ଆନ୍ଧ୍ରପ୍ରଦେଶର ଉପମୁଖ୍ୟମନ୍ତ୍ରୀ ତଥା ଅଭିନେତା ପବନ କଲ୍ୟାଣଙ୍କ ଡାହାଣ କାନ୍ଧର ସର୍ଜରୀ ମୁମ୍ବାଇର କୋକିଲାବେନ ଧୀରୁଭାଇ ଅମ୍ବାନୀ ହସ୍ପିଟାଲରେ ସଫଳତାର ସହ ସମ୍ପନ୍ନ ହୋଇଛି। ମିଳିଥିବା ସୂଚନା ଅନୁଯାୟୀ, କାନ୍ଧରେ ଦୀର୍ଘ ଦିନ ଧରି ଲାଗି ରହିଥିବା ସମସ୍ୟାର ଚିକିତ୍ସା ପାଇଁ ପବନ କଲ୍ୟାଣଙ୍କୁ କୋକିଲାବେନ ହସ୍ପିଟାଲରେ ଭର୍ତ୍ତି କରାଯାଇଥିଲା। ଡାକ୍ତରଙ୍କ ପରୀକ୍ଷା ପରେ ତାଙ୍କର ଉଭୟ କାନ୍ଧର ରୋଟେଟର କଫ୍ ଏବଂ ମାଂସପେଶୀରେ ଗୁରୁତର ଆଘାତ ଲାଗିଥିବା ଜଣାପଡ଼ିଥିଲା, ଯେଉଁଥିପାଇଁ ସେ ଦୀର୍ଘ ଦିନ ହେବ ପ୍ରବଳ ଯନ୍ତ୍ରଣା ଭୋଗୁଥିଲେ।

ଡାକ୍ତରଙ୍କ ପରାମର୍ଶ ଅନୁଯାୟୀ, ଉଭୟ କାନ୍ଧର ଏକ ସଙ୍ଗେ ସର୍ଜରୀ କଲେ ସୁସ୍ଥ ହେବାରେ ଅଧିକ ସମସ୍ୟା ହୋଇଥାନ୍ତା। ତେଣୁ ପ୍ରାୟ ସାଢ଼େ ତିନି ଘଣ୍ଟା ଧରି ଚାଲିଥିବା ଏହି ଅସ୍ତ୍ରୋପଚାରରେ ବର୍ତ୍ତମାନ ପାଇଁ କେବଳ ଡାହାଣ କାନ୍ଧର ଅପରେସନ କରାଯାଇଛି। ହସ୍ପିଟାଲ ପକ୍ଷରୁ ମିଳିଥିବା ସୂଚନା ଅନୁସାରେ, ବାମ କାନ୍ଧର ସର୍ଜରୀ ପ୍ରାୟ ଦୁଇ ମାସ ପରେ କରାଯିବ।

ଚନ୍ଦ୍ରବାବୁ ନାଇଡୁ କଲେ ସାକ୍ଷାତ

ଏହି ସମୟରେ, ପବନ କଲ୍ୟାଣଙ୍କ ସ୍ୱାସ୍ଥ୍ୟାବସ୍ଥା ପଚାରି ବୁଝିବା ପାଇଁ ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରବାବୁ ନାଇଡୁ ମଧ୍ୟ କୋକିଲାବେନ ଧୀରୁଭାଇ ଅମ୍ବାନୀ ହସ୍ପିଟାଲରେ ପହଞ୍ଚି ତାଙ୍କୁ ଭେଟିଥିଲେ। ବର୍ତ୍ତମାନ ପବନ କଲ୍ୟାଣଙ୍କ ଅବସ୍ଥା ସ୍ଥିର ରହିଛି ଏବଂ ଡାକ୍ତରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ତାଙ୍କର ଚିକିତ୍ସା ଚାଲିଛି।

ଜନସେନା ପାର୍ଟି ପକ୍ଷରୁ 'ଏକ୍ସ' (X) ରେ ପୋଷ୍ଟ କରାଯାଇଥିବା ଏକ ବିବୃତିରେ କୁହାଯାଇଛି ଯେ, ଉପମୁଖ୍ୟମନ୍ତ୍ରୀ ପବନ କଲ୍ୟାଣଙ୍କ କାନ୍ଧର ସର୍ଜରୀ ହୋଇଛି। ଉଭୟ କାନ୍ଧରେ ଗୁରୁତର ରୋଟେଟର କଫ୍ ଇଞ୍ଜୁରୀ (ଆଘାତ) ଚିହ୍ନଟ ହୋଇଥିଲା; ପ୍ରଥମେ ଡାହାଣ କାନ୍ଧର ଅପରେସନ କରାଗଲା। ଏହି ସର୍ଜିକାଲ ପ୍ରକ୍ରିୟା ସାଢ଼େ ତିନି ଘଣ୍ଟା ଧରି ଚାଲିଥିଲା। ୨୦୧୬ରେ ଲାଗିଥିବା ଆଘାତ, ପୋରାଟା ଯାତ୍ରା ଠାରୁ ଆରମ୍ଭ କରି ନିକଟରେ ଶେଷ ହୋଇଥିବା ନିର୍ବାଚନ ପ୍ରଚାର ପର୍ଯ୍ୟନ୍ତ, ରାଜନୈତିକ ରାଲି ସମୟରେ ଉତ୍ସାହିତ ଜନତାଙ୍କ ଦ୍ୱାରା ତାଙ୍କ ହାତ ଟଣାଓଟରା ହେବା ଯୋଗୁଁ ବର୍ଷ ବର୍ଷ ପରେ ଏହା ଆହୁରି ବଢ଼ିଯାଇଥିଲା।

ପାର୍ଟି ପକ୍ଷରୁ କୁହାଯାଇଛି ଯେ କାନ୍ଧର ଏହି ଆଘାତ ୨୦୧୬ ମସିହାର, କିନ୍ତୁ ପବନ କଲ୍ୟାଣ ନିଜର ରାଜନୈତିକ ପ୍ରତିବଦ୍ଧତା ପୂରଣ କରିବା ପାଇଁ ବାରମ୍ବାର ଚିକିତ୍ସାକୁ ଟାଳି ଆସୁଥିଲେ। ବିବୃତି ଅନୁଯାୟୀ, ମେଡିକାଲ ପରାମର୍ଶ ସତ୍ତ୍ୱେ ସେ ରାଲି, ସାଧାରଣ ସଭା ଏବଂ ଯାତ୍ରାଗୁଡ଼ିକରେ ଭାଗ ନେଉଥିବାରୁ ବର୍ଷ ବର୍ଷ ଧରି ତାଙ୍କର ଏହି ସମସ୍ୟା କ୍ରମାଗତ ଭାବେ ଗୁରୁତର ହେବାରେ ଲାଗିଥିଲା।

୨୦୧୬ରେ ପବନ କଲ୍ୟାଣଙ୍କୁ ଲାଗିଥିଲା ଆଘାତ

ବିବୃତିରେ କୁହାଯାଇଛି ଯେ ପବନ କଲ୍ୟାଣଙ୍କୁ ପ୍ରକୃତରେ ୨୦୧６ରେ କାନ୍ଧରେ ଆଘାତ ଲାଗିଥିଲା। ଡାକ୍ତରମାନେ ତାଙ୍କୁ ସମ୍ପୂର୍ଣ୍ଣ ଆରାମ କରିବାକୁ ପରାମର୍ଶ ଦେଇଥିଲେ, ତଥାପି ସେ ସାଧାରଣ ସଭାଗୁଡ଼ିକରେ ଯୋଗ ଦେଇ ଚାଲିଥିଲେ। ୨୦୧୮ର ପୋରାଟା ଯାତ୍ରା ସମୟରେ ସ୍ଥିତି ଆହୁରି ବିଗିଡ଼ି ଯାଇଥିଲା। ନିଜ ନେତାଙ୍କୁ ସ୍ୱାଗତ କରିବାର ଉତ୍ସାହରେ, ଜନସେନା ପାର୍ଟିର ସମର୍ଥକମାନେ ପ୍ରାୟତଃ ତାଙ୍କ ହାତ ଧରି ଟାଣି ଦେଉଥିଲେ। ସେ ଏହି ପ୍ରବଳ କଷ୍ଟକୁ ଚୁପଚାପ୍ ସହ୍ୟ କରିଥିଲେ ଏବଂ ସଠିକ୍ ଚିକିତ୍ସାରେ ବିଳମ୍ବ କରିଚାଲିଥିଲେ।

୨୦୧୯ ନିର୍ବାଚନ ପରେ, ରାୟଲସୀମା ଜିଲ୍ଲା ଗସ୍ତ ସମୟରେ, ବିଶେଷ କରି ଯେତେବେଳେ ସେ ମଦନପଲ୍ଲୀରେ ଟମାଟୋ ଚାଷୀମାନଙ୍କୁ ଭେଟିଥିଲେ, ସେତେବେଳେ ଯନ୍ତ୍ରଣା ପୁଣି ଥରେ ବଢ଼ିଯାଇଥିଲା। କ୍ରମାଗତ ଭାବେ ହାତ ମିଳାଇବା, ହାତ ହଲାଇବା ଏବଂ ପ୍ରବଳ ଭିଡ଼ ଦ୍ୱାରା ଶ୍ରଦ୍ଧାର ସହ ଆଲିଙ୍ଗନ କରିବା ଯୋଗୁଁ ତାଙ୍କ କାନ୍ଧ ଉପରେ ଅଧିକ ଚାପ ପଡ଼ିଥିଲା। ବରାହୀ ଯାତ୍ରା ଏବଂ ନିକଟରେ ହୋଇଥିବା ସାଧାରଣ ନିର୍ବାଚନ ପ୍ରଚାର ସମୟରେ ମଧ୍ୟ ତାଙ୍କୁ ଏହି ଯନ୍ତ୍ରଣା ସହିବାକୁ ପଡ଼ିଥିଲା। ତେବେ ଏହି ଆଘାତ କେତେ ଗଭୀର ଥିଲା, ତାହା ଗତ ଏପ୍ରିଲ ମାସରେ ନାକର ସର୍ଜରୀ ପାଇଁ ହୋଇଥିବା ମେଡିକାଲ ପରୀକ୍ଷା ସମୟରେ ଜଣାପଡ଼ିଥିଲା।

ଯନ୍ତ୍ରଣାରେ ଛଟପଟ ହେଉଥିଲେ ପବନ କଲ୍ୟାଣ

ରୋଟେଟର କଫରେ ଗୁରୁତର ଆଘାତ ଏବଂ ମାଂସପେଶୀରେ ତୀବ୍ର ଯନ୍ତ୍ରଣା ଥିବା ଡାକ୍ତରମାନେ ଦେଖିବାକୁ ପାଇଥିଲେ ଏବଂ ପବନ କଲ୍ୟାଣଙ୍କର ଯନ୍ତ୍ରଣା ସହ୍ୟ କରିବାର କ୍ଷମତା ଦେଖି ସେମାନେ ଆଶ୍ଚର୍ଯ୍ୟ ହୋଇଯାଇଥିଲେ। ଏତେ ଦୀର୍ଘ ସମୟ ଧରି ତାଙ୍କୁ ଏତେ ବଡ଼ ଶାରୀରିକ କଷ୍ଟ ସହିବାକୁ ପଡ଼ିଥିଲା। ସର୍ଜରୀ ପାଇଁ ଡାକ୍ତରଙ୍କ ଜରୁରୀ ପରାମର୍ଶ ପରେ, କିଛି ସପ୍ତାହ ପୂର୍ବରୁ ମୁମ୍ବାଇରେ ତାଙ୍କର ଅଧିକ ପରୀକ୍ଷା ନିରୀକ୍ଷା କରାଯାଇଥିଲା, ଯାହାର ପରିଣାମସ୍ୱରୂପ ଶନିବାର ଦିନ ଏହି ଅସ୍ତ୍ରୋପଚାର କରାଗଲା। ବର୍ତ୍ତମାନ ସେ ଡାକ୍ତରୀ ଦଳର ପ୍ରତ୍ୟକ୍ଷ ନଜରରେ ସୁସ୍ଥ ହେଉଛନ୍ତି।

ସର୍ଜରୀର କିଛି ଘଣ୍ଟା ପରେ, ଜନସେନା ପାର୍ଟି ପକ୍ଷରୁ ଆଉ ଏକ ଅପଡେଟ୍ ଜାରି କରାଯାଇଥିଲା, ଯେଉଁଥିରେ ଅପରେସନ ସଫଳତାର ସହ ଶେଷ ହୋଇଥିବା ନିଶ୍ଚିତ କରାଯାଇଛି। ପାର୍ଟି ପକ୍ଷରୁ ଆହୁରି ମଧ୍ୟ କୁହାଯାଇଛି ଯେ, ଡାକ୍ତରମାନେ ପବନ କଲ୍ୟାଣଙ୍କ କାନ୍ଧରେ ଏକ 'ଏଭଲସନ ଫ୍ରାକ୍ଚର' ମଧ୍ୟ ଚିହ୍ନଟ କରିଥିଲେ, ଯାହାଫଳରେ ସର୍ଜରୀ ପ୍ରକ୍ରିୟା ପ୍ରାରମ୍ଭିକ ଆକଳନ ତୁଳନାରେ ଅଧିକ ଜଟିଳ ହୋଇଯାଇଥିଲା, ତଥାପି ଅପରେସନ ସମ୍ପୂର୍ଣ୍ଣ ରୂପେ ସଫଳ ରହିଛି।