କେରଳର ଶବରୀମାଳା ମନ୍ଦିରରେ ମହିଳାଙ୍କ ପ୍ରବେଶ ସମ୍ବନ୍ଧୀୟ ମାମଲାରେ ସୁପ୍ରିମକୋର୍ଟଙ୍କ ୯ ଜଣିଆ ବିଚାରପତିଙ୍କୁ ନେଇ ଗଠିତ ସମ୍ବିଧାନ ପୀଠ ୭ ଏପ୍ରିଲରୁ ଶୁଣାଣି ଆରମ୍ଭ କରିବେ। ମୁଖ୍ୟ ବିଚାରପତି ସୂର୍ଯ୍ୟକାନ୍ତଙ୍କ ଅଧ୍ୟକ୍ଷତାରେ ଏହି ବେଞ୍ଚ ଗଠନ କରାଯାଇଛି। ଏହି ସମ୍ବିଧାନ ପୀଠରେ CJI ସୂର୍ଯ୍ୟକାନ୍ତଙ୍କ ବ୍ୟତୀତ ଜଷ୍ଟିସ୍ ବିଭି ନାଗରତ୍ନ, ଜଷ୍ଟିସ୍ ଏମଏମ ସୁନ୍ଦରେଶ, ଜଷ୍ଟିସ୍ ଅହସାନୁଦ୍ଦିନ ଅମାନୁଲ୍ଲାହ, ଜଷ୍ଟିସ୍ ଅରବିନ୍ଦ କୁମାର, ଜଷ୍ଟିସ୍ ଅଗଷ୍ଟାଇନ୍ ଜର୍ଜ ମସିହ, ଜଷ୍ଟିସ୍ ପ୍ରସନ୍ନ ବି ବରାଲେ, ଜଷ୍ଟିସ୍ ଆର ମହାଦେବନ ଏବଂ ଜଷ୍ଟିସ୍ ଜୟମାଲ୍ୟ ବାଗଚି ସାମିଲ ଅଛନ୍ତି।

ଏହି ମାମଲା କେବଳ ଶବରୀମାଳା ମଧ୍ୟରେ ସୀମିତ ନାହିଁ, ବରଂ ଏହା ସହିତ ଜଡ଼ିତ ବ୍ୟାପକ ସାମ୍ବିଧାନିକ ପ୍ରଶ୍ନ ଉପରେ ମଧ୍ୟ ବିଚାର କରାଯିବ। ଏଥିରେ ଧାର୍ମିକ ସ୍ୱତନ୍ତ୍ରତା ବନାମ ସମାନତା ଏବଂ ଗରିମାର ଅଧିକାର, ଆବଶ୍ୟକ ଧାର୍ମିକ ପ୍ରଥାର ନ୍ୟାୟିକ ସମୀକ୍ଷାର ପରିସର ଏବଂ ବିଭିନ୍ନ ଧର୍ମରେ ସମାନ ପ୍ରକାରର ବିବାଦ ଉପରେ ଏହାର ପ୍ରଭାବ ସାମିଲ ଅଛି।

୨୦୧୮ ର ଐତିହାସିକ ନିଷ୍ପତ୍ତି

ସେପ୍ଟେମ୍ବର ୨୦୧୮ ରେ ସୁପ୍ରିମକୋର୍ଟଙ୍କ ୫ ଜଣିଆ ପୀଠ ୪:୧ ବହୁମତରେ ସବୁ ବୟସର ମହିଳାଙ୍କୁ ଶବରୀମାଳା ମନ୍ଦିରରେ ପ୍ରବେଶ ପାଇଁ ଅନୁମତି ଦେଇଥିଲେ। ଏହି ନିଷ୍ପତ୍ତିରେ ତତ୍କାଳୀନ CJI ଦୀପକ ମିଶ୍ର, ଜଷ୍ଟିସ୍ ଆରଏଫ୍ ନରିମାନ, ଜଷ୍ଟିସ୍ ଏଏମ୍ ଖାନୱିଲକର ଏବଂ ଜଷ୍ଟିସ୍ ଡିୱାଇ ଚନ୍ଦ୍ରଚୂଡ଼ ବହୁମତରେ ଥିଲେ। ଅନ୍ୟପଟେ, ଜଷ୍ଟିସ୍ ଇନ୍ଦୁ ମାଲହୋତ୍ରା ଭିନ୍ନମତ ପୋଷଣ କରି କହିଥିଲେ ଯେ ଧାର୍ମିକ ବିଶ୍ୱାସରେ ନ୍ୟାୟିକ ହସ୍ତକ୍ଷେପ ସୀମିତ ହେବା ଉଚିତ। କୋର୍ଟ କହିଥିଲେ ଯେ ଭକ୍ତିରେ ଲିଙ୍ଗଗତ ଭେଦଭାବ କରାଯାଇପାରିବ ନାହିଁ। ଭଗବାନ ଆୟପ୍ପାଙ୍କ ଭକ୍ତମାନଙ୍କୁ ଏକ ଅଲଗା ଧାର୍ମିକ ସମ୍ପ୍ରଦାୟ ଭାବେ ଗ୍ରହଣ କରିବାକୁ ମନା କରାଯାଇଥିଲା।

୯ ଜଣିଆ ବେଞ୍ଚର ନିଷ୍ପତ୍ତିରେ ବଦଳିବ ବ୍ୟବସ୍ଥା

୨୦୧୮ ନିଷ୍ପତ୍ତି ବିରୋଧରେ ଅନେକ ପୁନର୍ବିଚାର ଏବଂ ରିଟ୍ ପିଟିସନ ଦାୟର କରାଯାଇଥିଲା। ଏବେ ୯ ଜଣିଆ ସମ୍ବିଧାନ ପୀଠ ସେହି ବ୍ୟାପକ ସାମ୍ବିଧାନିକ ପ୍ରଶ୍ନ ଉପରେ ନିଷ୍ପତ୍ତି ନେଇପାରନ୍ତି, ଯାହା ଭବିଷ୍ୟତରେ ଧାର୍ମିକ ପ୍ରଥା ସହ ଜଡ଼ିତ ଅନ୍ୟ ମାମଲା ପାଇଁ ଏକ ଉଦାହରଣ ହୋଇ ରହିବ। ଶବରୀମାଳା ମାମଲା ଏବେ କେବଳ ଏକ ମନ୍ଦିର ମଧ୍ୟରେ ସୀମିତ ହୋଇ ରହିନାହିଁ, ବରଂ ଏହା ଦେଶରେ ଧର୍ମ, ସମାନତା ଏବଂ ସାମ୍ବିଧାନିକ ମୂଲ୍ୟବୋଧ ମଧ୍ୟରେ ସନ୍ତୁଳନ ରକ୍ଷା କରିବାର ଏକ ଗୁରୁତ୍ୱପୂର୍ଣ୍ଣ ମୋଡ଼ ହୋଇଛି।

ଶବରୀମାଳା ଉପରେ ବିଶେଷ ଯୁକ୍ତି

ଶବରୀମାଳା ମନ୍ଦିରରେ ଭଗବାନ ଆୟପ୍ପାଙ୍କୁ 'ନୈଷ୍ଠିକ ବ୍ରହ୍ମଚାରୀ' ରୂପରେ ପୂଜା କରାଯାଏ, ତେଣୁ ୧୦ ରୁ ୫୦ ବର୍ଷ ବୟସର ମହିଳାଙ୍କ ପ୍ରବେଶକୁ ନିଷିଦ୍ଧ କରାଯାଇଛି। ଏହି କଟକଣା ସମ୍ପୂର୍ଣ୍ଣ ନୁହେଁ, ବରଂ ବୟସ ଭିତ୍ତିକ ଏବଂ ଧାର୍ମିକ ପରମ୍ପରା ସହ ଜଡ଼ିତ, ତେଣୁ ଏହାକୁ ଲିଙ୍ଗଗତ ଭେଦଭାବ କୁହାଯାଇପାରିବ ନାହିଁ। ଦେଶର ଅନ୍ୟ ଆୟପ୍ପା ମନ୍ଦିରରେ ମହିଳାଙ୍କ ପ୍ରବେଶ ଉପରେ କୌଣସି ରୋକ୍ ନାହିଁ, ଯେଉଁଥିରୁ ସ୍ପଷ୍ଟ ହେଉଛି ଯେ ଏହି ବିଶେଷ ପରମ୍ପରା କେବଳ ଶବରୀମାଳା ସହ ଜଡ଼ିତ।