ନିଟ୍ (NEET) ପ୍ରଶ୍ନପତ୍ର ଲିକ୍ ମାମଲାର ତଦନ୍ତ କରୁଥିବା CBI ପୁଣେ ଏବଂ ଅହିଲ୍ୟାନଗରରୁ ଦୁଇ ଜଣ ଯୁବକଙ୍କୁ ଗିରଫ କରିଛି। ଏହି ମାମଲାରେ CBI ନିଜର ତଦନ୍ତ ପରିସରକୁ ବଢ଼ାଇ ଦେଇଛି। ଡିଲିଟ୍ କରାଯାଇଥିବା ମୋବାଇଲ୍ ଚାଟ୍ର ଫୋରେନ୍ସିକ୍ ଯାଞ୍ଚ ଜାରି ରହିଛି, ଯେଉଁଥିରୁ ଗୁରୁତ୍ୱପୂର୍ଣ୍ଣ ସୁରାକ ମିଳିବାର ଆଶା କରାଯାଉଛି।

ପୁଣେର ମାଞ୍ଜରୀ ଅଞ୍ଚଳରୁ ଜଣେ ଯୁବକଙ୍କୁ ହେପାଜତକୁ ନିଆଯାଇଛି, ଯାହାଙ୍କ ପରିଚୟ ଶେଷରାଓ ସୋଲୁଙ୍କେ ଭାବେ ହୋଇଛି। ସେ ରାୟସୋନୀ କଲେଜର ଇଞ୍ଜିନିୟରିଂ ଦ୍ୱିତୀୟ ବର୍ଷର ଛାତ୍ର ବୋଲି ଜଣାପଡ଼ିଛି। ଏହା ସହିତ ଅହିଲ୍ୟାନଗରରୁ ମଧ୍ୟ ଜଣେ ଯୁବକଙ୍କୁ ଗିରଫ କରାଯାଇଛି। ଏହାକୁ ମିଶାଇ ଗିରଫ ଅଭିଯୁକ୍ତଙ୍କ ସଂଖ୍ୟା ୭କୁ ବୃଦ୍ଧି ପାଇଛି।

ପୋଲିସ ସୂତ୍ର ଅନୁଯାୟୀ, ମାମଲାରେ ସଂପୃକ୍ତି ସନ୍ଦେହରେ ତାଙ୍କୁ ପଚରାଉଚରା କରାଯାଉଛି। ପୁଣେରେ ଏହା ଦ୍ୱିତୀୟ ବଡ଼ କାର୍ଯ୍ୟାନୁଷ୍ଠାନ। ଏହା ପୂର୍ବରୁ ପୋଲିସ ମନୀଷା ୱାଘମାରେଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା। ପଚରାଉଚରାରୁ ଜଣାପଡ଼ିଛି ଯେ, ମନୀଷା ଏବଂ ଧନଞ୍ଜୟ ଲୋଖଣ୍ଡେଙ୍କ ମଧ୍ୟରେ ଦୀର୍ଘ ବର୍ଷର ପରିଚୟ ଥିଲା ଏବଂ ସେମାନଙ୍କ ମଧ୍ୟରେ ଟଙ୍କା ନେଣଦେଣ ମଧ୍ୟ ହେଉଥିଲା।

ମିଳିଛି ଗୁରୁତ୍ୱପୂର୍ଣ୍ଣ ସୁରାକ

ତଦନ୍ତକାରୀ ସଂସ୍ଥା ସନ୍ଦେହ କରୁଛି ଯେ, ପ୍ରଶ୍ନପତ୍ର ଲିକ୍ ଘଟଣା ସାମ୍ନାକୁ ଆସିବା ପରେ ମନୀଷା ଏବଂ ଲୋଖଣ୍ଡେ ନିଜ ମୋବାଇଲରୁ ଅନେକ ଚାଟ୍ ଡିଲିଟ୍ କରିଦେଇଛନ୍ତି। CBI ଏବେ ଉଭୟଙ୍କ ମୋବାଇଲ୍ ଜବତ କରି ଫୋରେନ୍ସିକ୍ ଯାଞ୍ଚ ପାଇଁ ପଠାଇଛି। ଗିରଫ ହୋଇଥିବା ଇଞ୍ଜିନିୟରିଂ ଛାତ୍ରଙ୍କ ଉପରେ ଲିକ୍ ପ୍ରଶ୍ନପତ୍ର ବାଣ୍ଟିବା (Distribution) ଅଭିଯୋଗ ରହିଛି।

୫ ଅଭିଯୁକ୍ତଙ୍କୁ ୭ ଦିନିଆ CBI ରିମାଣ୍ଡ

ଏହି ମାମଲାରେ ଗିରଫ ହୋଇଥିବା ୫ ଜଣ ଅଭିଯୁକ୍ତଙ୍କୁ ଦିଲ୍ଲୀର ଏକ କୋର୍ଟ ୭ ଦିନ ପାଇଁ CBI ରିମାଣ୍ଡରେ ପଠାଇଛନ୍ତି। ଅଭିଯୁକ୍ତ ୟଶ ଯାଦବ, ମାଙ୍ଗିଲାଲ ଖଟିକ ଓରଫ ମାଙ୍ଗିଲାଲ ବିୱାଲ, ବିକାଶ ବିୱାଲ ଏବଂ ଦିନେଶ ବିୱାଲଙ୍କୁ ମଇ ୧୩ ତାରିଖରେ ଜୟପୁରରୁ ଗିରଫ କରାଯାଇଥିଲା।

SOG (Special Operations Group) ତଦନ୍ତରୁ ଜଣାପଡ଼ିଛି ଯେ, ନାସିକର ଶୁଭମ ନାମକ ଜଣେ ବ୍ୟକ୍ତି ୧୦-୧୨ ଲକ୍ଷ ଟଙ୍କାରେ ପ୍ରଶ୍ନପତ୍ର ଯୋଗାଡ଼ କରିବାକୁ ୟଶ ଯାଦବଙ୍କୁ କହିଥିଲେ। ଏହି ଅଭିଯୋଗ ପରେ ସରକାର ପରୀକ୍ଷା ବାତିଲ କରିଦେଇଥିଲେ।