ ସେମାନେ ଶୁଳ୍କ ମାଗିଲେ, ଆକ୍ରମଣ କରିଥିଲେ।
ପୁଲିସ କହିଛି, କାଉଁଡିଆମାନେ ମନ୍ଦିର ଦର୍ଶନ କରିବା ପରେ ପାର୍କିଂସ୍ଥଳକୁ ଯାଇଥିଲେ। ସେଠାରେ ବାଲମ ସିଂହ ବିଷ୍ଟ, ଅଜୟ ଓ ସୁଭାଷ ପାର୍କିଂ ଶୁଳ୍କ ମାଗିଥିଲେ। କିନ୍ତୁ ଅଭିଯୁକ୍ତମାନେ ଶୁଳ୍କ ଦେବାକୁ ମନା କରିଥିଲେ। ଏହାକୁ ନେଇ ୨ ପକ୍ଷ ମଧ୍ୟ ଯୁକ୍ତିତର୍କ ହୋଇଥିଲା। ଅଭିଯୁକ୍ତମାନେ ବିଷ୍ଟଙ୍କ ଉପରେ ଆକ୍ରମଣ କରିଥିଲେ। ଏଥିରେ ବିଷ୍ଟ ଆହତ ହୋଇଥିଲେ। ତାଙ୍କୁ ସାଥୀମାନେ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରିଥିଲେ।
ଶାହ କହିଛନ୍ତି ପାର୍କିଂ ସ୍ଥଳର ଠିକାଦାର ରାହୁଲ ଗୁପ୍ତାଙ୍କ ଅଭିଯୋଗ ଆଧାରରେ ମାମଲା ରୁଜୁ କରାଯାଇଛି। ମହନ୍ତ ସୌରଭ ଗିରି ନାଗା ବାବା (୪୦), ଦିବ୍ୟା ଓରଫ ଦୀପୁ (୧୯), ରାଜତ (୧୯) ଓ ଅରୁଣ (୧୮)ଙ୍କୁ ଗିରଫ କରାଯାଇଛି। ଏମାନେ ସମସ୍ତେ ସୋନିପତ ନିବାସୀ ଅଟନ୍ତି।