ନୂଆଦିଲ୍ଲୀ: ୨୦୨୬ ଟି୨୦ ବିଶ୍ଵକପ୍ ଆରମ୍ଭ ହେବାକୁ ଆଉ ମାତ୍ର ଚାରି ଦିନ ବାକି ରହିଛି। ପୂରା କ୍ରିକେଟ୍ ଜଗତ ଏହି ଟୁର୍ଣ୍ଣାମେଣ୍ଟକୁ ଚାତକ ପରି ଚାହିଁ ରହିଛି। କ୍ରିକେଟ୍ ପ୍ରେମୀଙ୍କ  ମଧ୍ୟରେ ଉତ୍ସାହ ଲାଗି ରହିଛି। ଫେବୃଆରୀ ୭ ତାରିଖ ଉଦଘାଟନୀ ଦିନରେ ତିନୋଟି ମ୍ୟାଚ୍ ଖେଳାଯିବ। ଏହି ବିଶ୍ଵକପ୍ ଭାରତୀୟ ଖେଳାଳିଙ୍କ ଦ୍ଵାରା ପରିପୂର୍ଣ୍ଣ। ପ୍ରାୟ ୪୦ ଜଣ ଭାରତୀୟ ଖେଳାଳି ବିଭିନ୍ନ ଦଳ ପାଇଁ ଖେଳୁଥିବାର କ୍ରିକେଟ୍ ପ୍ରେମୀ ଦେଖିବାକୁ ପାଇବେ। 

ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ଭାରତୀୟ ବଂଶୋଦ୍ଭବ ଖେଳାଳିମାନେ ଏବେ ଭାରତରେ ସେମାନଙ୍କର ପ୍ରତିଭା ପ୍ରଦର୍ଶନ କରିବେ। ବିଦେଶୀ ଦଳଗୁଡ଼ିକ ମଧ୍ୟରେ, ଆମେରିକା, କାନାଡା ଏବଂ ୟୁଏଇ ୨୩ ଜଣ ଭାରତୀୟ ଖେଳାଳିଙ୍କ ଘର। ମୁମ୍ବାଇରେ ଜନ୍ମିତ ଆମେରିକୀୟ ଦ୍ରୁତ ବୋଲର ସୌରଭ ନେତ୍ରଭାଲକରଙ୍କ ଭଳି ଖେଳାଳିଙ୍କ ପାଇଁ  ୱାଙ୍ଖେଡେ ଷ୍ଟାଡିୟମରେ ଭାରତ ବିପକ୍ଷରେ ଖେଳିବା ଏକ ସ୍ମରଣୀୟ ମୁହୂର୍ତ୍ତ ହେବ। ସେ ଯେଉଁ ଦେଶରେ ଜନ୍ମଗ୍ରହଣ କରିଥିଲେ ସେହି ଦେଶ ପାଇଁ ଖେଳିପାରି ନଥାନ୍ତେ, କିନ୍ତୁ ସେ ଏବେ ନିଜ ଦେଶ ପାଇଁ ଖେଳିବେ।

୨୦୨୬ ଆଇସିସି ଟି୨୦ ବିଶ୍ଵକପ୍ ପାଇଁ କାନାଡା ଦଳରେ ମୋଟ ୧୧ ଜଣ ଭାରତୀୟ ଖେଳାଳି ଅଛନ୍ତି। ଆମେରିକା ଦଳରେ ନଅ ଜଣ ଭାରତୀୟ, ଓମାନ ଦଳରେ ସାତ ଜଣ ଭାରତୀୟ ଏବଂ ୟୁଏଇ ଦଳରେ ସାତ ଜଣ ଭାରତୀୟ ବଂଶୋଦ୍ଭବ ଖେଳାଳି ଅଛନ୍ତି। ସମସ୍ତ ବିଦେଶୀ ଦଳ ସମେତ ପ୍ରାୟ ୪୦ ଜଣ ଭାରତୀୟ କ୍ରିକେଟର ଏହି ବିଶ୍ଵକପରେ ବିଭିନ୍ନ ଦଳ ପାଇଁ ଖେଳିବାର ଦେଖାଯିବେ।

୨୦୨୬ ଟି-୨୦ ବିଶ୍ଵକପରେ ମୋଟ ୨୦ ଦଳ ଅଂଶଗ୍ରହଣ କରୁଛନ୍ତି। ଏହି ଦଳଗୁଡ଼ିକୁ ଚାରିଟି ଗ୍ରୁପରେ ବିଭକ୍ତ କରାଯାଇଛି, ପ୍ରତ୍ୟେକ ଗ୍ରୁପରେ ପାଞ୍ଚଟି ଦଳ ରହିଛନ୍ତି। ପ୍ରତ୍ୟେକ ଗ୍ରୁପରେ ଥିବା ଦଳଗୁଡ଼ିକ ପ୍ରଥମେ ପରସ୍ପର ବିପକ୍ଷରେ ଖେଳିବେ ଏବଂ ଏଥିରୁ ୮ଟି ଟିମ୍ ସୁପର-୮ରେ ପ୍ରବେଶ କରିବେ। ମାର୍ଚ୍ଚ ୮ ତାରିଖରେ ଫାଇନାଲ ଖେଳାଯିବ। ବାଂଲାଦେଶ ଏହି ବିଶ୍ଵକପରେ ଅଂଶଗ୍ରହଣ କରୁନାହିଁ। ଆଇସିସି ବାଂଲାଦେଶ  ସ୍ଥାନରେ ସ୍କଟଲାଣ୍ଡକୁ ସାମିଲ କରିଛି। ଫେବୃଆରୀ ୧୫ରେ ଭାରତ ବିପକ୍ଷରେ ଲିଗ୍ ପର୍ଯ୍ୟାୟ ମ୍ୟାଚ୍ ବର୍ଜନ କରିବାକୁ ପାକିସ୍ତାନ ଘୋଷଣା କରିଛି।