ଭୁୁବନେଶ୍ୱର: ବରିଷ୍ଠ ବିଜେପି ବିଧାୟକ ଜୟନାରାୟଣ ମିଶ୍ରଙ୍କ ବିସ୍ଫୋରକ ବୟାନ । ଗୋଟିଏ ହୁଇସିଲରେ ବିଜେଡି ଭାଙ୍ଗିଯିବ । ପ୍ରମିଳା ମଲ୍ଲିକଙ୍କ ୧୪୦ ସିଟ୍ ଜିତିବା ମନ୍ତବ୍ୟରେ ପ୍ରତିକ୍ରିୟା ରଖି ସମ୍ବଲପୁରର ବିଧାୟକ ଏହା କହିଛନ୍ତି । ଆମ ଉପରେ କିଛି କହିବା ଆଗରୁ ବିଜେଡି ଆଗେ ନିଜ ଘର କଥା ବୁଝୁ । 

ଜୟନାରାୟଣ କହିଛନ୍ତି, ୧୪୦ତ ଅଲଗା କଥା, ୪୦ ସିଟରେ ଜିତିକି ଦେଖାନ୍ତୁ । ବିଜେଡି ଆଗାମୀ ଦିନରେ ରହିବ କି ନାହିଁ ସେକଥା ଚିନ୍ତା କରନ୍ତୁ । ତାଙ୍କର ୨ ସାଂସଦ ଆମ ଦଳକୁ ଆସିଲେଣି । ଜିଲ୍ଲାସ୍ତରରେ ଗଣ୍ଡଗୋଳ ଚାଲିଛି । ବିଜେଡିକୁ କିଭଳି ସମ୍ଭାଳି କରି ରଖିବେ ସେ କଥା ଆଗେ ଚିନ୍ତା କରନ୍ତୁ । ଆଜି ଗୋଟିଏ ହୁଇସିଲ୍ ମାରିଲେ ବିଜେଡି ଭାଙ୍ଗିଯିବ । ଆଜି ନିର୍ବାଚନ ହେଲେ ବିଜେଡି ୧୪୦ ସିଟ୍ ଜିତିବ ବୋଲି ପ୍ରମିଳା କହିଥିଲେ । 

ସୂଚନାଯୋଗ୍ୟ, ନିର୍ବାଚନ  ହାରିବା ପରଠୁ ବିଜେଡିରେ ଆଭ୍ୟନ୍ତରୀଣ କନ୍ଦଳ ବଢିବାରେ ଲାଗିଛି । ଜିଲ୍ଲାସ୍ତରରେ ଗଣ୍ଡଗୋଳ ଚାଲିଛି । ଅନେକ ବରିଷ୍ଠ ନେତା ଦଳର କାର୍ଯ୍ୟଶୈଳୀକୁ ନେଇ ପ୍ରଶ୍ନ ଉଠାଇବା ସହ ଦଳ ନିର୍ବାଚନ କାହିଁକି ହାରିଲା ଦଳ ସୁପ୍ରିମୋକୁ ତାର ଆଇନା ଦେଖାଇଛନ୍ତି । ଏମିତି ସ୍ଥିତିରେ ବରିଷ୍ଠ ବିଜେଡି ନେତ୍ରୀ ପ୍ରମିଳା ମଲ୍ଲିକ କହିଛନ୍ତି ଆଜି ସମୟରେ ନିର୍ବାଚନ ହେଲେ ବିଜେଡି ରାଜ୍ୟରେ ୧୪୦ ସିଟ୍ ଜିତିବ । ଆଉ ତାଙ୍କୁ ମୁହଁତୋଡ ଜବାବ ଦେଇଛନ୍ତି ବରିଷ୍ଠ ବିଜେପି ନେତା ଜୟ ନାରାୟଣ ମିଶ୍ର ।