ଆନ୍ଧ୍ରପ୍ରଦେଶର ଅନନ୍ତପୁର ଜିଲ୍ଲାରେ ବର୍ଷା ପାଇଁ ଗ୍ରାମବାସୀମାନେ କୁକୁରକୁ ପୂଜା କରିଛନ୍ତି। ଏଠାରେ କୃଷକମାନେ ଭଲ ବର୍ଷା ପାଇଁ ଭଗବାନଙ୍କ ନିକଟରେ ପ୍ରାର୍ଥନା କରିବା ସହ କୁକୁରକୁ ସଜାଇ ତାର ପୂଜାର୍ଚ୍ଚନା କରନ୍ତି।

ଆପଣ ବର୍ଷା କରାଇବା ପାଇଁ ଅନେକ ସ୍ଥାନରେ ବେଙ୍ଗ-ବେଙ୍ଗୁଲୀ ବାହାଘର ପରମ୍ପରା ବିଷୟରେ ଶୁଣିଥିବେ କିମ୍ବା ଦେଖିଥିବେ। କିନ୍ତୁ ଆନ୍ଧ୍ରପ୍ରଦେଶର ଅନନ୍ତପୁର ଜିଲ୍ଲାରେ ବର୍ଷା ପାଇଁ ଏକ ଅତ୍ୟନ୍ତ ନିଆରା ଓ କୌତୂହଳପୂର୍ଣ୍ଣ ପରମ୍ପରା ପାଳନ କରାଯାଏ। ଏଠାରେ ଗ୍ରାମବାସୀ ବର୍ଷା ପାଇଁ ପ୍ରାର୍ଥନା କରନ୍ତି ଏବଂ ଭଲ ବର୍ଷା ହେବା ପାଇଁ କୁକୁରକୁ ପୂଜା କରନ୍ତି। ଲୋକମାନେ ଏଠାରେ କୁକୁରକୁ 'କଟାମାରାୟୁ'ଙ୍କ ରୂପ ବୋଲି ମାନିଥାନ୍ତି।

ଅନନ୍ତପୁର ଜିଲ୍ଲାର ଅନେକ ଭାଗରେ ବର୍ଷାର ଅଭାବ ଯୋଗୁଁ ଚାଷୀମାନେ ଚିନ୍ତାରେ ଅଛନ୍ତି। ବୁଣାବୁଣି ସମୟ ଗଡ଼ିଯାଉଛି, କିନ୍ତୁ ଆଶାମୁତାବକ ବର୍ଷା ହେଉ ନାହିଁ। ଆକାଶରେ ମେଘ ଆସୁଥିଲେ ବି ବର୍ଷା ନହୋଇ ମେଘ ସଫା ହୋଇଯାଉଥିବାରୁ ଫସଲକୁ ନେଇ ଚିନ୍ତା ବଢ଼ିବାରେ ଲାଗିଛି। ଏହି ସମୟରେ ଜିଲ୍ଲାର ବିଦପନକଲ୍ଲୁ ମଣ୍ଡଳ ଅନ୍ତର୍ଗତ କୋଟ୍ଟାଲପଲ୍ଲୀ ଗାଁର ଗ୍ରାମବାସୀମାନେ ଏକାଠି ହୋଇ ଏକ କୁକୁରକୁ ସଜାଇଥିଲେ।

ଗାଁରେ ହେଲା କୁକୁରର ପୂଜାର୍ଚ୍ଚନା:

ଗ୍ରାମବାସୀମାନେ କୁକୁର ଦେହରେ ହଳଦୀ ଓ କେଶର ଲଗାଇଲେ, ଫୁଲମାଳ ପିନ୍ଧାଇଲେ ଏବଂ ଶ୍ରଦ୍ଧାର ସହ ପୂଜାର୍ଚ୍ଚନା କଲେ। ଗାଁ ଲୋକେ ମିଶି ବିଭିନ୍ନ ପ୍ରକାରର ଖାଦ୍ୟ ପ୍ରସ୍ତୁତ କରିଥିଲେ। କୁକୁର ପାଇଁ ବିଶେଷ ଭାବେ ଖାଦ୍ୟ ତିଆରି କରାଯାଇ ତାକୁ ଖାଇବାକୁ ଦିଆଯାଇଥିଲା। ପରେ ଗ୍ରାମବାସୀମାନେ ସେହି ଖାଦ୍ୟକୁ ପ୍ରସାଦ ଭାବେ ଗ୍ରହଣ କରି ଏକାଠି ଖାଇଥିଲେ। ପରମ୍ପରା ଅନୁସାରେ, କୁକୁରକୁ ଖାଇବାକୁ ଦେବା ପରେ ତାକୁ ପାଣି ନପିଆଇ ଗାଁରେ ଛାଡ଼ି ଦିଆଯାଇଥିଲା।

ପୂର୍ବପୁରୁଷଙ୍କ ସମୟରୁ ଚାଲିଆସୁଛି ପରମ୍ପରା:

ଗ୍ରାମବାସୀଙ୍କ ବିଶ୍ୱାସ ଯେ, କୁକୁରକୁ ଖାଇବାକୁ ଦେବା ପରେ ବିନା ପାଣିରେ ଗାଁରେ ଛାଡ଼ିଦେଲେ ବର୍ଷାର ଦେବତା ତା' ଉପରେ ଦୟା କରିବେ ଏବଂ ବର୍ଷା କରାଇବେ। ଲୋକଙ୍କ କହିବା କଥା ହେଉଛି, ସେମାନେ ନିଜ ଶୈଳୀରେ ଭଗବାନଙ୍କୁ ପ୍ରାର୍ଥନା କରୁଛନ୍ତି, କାରଣ ଏହି ସମୟରେ ବର୍ଷାର ଅତ୍ୟନ୍ତ ଆବଶ୍ୟକତା ରହିଛି। ଗ୍ରାମବାସୀଙ୍କ ଦ୍ୱାରା ବର୍ଷା ପାଇଁ କୁକୁର ପୂଜା କରିବାର ଏହି ପରମ୍ପରା ସେମାନଙ୍କ ପୂର୍ବପୁରୁଷଙ୍କ ସମୟରୁ ଚାଲିଆସୁଛି।

ଯଦିଓ ଏପରି ରୀତିନୀତି ଦ୍ୱାରା ବର୍ଷା ହୁଏ ବୋଲି କୌଣସି ବୈଜ୍ଞାନିକ ପ୍ରମାଣ ନାହିଁ, ତଥାପି ଏହି ପରମ୍ପରା ଗ୍ରାମବାସୀଙ୍କ ବିଶ୍ୱାସ ଓ ସାମୂହିକ ଭାବନାର ପ୍ରତୀକ ଅଟେ। ବର୍ଷା ପାଇଁ ଗ୍ରାମବାସୀମାନେ ଏପରି ଅନେକ ପରମ୍ପରା ପାଳନ କରନ୍ତି, ଯାହା ପୁରୁଷ ପୁରୁଷ ଧରି ଚାଲିଆସୁଛି।