ନୂଆଦିଲ୍ଲୀ: ଭାରତୀୟ ରାଜନୀତିରେ ଆଜି ଏକ ଐତିହାସିକ ଦିନ। ପଶ୍ଚିମବଙ୍ଗ ପରେ ଏବେ କେରଳରେ ମଧ୍ୟ ବାମପନ୍ଥୀ ଶାସନର ପତନ ଘଟିବାକୁ ଯାଉଛି। ସଦ୍ୟତମ ଟ୍ରେଣ୍ଡ ଅନୁଯାୟୀ, କେରଳରେ ମୁଖ୍ୟମନ୍ତ୍ରୀ ପିନରାୟୀ ବିଜୟନଙ୍କ ନେତୃତ୍ୱାଧୀନ ବାମ ଗଣତାନ୍ତ୍ରିକ ସାମ୍ମୁଖ୍ୟ (LDF) ପଛରେ ପଡ଼ିଥିବା ବେଳେ କଂଗ୍ରେସ ନେତୃତ୍ୱାଧୀନ ୟୁଡିଏଫ (UDF) ବଡ଼ ବିଜୟ ଆଡ଼କୁ ଅଗ୍ରସର ହେଉଛି।

ଶାସନ ପରିବର୍ତ୍ତନ

କେରଳର ପରମ୍ପରା ଅନୁଯାୟୀ ପ୍ରତି ୫ ବର୍ଷରେ ସରକାର ବଦଳିଥାଏ, କିନ୍ତୁ ୨୦୨୧ରେ ଏଲଡିଏଫ୍ ଏହି ଧାରା ଭାଙ୍ଗି କ୍ରମାଗତ ଦ୍ୱିତୀୟ ଥର ଜିତିଥିଲା। ଏବେ ୨୦୨୬ରେ ପୁଣିଥରେ ସତ୍ତା ପରିବର୍ତ୍ତନର ସଙ୍କେତ ମିଳୁଛି। କଂଗ୍ରେସ ମେଣ୍ଟ(UDF) ବର୍ତ୍ତମାନ ବହୁମତ ସଂଖ୍ୟା ୭୧ (୧୪୦ଟି ଆସନ ମଧ୍ୟରୁ) ଅତିକ୍ରମ କରି ୮୦ରୁ ଅଧିକ ଆସନରେ ଆଗୁଆ ରହିଛି। ଧର୍ମଦମ ନିର୍ବାଚନ ମଣ୍ଡଳୀରୁ ମୁଖ୍ୟମନ୍ତ୍ରୀ ପିନରାୟୀ ବିଜୟନ ମଧ୍ୟ ପଛୁଆ ରହିଥିବା ସୂଚନା ମିଳୁଛି, ଯାହା ବାମପନ୍ଥୀ କର୍ମକର୍ତ୍ତାଙ୍କୁ ଚକିତ କରିଦେଇଛି।ବିଜେପି ମଧ୍ୟ କେରଳରେ ନିଜର ଭୋଟ୍ ପ୍ରତିଶତ ବଢ଼ାଇବା ସହ କିଛି ଗୁରୁତ୍ୱପୂର୍ଣ୍ଣ ଆସନରେ କଡ଼ା ଟକ୍କର ଦେଉଛି।

ବାମପନ୍ଥୀଙ୍କ ପାଇଁ ଏକ ଯୁଗର ଅନ୍ତ

ଯଦି କେରଳରେ ଏଲଡିଏଫ୍ ହାରିଯାଏ, ତେବେ ଏହା ସାରା ଭାରତରେ ବାମପନ୍ଥୀ ଶାସନର ଏକ ପ୍ରକାର ଶେଷ ବୋଲି କୁହାଯିବ।

ପଶ୍ଚିମବଙ୍ଗ: ୩୪ ବର୍ଷର ଶାସନ ପରେ ୨୦୧୧ରେ ବାମପନ୍ଥୀମାନେ ବେଙ୍ଗଲ ହରାଇଥିଲେ। ଆଜିର ଫଳାଫଳରେ ସେଠାରେ ବିଜେପି ବହୁମତ ପାଇଥିବା ବେଳେ ବାମପନ୍ଥୀ ଶୂନ୍ୟରେ ସୀମିତ ଅଛନ୍ତି।

ତ୍ରିପୁରା: ୨୦୧୮ରେ ବିଜେପି ସେଠାରେ ବାମପନ୍ଥୀଙ୍କୁ କ୍ଷମତାଚ୍ୟୁତ କରିଥିଲା।

କେରଳ: ଏହା ହେଉଛି ଦେଶର ଶେଷ ପ୍ରମୁଖ ରାଜ୍ୟ ଯେଉଁଠାରେ ବାମପନ୍ଥୀ ଶାସନ ଥିଲା। ଏହି ପରାଜୟ ସିପିଆଇଏମ (CPI-M) ପାଇଁ ଜାତୀୟ ସ୍ତରରେ ଏକ ବଡ଼ ସଙ୍କଟ ସୃଷ୍ଟି କରିବ।

କାହିଁକି ହେଲା ଏହି ବିପର୍ଯ୍ୟୟ?

ରାଜନୈତିକ ସମୀକ୍ଷକଙ୍କ ଅନୁଯାୟୀ, କେରଳରେ ଦୁର୍ନୀତି ଅଭିଯୋଗ, ସରକାର ବିରୋଧୀ ହାୱା ଏବଂ ବେକାରୀ ସମସ୍ୟା ହିଁ ଏଲଡିଏଫର ପରାଜୟର ମୁଖ୍ୟ କାରଣ ସାଜିଛି। ଅନ୍ୟପଟେ, ୱାୟାନାଡ୍‌ରେ କଂଗ୍ରେସର ପ୍ରଭାବ ଏବଂ ରାହୁଲ ଗାନ୍ଧୀଙ୍କ ସକ୍ରିୟତା ୟୁଡିଏଫକୁ ଫାଇଦା ଦେଇଛି।