ନୂଆଦିଲ୍ଲୀ: ସହମତିରେ ଶାରୀରିକ ସମ୍ପର୍କ ରଖିବାର ବୟସ ୧୮ ବର୍ଷରୁ କମ୍ ହୋଇପାରିବ ନାହିଁ । ଏହା ପୋକ୍ସୋ ଆଇନର ଉଲ୍ଲଘଂନ ହେବ । ଏକ ଯାଚିକାର ଶୁଣାଣି ବେଳେ ସୁପ୍ରିମକୋର୍ଟଙ୍କୁ କେନ୍ଦ୍ର ସରକାର ସ୍ପଷ୍ଟ ଭାବରେ କହିଛନ୍ତି । 

ନ୍ୟାୟ ମିତ୍ର ତଥା ବରିଷ୍ଠ ଅଧିବକ୍ତା ଇନ୍ଦିରା ଜୟସିଂହ, ସହମତିରେ ଶାରୀରିକ ସମ୍ପର୍କ ରଖିବାର ବୟସ ସୀମାକୁ ୧୮ରୁ କୋହଳ କରି  ୧୬ ବର୍ଷ ବୟସ କରିବାକୁ ସର୍ବୋଚ୍ଚ ଅଦାଲତରେ ଯାଚିକା ଦାଖଲ କରିଛନ୍ତି । ମାମଲାରେ ଶୁଣାଣିରେ କେନ୍ଦ୍ର ସରକାରଙ୍କ ପକ୍ଷରୁ ଅତିରିକ୍ତ ସଲିସିଟର୍ ଜେନେରାଲ ଐଶ୍ୱର୍ଯ୍ୟା ଭାଟୀ ସୁପ୍ରିମକୋର୍ଟରେ ବିସ୍ତୃତ ରିପୋର୍ଟ ଦାଖଲ କରିଛନ୍ତି । ଭାରତୀୟ ଆଇନ ଅନୁସାରେ ସହମତିରେ ସହବାସ କରିବାର ବୟସ ସୀମାକୁ ବହୁତ ଭାବିଚିନ୍ତି ଧାର୍ଯ୍ୟ କରାଯାଇଛି । ଏହା ପିଲାଙ୍କ ପ୍ରତି ହେଉଥିବା ଅନୈତିକ କାର୍ଯ୍ୟକଳାପରୁ ସୁରକ୍ଷା ପ୍ରଦାନ କରିଥାଏ । ଯୌନ ସାଧାରଣତଃ ନିକଟ ସମ୍ପର୍କୀୟଙ୍କ ଦ୍ୱାରା କରାଯାଇଥାଏ । ତେଣୁ ଏହି ଆଇନକୁ ଦୁର୍ବଳ କରିବା ଶିଶୁ ସୁରକ୍ଷା ଆଇନର ପ୍ରଗତିକୁ ପଛକୁ ଠେଲିଲା ଭଳି ହେବ ବୋଲି କହିଛି କେନ୍ଦ୍ର । 

କେନ୍ଦ୍ର ଏହା ମଧ୍ୟ କହିଛି ଯେ ଯୌନ ଅପରାଧରୁ ଶିଶୁ ସୁରକ୍ଷା ଆଇନ, ୨୦୧୨ ଏବଂ ସମ୍ପ୍ରତି ପ୍ରଣୀତ ଭାରତୀୟ ଦଣ୍ଡ ସଂହିତା (BNS) ଭଳି ଆଇନ ଏହି ନୀତି ଉପରେ ଆଧାରିତ ଯେ ୧୮ ବର୍ଷରୁ କମ୍ ବୟସର ବ୍ୟକ୍ତିମାନେ ଯୌନ କାର୍ଯ୍ୟକଳାପ ପାଇଁ ବୈଧ ଏବଂ ସୂଚନାଭିତ୍ତିକ ସମ୍ମତି ଦେବାକୁ ସକ୍ଷମ ନୁହଁନ୍ତି । ସରକାର ଏହା ମଧ୍ୟ ଚେତାବନୀ ଦେଇଛନ୍ତି ଯେ ଯଦି ଏହି ବୟସ ସୀମାରେ କୌଣସି ଛାଡ଼ ଦିଆଯାଏ, ତେବେ ଏହା ଆଇନର ଅପବ୍ୟବହାର କରୁଥିବା ଏବଂ ପୀଡିତାଙ୍କ ଭାବପ୍ରବଣ ନିର୍ଭରଶୀଳତା କିମ୍ବା ନୀରବତାର ସୁଯୋଗ ନେଉଥିବା ଲୋକଙ୍କୁ ଏହା ଏକ ସୁଯୋଗ ଦେବ । 

ଖାଲି ସେତିକି ନୁହେଁ ସରକାର ତାଙ୍କ ବିବୃତ୍ତିରେ ଏହା ମଧ୍ୟ କହିଛନ୍ତି ଯେ ଯଦି ଯୌନ ନିର୍ଯାତନା ଦେଉଥିବା ବ୍ୟକ୍ତି ପିତାମାତା କିମ୍ବା ନିକଟ ସମ୍ପର୍କୀୟ ହୁଅନ୍ତି, ତେବେ ପିଲାଟି ପ୍ରତିବାଦ କିମ୍ବା ଅଭିଯୋଗ କରିବାର ସ୍ଥିତିରେ ନାହିଁ। ଏପରି ପରିସ୍ଥିତିରେ, 'ସମ୍ମତି' ପାଇଁ ଯୁକ୍ତି କରିବା ପିଲାଟିକୁ ଦୋଷ ଦେବା ଭଳି, ଏବଂ ଏହା ପିଲାର ଶରୀର ଏବଂ ମର୍ଯ୍ୟାଦାର ସୁରକ୍ଷାକୁ ଦୁର୍ବଳ କରିଦିଏ ।