ସଂସଦ 'ବନ୍ଦେ ମାତରମ୍' ବିଲ୍କୁ ମଞ୍ଜୁରୀ ପ୍ରଦାନ କରିଛନ୍ତି, ଯାହା ଫଳରେ ଜାତୀୟ ଗୀତର ଅପମାନ କରିବା ଏବେ ଏକ ଅପରାଧିକ ମାମଲା ଭାବେ ଗଣ୍ୟ ହେବ। ଏହି ନୂତନ ଆଇନ ଅନୁଯାୟୀ, 'ବନ୍ଦେ ମାତରମ୍'ର ଅନାଦର କରିବା, ଏଥିରେ ବାଧା ସୃଷ୍ଟି କରିବା କିମ୍ବା ଶୃଙ୍ଖଳା ଭଙ୍ଗ କରିବା ଦ୍ୱାରା ୩ ବର୍ଷ ପର୍ଯ୍ୟନ୍ତ ଜେଲ୍ ଦଣ୍ଡ, ଜରିମାନା କିମ୍ବା ଉଭୟ ଦଣ୍ଡର ପ୍ରାବଧାନ ରହିଛି।

ସଂସଦ ବୁଧବାର ଦିନ ଜାତୀୟ ଗୀତ 'ବନ୍ଦେ ମାତରମ୍'ର ଅପମାନକୁ କ୍ରିମିନାଲ୍ (ଅପରାଧିକ) ମାମଲା ଭାବେ ଗ୍ରହଣ କରୁଥିବା ବିଲ୍କୁ ପାରିତ କରିଛନ୍ତି। ରାଜ୍ୟସଭାରେ ପାରିତ ହେବା ପରେ, ଗୁରୁବାର ଦିନ ଲୋକସଭାରେ ସାମାନ୍ୟ ଆଲୋଚନା ଓ ହଙ୍ଗାମା ମଧ୍ୟରେ ଏହି ବିଲ୍ଟି ପାରିତ ହୋଇଛି। ଏହି ବିଲ୍— "ଦି ପ୍ରିଭେନସନ୍ ଅଫ୍ ଇନ୍ସଲ୍ଟସ୍ ଟୁ ନ୍ୟାସନାଲ୍ ଅନର (ଏମେଣ୍ଡମେଣ୍ଟ) ବିଲ୍, ୨୦୨୬" ଗୋଟିଏ ଦିନ ପୂର୍ବରୁ ରାଜ୍ୟସଭାରୁ ପାସ୍ ହୋଇସାରିଥିଲା। ଲୋକସଭାରେ ଏହା ପାରିତ ହେବା ସହ ପ୍ରସ୍ତାବିତ ସଂଶୋଧନ ଏବେ ଆଇନରେ ପରିଣତ ହେବା ନିକଟତର ହୋଇଛି।

ଲୋକସଭାରେ, NEET ପେପର ଲିକ୍ ବିରୋଧରେ ବିକ୍ଷୋଭ କରୁଥିବା ଛାତ୍ରଛାତ୍ରୀଙ୍କ ଉପରେ ପୋଲିସ କାର୍ଯ୍ୟାନୁଷ୍ଠାନକୁ ନେଇ ଆଲୋଚନା ଦାବି କରୁଥିବା ବିରୋଧୀ ସଦସ୍ୟଙ୍କ ପ୍ରବଳ ହଙ୍ଗାମା ମଧ୍ୟରେ ବିଲ୍ଟି ଭଏଓ୍ ଭୋଟ୍ ଦ୍ୱାରା ପାରିତ ହୋଇଥିଲା। ଗୃହରେ ସାଂସଦୀୟ କାର୍ଯ୍ୟ ଚାଲିଥିବା ସମୟରେ ବିରୋଧୀଙ୍କ ଶୋରଗୋଳ ଜାରି ରହିଥିଲା।

ବନ୍ଦେ ମାତରମ୍ ବିଲ୍କୁ ସଂସଦରୁ ମିଳିଲା ସ୍ୱୀକୃତି

ଏହି ଆଇନ, 'ନ୍ୟାସନାଲ୍ ଅନର ଆକ୍ଟ, ୧୯୭୧' (ଜାତୀୟ ସମ୍ମାନ ଅପମାନ ପ୍ରତିରୋଧ ଆଇନ)ରେ ପରିବର୍ତ୍ତନ ଆଣି ଜାତୀୟ ଗୀତ 'ବନ୍ଦେ ମାତରମ୍'କୁ ଏହାର ପରିସରଭୁକ୍ତ କରିବାକୁ ଲକ୍ଷ୍ୟ ରଖିଛି। ବର୍ତ୍ତମାନ ଏହି ଆଇନ ଅଧୀନରେ ସମ୍ବିଧାନ, ଜାତୀୟ ପତାକା ଏବଂ ଜାତୀୟ ସଙ୍ଗୀତ ଭଳି ଜାତୀୟ ପ୍ରତୀକଗୁଡ଼ିକର ଅପମାନ କଲେ ୩ ବର୍ଷ ପର୍ଯ୍ୟନ୍ତ ଜେଲ୍ ଦଣ୍ଡର ବ୍ୟବସ୍ଥା ରହିଛି। ଏହା ଲାଗୁ ହେବା ପରେ, 'ବନ୍ଦେ ମାତରମ୍' ଗାନ ସମୟରେ ଅନାଦର କରିବା, ବାଧା ପହଞ୍ଚାଇବା କିମ୍ବା ଗୋଳମାଳ କଲେ ସମାନ ଦଣ୍ଡ — ୩ ବର୍ଷ ପର୍ଯ୍ୟନ୍ତ ଜେଲ୍, ଜରିମାନା କିମ୍ବା ଉଭୟ ଭୋଗିବାକୁ ପଡ଼ିବ।

କେନ୍ଦ୍ର ସରକାରଙ୍କ ଦ୍ୱାରା 'ବନ୍ଦେ ମାତରମ୍'ର ୧୫୦ତମ ଜୟନ୍ତୀ ପାଳନ କରିବାର ପ୍ରୟାସର ଏହା ଏକ ପ୍ରମୁଖ ଅଂଶ। 'ବନ୍ଦେ ମାତରମ୍'କୁ ୧୮୭୫ ମସିହାରେ ବଙ୍କିମ ଚନ୍ଦ୍ର ଚଟ୍ଟୋପାଧ୍ୟାୟ ଲେଖିଥିଲେ ଏବଂ ଏହା ପ୍ରଥମ କରି ୧୮୮୨ ମସିହାରେ ତାଙ୍କ ଉପନ୍ୟାସ 'ଆନନ୍ଦମଠ'ରେ ପ୍ରକାଶିତ ହୋଇଥିଲା। ଗତ କିଛି ମାସ ମଧ୍ୟରେ, କେନ୍ଦ୍ର ସରକାର ସରକାରୀ କାର୍ଯ୍ୟକ୍ରମଗୁଡ଼ିକରେ ଜାତୀୟ ଗୀତ ଗାନ କରିବା ନେଇ ରାଜ୍ୟଗୁଡ଼ିକୁ ନିର୍ଦ୍ଦେଶାବଳୀ ଜାରି କରିଛନ୍ତି।

୨୯ ଜୁଲାଇରେ ରାଜ୍ୟସଭାରେ ଏହି ବିଲ୍ଟି ବିରୋଧୀ ଓ ଶାସକ ଦଳ ମଧ୍ୟରେ ତୀବ୍ର ଆଲୋଚନା ଓ ଯୁକ୍ତିତର୍କ ପରେ ପାରିତ ହୋଇଥିଲା। ଆଲୋଚନା ସମୟରେ କଂଗ୍ରେସ ଏବଂ ଅନ୍ୟାନ୍ୟ ବିରୋଧୀ ଦଳର ସଦସ୍ୟମାନେ ଗୃହତ୍ୟାଗ (Walkout) କରିଥିଲେ।

୨୪ ଜୁଲାଇରେ ଆଗତ ହୋଇଥିଲା ବିଲ୍

ରାଜ୍ୟସଭାରେ ଆଲୋଚନାର ଉତ୍ତର ଦେଇ ଗୃହ ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ କହିଛନ୍ତି ଯେ, ଏହି ବିଲ୍ର ମୁଖ୍ୟ ଉଦ୍ଦେଶ୍ୟ ହେଉଛି ଦେଶର ସମ୍ମାନ ଓ ସାଂସ୍କୃତିକ ଐତିହ୍ୟର ସୁରକ୍ଷା କରିବା। ସେ 'ବନ୍ଦେ ମାତରମ୍'କୁ ଭାରତର ସ୍ୱାଧୀନତା ସଂଗ୍ରାମ ଏବଂ ଜାତୀୟ ଚେତନାର ପ୍ରତୀକ ଭାବେ ବର୍ଣ୍ଣନା କରିଥିଲେ।

ବିଭିନ୍ନ ଦଳର ଅନେକ ସଦସ୍ୟ ଏହି ବିଲ୍ ଉପରେ ନିଜ ନିଜର ମତ ରଖିଥିଲେ। କେତେକ ଜାତୀୟ ପ୍ରତୀକର ଅପମାନ ରୋକିବା ପାଇଁ କଠୋର ନିୟମକୁ ସମର୍ଥନ କରିଥିବା ବେଳେ, ଅନ୍ୟ କେତେକ ଏହା ଉପରେ ସର୍ବସମ୍ମତି ଓ ଆହୁରି ବ୍ୟାପକ ଆଲୋଚନାର ଆବଶ୍ୟକତା ଉପରେ ଚିନ୍ତା ପ୍ରକଟ କରିଥିଲେ।

ଏହି ବିଲ୍ଟି ୨୪ ଜୁଲାଇରେ ରାଜ୍ୟସଭାରେ ଆଗତ କରାଯାଇଥିଲା ଏବଂ ୨୯ ଜୁଲାଇରେ ପାସ୍ ହୋଇଥିଲା। ବିଲ୍କୁ ୩୦ ଜୁଲାଇରେ ଲୋକସଭା ମଞ୍ଜୁରୀ ଦେଇଛନ୍ତି। ଏହି ବିଲ୍ଟି ଏପରି ଏକ ସମୟରେ ପାରିତ ହୋଇଛି, ଯେତେବେଳେ NEET ପେପର ଲିକ୍ ମାମଲାକୁ ନେଇ ସଂସଦର ଉଭୟ ଗୃହରେ କ୍ରମାଗତ ଭାବେ ବାଧାସୃଷ୍ଟି ହେଉଛି ଏବଂ ଗୋଟିଏ ସପ୍ତାହରୁ ଅଧିକ ସମୟ ଧରି ଗୃହ କାର୍ଯ୍ୟ ବାଧାପ୍ରାପ୍ତ ହୋଇଛି।