କୋଲକାତା: ପଶ୍ଚିମବଙ୍ଗ ନିର୍ବାଚନରେ ଏଥର ଶାସକ ଦଳ ଏବଂ ବିରୋଧୀ ଦଳ ମଧ୍ୟରେ ଘମାଘୋଟ ଲଢ଼େଇ ଦେଖିବାକୁ ମିଳିଛି । କ୍ଷମତା ବଜାୟ ରଖିବାକୁ ମମତାଙ୍କ ତୃଣମୂଳ କଂଗ୍ରେସ କଳ ବଳ କୌଶଳ ଆପଣାଇଥିବାବେଳେ କ୍ଷମତାକୁ ଆସିବାକୁ ବିଜେପି ଗୋଟିଏ ପରେ ନିର୍ବାଚନୀ ଥୋପ ପକାଇ ଚାଲିଛି । ଦ୍ୱିତୀୟ ପର୍ଯ୍ୟାୟ ଭୋଟ୍ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏକ ବଡ଼ ଘୋଷଣା କରିଛନ୍ତି ।
ମୋଦୀ ବନଗାଓଁରେ ଏକ ସାଧାରଣସଭାକୁ ସମ୍ବୋଧିତ କରି କହିଛନ୍ତି ଯେ ଯଦି ପଶ୍ଚିମବଙ୍ଗରେ ବିଜେପି ସରକାର ଗଠନ କରେ, ତେବେ ଚାଷୀମାନଙ୍କୁ ଦିଆଯାଉଥିବା ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି ରାଶିକୁ ୯,୦୦୦ ଟଙ୍କାକୁ ବୃଦ୍ଧି କରାଯିବ। ଯାହା ବର୍ତ୍ତମାନ ଦେଶବ୍ୟାପୀ ବାର୍ଷିକ ୬,୦୦୦ ଟଙ୍କା ରହିଛି । ପ୍ରତି ଚାରି ମାସରେ ୨,୦୦୦ ଟଙ୍କା ବ୍ୟାଙ୍କ ଆକାଉଣ୍ଟକୁ ପଠାଯାଉଛି ।
ଖାଲି ସେତିକି ନୁହେଁ ପ୍ରଧାନମନ୍ତ୍ରୀ ମୋଦୀ ମହିଳାମାନଙ୍କ ପାଇଁ ଅନେକ ପ୍ରତିଶ୍ରୁତି ଦେଇଛନ୍ତି । ବିଜେପି କ୍ଷମତାକୁ ଆସିଲେ ଲକ୍ଷପତି ଅଭିଯାନରେ ବଙ୍ଗଳାର ୭୫ ମିଲିୟନ ଭଉଣୀଙ୍କୁ ସାମିଲ କରାଯିବ । ମହିଳାମାନେ ପ୍ରତିବର୍ଷ ଏକ ଲକ୍ଷ ଟଙ୍କାରୁ ଅଧିକ ରୋଜଗାର କରିପାରିବେ । ଯୁବତୀମାନେ ପସନ୍ଦର ନିଯୁକ୍ତି ପାଇପାରିବେ । ସେମାନଙ୍କୁ ୨୦ ଲକ୍ଷ ଟଙ୍କା ପର୍ୟ୍ୟନ୍ତ ମୁଦ୍ରା ଋଣ ଯୋଗାଇ ଦିଆଯିବ । ମୋଦୀ ସେମାନଙ୍କ ଭାଇ ହୋଇ ବ୍ୟାଙ୍କ ଗ୍ୟାରେଣ୍ଟି ଦେବେ ବୋଲି ପ୍ରତିଶ୍ରୁତି ଦେଇଛନ୍ତି । ମହିଳାଙ୍କୁ ବାର୍ଷିକ ୩୬,୦୦୦ ଟଙ୍କା ମିଳିବ। ଯଦି ସରକାର ପାଞ୍ଚ ବର୍ଷ ପାଇଁ କ୍ଷମତାରେ ରହିବ, ତେବେ ସେମାନଙ୍କୁ ୧୮୦,୦୦୦ ଟଙ୍କା ମିଳିବ। ସେହିପରି ଝିଅମାନଙ୍କ ଶିକ୍ଷା ପାଇଁ ୫୦,୦୦୦ ଟଙ୍କା ଦିଆଯିବ । ପ୍ରଧାନମନ୍ତ୍ରୀ ଆବାସ ଯୋଜନା ଅଧୀନରେ ଗରିବ ପରିବାରର ମହିଳାମାନଙ୍କ ନାମରେ ସ୍ଥାୟୀ ଘର ନିର୍ମାଣ ପାଇଁ ଦେଢ଼ ଲକ୍ଷ ଟଙ୍କା ଦିଆଯିବ।
ବିଜୁଳି ବିଲ ଚିନ୍ତାକୁ ଦୂର କରିବାକୁ ପ୍ରତ୍ୟେକ ପରିବାରକୁ ଏକ ସୌର ପ୍ଲାଣ୍ଟ ସ୍ଥାପନ କରିବା ପାଇଁ ୮୦,୦୦୦ ଟଙ୍କା ଦିଆଯିବ । ବିଜେପି ସରକାରଙ୍କ ପ୍ରଥମ କ୍ୟାବିନେଟ୍ ବୈଠକରେ ଆୟୁଷ୍ମାନ ଯୋଜନା କାର୍ୟ୍ୟକାରୀ କରିବା ନେଇ ନିଷ୍ପତ୍ତି ନିଆଯିବ । ୫ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ଉପଲବ୍ଧ ହେବ ବୋଲି ମୋଦୀ ତାଙ୍କର ଆଉ ଏକ ଗ୍ୟାରେଣ୍ଟି ଦେଇଛନ୍ତି ।