ହାଇଦ୍ରାବାଦ: ଜଣେ ଜର୍ମାନ ମହିଳାଙ୍କୁ ଦୁଷ୍କର୍ମ ଅଭିଯୋଗରେ ହାଇଦ୍ରାବାଦ୍ର ଜଣେ କାର ଡ୍ରାଇଭରଙ୍କୁ ପୋଲିସ ଗିରଫ କରିଛି। ଅଭିଯୁକ୍ତର ନାମ ଅବଦୁଲ ଅସଲମ। ପୀଡିତାଙ୍କ ଭାରତୀୟ ବନ୍ଧୁ ଶରତ ଚନ୍ଦ୍ର ଚୌଧୁରୀଙ୍କ ଅଭିଯୋଗ କ୍ରମେ ପୋଲିସ ଏକ ମାମଲା ରୁଜୁ କରିଛି।
ପୋଲିସର ସୂଚନା ଅନୁସାରେ, ଶରତ ଚନ୍ଦ୍ର ଚୌଧୁରୀ ଗତ ବର୍ଷ ଇଟାଲୀର ମେସିନା ବିଶ୍ୱବିଦ୍ୟାଳୟରେ ପଢ଼ୁଥିବା ସମୟରେ ଦୁଇ ଜଣ ଜର୍ମାନୀଙ୍କ ସହ ସାଙ୍ଗ ହୋଇଥିଲେ। ପରେ ସେ ସାଙ୍ଗ ଦୁଇ ଜଣଙ୍କୁ ଭାରତ ବୁଲିବା ପାଇଁ ଡାକିଥିଲେ। ଦୁଇ ଜଣ ଜର୍ମାନୀ ସାଙ୍ଗ ଭାରତୀୟ ବନ୍ଧୁଙ୍କ ନିମନ୍ତ୍ରଣ ରକ୍ଷା କରି ମାର୍ଚ୍ଚ ଚାରି ତାରିଖରେ ହାଇଦ୍ରାବାଦରେ ପହଞ୍ଚିଥିଲେ। ଦୁଇ ଜଣ ଜର୍ମାନୀ ସାଙ୍ଗ ମୀରପେଟରେ ଶରତ ଚନ୍ଦ୍ରଙ୍କ ଘରେ ରହି ବୁଲାବୁଲି କରିବା ପାଇଁ ଯୋଜନା କରିଥିଲେ।
ଗତ ମାର୍ଚ୍ଚ ୩୧ ତାରିଖରେ ପୀଡିତା ଏବଂ ତାଙ୍କ ଜର୍ମାନ ବନ୍ଧୁ ଘରୁ ବାହାରି ନିକଟସ୍ଥ ବଜାରକୁ ବୁଲି ଯାଇଥିଲେ। ଏହି ସମୟରେ ଛଅ ଜଣ ବ୍ୟକ୍ତି ଏକ କାରରେ ଆସି ତାଙ୍କୁ କୁଆଡେ ଯିବେ ବୋଲି ପଚାରିଥିଲେ। ତାପରେ ତାଙ୍କୁ ସାହାଯ୍ୟ କରିବା କହି ଲିଫ୍ଟ ଦେଇଥିଲେ। ସେମାନେ ଉଭୟ ସେ କାରରେ ବସିଲେ। ବାକି ସାଙ୍ଗମାନେ କାରରୁ ଓହ୍ଲାଇ ପଡ଼ିଥିଲେ। ଅଭିଯୁକ୍ତ ଜଣକ କାର ଚଳାଇ ଦୁଇ ଜଣ ଜର୍ମାନୀ ବନ୍ଧୁଙ୍କୁ ବୁଲାଇବା ପାଇଁ ଗୋଟେ ସ୍ଥାନକୁ ନେଇଥିଲେ। ତା ପରେ ଅଭିଯୁକ୍ତ ପୀଡ଼ିତାଙ୍କୁ କିଛି ମିଟର ଦୂରରେ ଥିବା ଏକ ନିର୍ଜନ ସ୍ଥାନକୁ ନେଇଯାଇଥିଲେ। ତାପରେ ପୀଡ଼ିତାଙ୍କୁ ମାରିବାକୁ ଧମକ ଦେବା ସହିତ କାର ଭିତରେ ଦୁଷ୍କର୍ମ କରିଥିଲେ।
ଅଭିଯୁକ୍ତ ପୀଡିତାଙ୍କୁ ପୂର୍ବ ସ୍ଥାନରେ ଛାଡିବାକୁ ଆସିଥିବାବେଳେ ପୀଡିତା ଚଳନ୍ତା ଗାଡିରୁ ଡେଇଁ ପଡି ତାଙ୍କ ଜର୍ମାନୀ ବନ୍ଧୁଙ୍କ ପାଖକୁ ଯାଇ ସବୁ କଥା କହିଥିଲେ। ତା ପରେ ପୀଡିତା, ଜର୍ମାନୀ ବନ୍ଧୁ ଓ ଭାରତୀୟ ବନ୍ଧୁ ଏନେଇ ଥାନାରେ ଅଭିଯୋଗ କରିଥିଲେ। ପୋଲିସ ଘଟଣାର ତଦନ୍ତ କରି ଅଭିଯୁକ୍ତ କାର ଡ୍ରାଇଭରକୁ ମଙ୍ଗଳବାର ଅପରାହ୍ନରେ ଗିରଫ କରିଥିଲା। ପୋଲିସ ଉକ୍ତ କାରଟିକୁ ଜବତ କରିଛି। ଅଭିଯୁକ୍ତକୁ କୋର୍ଟରେ ହାଜର କରାଯାଇଛି।