ଉତ୍ତରପ୍ରଦେଶର ମିରଟରୁ ଆସିଛି ଏକ ଲୋମହର୍ଷଣକାରୀ ଘଟଣା । ସ୍ୱାମୀଙ୍କୁ ପ୍ରଥମେ ନିଶା ଔଷଧ ଦେବା ପରେ ପ୍ରେମିକ ସହ ମିଶି ହତ୍ୟା କଲା ପତ୍ନୀ । ଏତିକିରେ ମନ ବୁଝିଲାନି ଯେ, ହତ୍ୟା ପରେ ଶବକୁ ୧୫ ଟୁକୁଡା ଖଣ୍ଡ କରି ପ୍ଲାଷ୍ଟିକ୍ ଡ୍ରମରେ ପୂରାଇ ପ୍ଲାଷ୍ଟର କରିଦେଇଛି ପତ୍ନୀ ମୁସ୍କାନ ରସ୍ତୋଗି ।

ତେବେ ମୃତ ସ୍ୱାମୀ ଜଣକ ହେଉଛନ୍ତି ମର୍ଚ୍ଚାଣ୍ଟ ନାଭି ଅଫିସର ସୌରଭ ରାଜପୁତ । ବିବାହ ପରେ ସେ ନାଭି ଚାକିରୀ ଛାଡ଼ି ଲଣ୍ଡନରେ ରହି କାମ କରୁଥିଲେ । ତେବେ ଗତ ମାସରେ ଝିଅର ଜନ୍ମଦିନ ପାଇଁ ସେ ମିରଟ ଆସିଥିବା ବେଳେ ତାଙ୍କୁ ପତ୍ନୀ ନିଜ ପ୍ରେମିକ ସହ ମିଶି ହତ୍ୟା କରିଛି । ତେବେ ଏହି ଜଘନ୍ୟ ହତ୍ୟାକାଣ୍ଡ ନେଇ ସମ୍ପୃକ୍ତ ମହିଳା ନିଜେ ପୋଲିସ ଆଗରେ ସ୍ୱିକାର କରିଛି ।

ପୋଲିସର ସୂଚନା ମୁତାବିକ, ମିରଟର ଇନ୍ଦିରା ନଗରର ବାସିନ୍ଦା ସୌରଭ ଏବଂ ମୁସ୍କାନଙ୍କର ୨୦୧୬ ମସିହାରେ ପ୍ରେମ ବିବାହ ହୋଇଥିଲା। ତା’ପରେ, ମୁସ୍କାନର ପ୍ରେମ ପାଇଁ, ସୌରଭ ମର୍ଚ୍ଚାଣ୍ଟ ନେଭି ଚାକିରି ମଧ୍ୟ ଛାଡି ଦେଇଥିଲେ। ପ୍ରେମ ବିବାହ ନିଷ୍ପତ୍ତି ଏବଂ ଚାକିରି ଛାଡିବା ଯୋଗୁଁ, ସୌରଭଙ୍କର ତାଙ୍କ ପରିବାର ସହିତ ବିବାଦ ଆରମ୍ଭ ହୋଇଗଲା। ପରିସ୍ଥିତି ଏତେ ଖରାପ ହେଲା ଯେ ସୌରଭ ଏବଂ ମୁସ୍କାନ ଅଲଗା ହୋଇ ଏକ ଭଡା ଘରେ ରହିବା ଆରମ୍ଭ କଲେ।

୨୦୧୯ ମସିହାରେ, ମୁସ୍କାନ ଏକ କନ୍ୟା ସନ୍ତାନକୁ ଜନ୍ମ ଦେଇଥିଲେ। ଏହି ସମୟରେ ମୁସ୍କାନଙ୍କର, ସାହିଲ ସହିତ ପ୍ରେମ ସମ୍ପର୍କ ଗଢ଼ି ଉଠିଥିଲା। ଯେତେବେଳେ ସୌରଭ ଏହା ଜାଣିବାକୁ ପାଇଲେ, ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଝଗଡ଼ା ହୋଇ କଥା ଛାଡପତ୍ର ପର୍ଯ୍ୟନ୍ତ ପହଞ୍ଚିଗଲା। କିନ୍ତୁ ତା’ପରେ ସୌରଭ ତାଙ୍କ ଝିଅର ଭବିଷ୍ୟତକୁ ଧ୍ୟାନରେ ରଖି ୨୦୨୩ ମସିହାରେ ପୁଣି କାମ କରିବା ପାଇଁ ବିଦେଶ ଚାଲିଗଲେ। 

ଅଧିକ ପଢନ୍ତୁ: ଦେଓମାଳି ଶିଖରରେ ପହଞ୍ଚି କାହିଁକି ଦୁଃଖ କଲେ ରାଜାମୌଲୀ; ସୋସିଆଲ ମିଡ଼ିଆରେ ଭିଡ଼ିଓ ଶେୟାର କରି ରଖିଲେ ମତ

ତେବେ ଗତ ମାସରେ ଝିଅର ଜନ୍ମଦିନ ପାଇଁ ସେ ଫେରିବା ପରେ ମୁସ୍କାନ ଓ ସାହିଲ, ମାର୍ଚ୍ଚ ୪ ତାରିଖରେ ସୌରଭଙ୍କୁ ଛୁରି ଭୁସି ହତ୍ୟା କରିଥିଲେ ଏବଂ ତାଙ୍କ ଶରୀରକୁ ୧୫ ଖଣ୍ଡ କରି ଏକ ପ୍ଲାଷ୍ଟିକ୍ ଡ୍ରମରେ ପୂରାଇ ସିମେଣ୍ଟ ଭର୍ତ୍ତି କରିଦେଇଥିଲେ। ପୁଲିସ ଏହି ମାମଲାରେ ମୁସ୍କାନ ଏବଂ ପ୍ରେମିକ ସାହିଲକୁ ଗିରଫ କରିଛି। 

ମୁସ୍କାନର ବାପା ଏହି ଘଟଣାରେ ନିଜ ଝିଅକୁ କଠୋରରୁ ଅତି କଠୋର ଦଣ୍ଡ ଦେବାପାଇଁ ଦାବି କରିଛନ୍ତି । ମୁସ୍କାନର ବାପା ପ୍ରମୋଦ ରସ୍ତୋଗୀ କହିଛନ୍ତି, ସୌରଭ ତାଙ୍କ ପୁଅ ଭଳି ଏବଂ ମୁସ୍କାନ୍ ସୌରଭଙ୍କୁ ହତ୍ୟା କରି ନିଜେ ବଞ୍ଚିବାର ଅଧିକାର ହରାଇ ଦେଇଛି। ତା’ର ଏଭଳି ଭୁଲ୍ କାର୍ଯ୍ୟ ପାଇଁ ତାକୁ ଫାଶୀ ହୋଇଯିବା ଉଚିତ ବୋଲି ପ୍ରମୋଦ କହିଛନ୍ତି।