ନୂଆଦିଲ୍ଲୀ: ତୃଣମୂଳ କଂଗ୍ରେସର ବିଦ୍ରୋହୀ ସାଂସଦମାନଙ୍କୁ ନେଇ ସଂସଦୀୟ ରାଜନୀତି ଏବେ ବେଶ୍ ଗରମ ହେବାରେ ଲାଗିଛି। ଏହି ବିଦ୍ରୋହୀ ସାଂସଦମାନେ ଏନସିପିଆଇରେ ସାମିଲ ହେବା ପାଇଁ ଯେଉଁ ପ୍ରସ୍ତାବ ଦେଇଛନ୍ତି, ସେ ସମ୍ପର୍କରେ ଲୋକସଭା ବାଚସ୍ପତି ଓମ୍ ବିର୍ଲା କୌଣସି ତରବରିଆ ନିଷ୍ପତ୍ତି ନେବେ ନାହିଁ ବୋଲି ଜଣାପଡ଼ିଛି। ମିଳିଥିବା ସୂଚନା ଅନୁଯାୟୀ, ଏହି ସମ୍ବେଦନଶୀଳ ପ୍ରସଙ୍ଗରେ ବାଚସ୍ପତି ଆଇନ ବିଶେଷଜ୍ଞଙ୍କ ମତାମତ ଲୋଡ଼ିପାରନ୍ତି। ସଂସଦର ଆଗାମୀ ମୌସୁମୀ ଅଧିବେଶନ ପୂର୍ବରୁ ହିଁ ଏହା ଉପରେ ଚୂଡ଼ାନ୍ତ ନିଷ୍ପତ୍ତି ପ୍ରକାଶ ପାଇବ। ସାଧାରଣତଃ ଜୁଲାଇ ମାସର ତୃତୀୟ ସପ୍ତାହରେ ମୌସୁମୀ ଅଧିବେଶନ ଆରମ୍ଭ ହେଉଥିବାରୁ, ଏହା ପୂର୍ବରୁ ସମସ୍ତ ପ୍ରକ୍ରିୟା ଶେଷ କରିବାକୁ ଲକ୍ଷ୍ୟ ରଖାଯାଇଛି।

ବିଦ୍ରୋହୀ ସାଂସଦମାନେ ନିଜକୁ ଏକ ଅଲଗା ଗୋଷ୍ଠୀ ଭାବେ ମାନ୍ୟତା ଦେବାକୁ ଦାବି କରିଛନ୍ତି। ତେବେ ସମ୍ବିଧାନର କେତେକ ପ୍ରାବଧାନକୁ ନେଇ ପୂର୍ବରୁ ହିଁ ଏହି ବିଲୟ  ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ଏଭଳି ପରିସ୍ଥିତିରେ କୌଣସି ବିବାଦରୁ ବର୍ତ୍ତିବା ପାଇଁ ବାଚସ୍ପତି ଓମ୍ ବିର୍ଲା କେନ୍ଦ୍ର ଆଇନ ମନ୍ତ୍ରାଳୟଠାରୁ ଲିଖିତ ପରାମର୍ଶ ମାଗିପାରନ୍ତି। ମନ୍ତ୍ରାଳୟ ଦେଶର କୌଣସି ବରିଷ୍ଠ ଆଇନ ଅଧିକାରୀଙ୍କ ସହ ଆଲୋଚନା କରିବା ପରେ ନିଜର ମତ ରଖିବ। ଲିଖିତ ଆଇନଗତ ମତାମତ ନେବାର ଉଦ୍ଦେଶ୍ୟ ହେଉଛି, ଯଦି ଭବିଷ୍ୟତରେ ବାଚସ୍ପତିଙ୍କ ନିଷ୍ପତ୍ତିକୁ କୋର୍ଟରେ ଚ୍ୟାଲେଞ୍ଜ କରାଯାଏ, ତେବେ ତାହା ଯେପରି ନ୍ୟାୟିକ ସମୀକ୍ଷା କସଟିରେ ସଫଳ ସାବ୍ୟସ୍ତ ହୋଇପାରିବ।

କ’ଣ କହୁଛନ୍ତି ସମ୍ବିଧାନ ବିଶେଷଜ୍ଞ ?

ଏହି ସମଗ୍ର ବିବାଦ ଭିତରେ ଲୋକସଭାର ପୂର୍ବତନ ମହାସଚିବ ତଥା ସାମ୍ବିଧାନିକ ମାମଲାର ବିଶେଷଜ୍ଞ ପିଡିଟି ଆଚାରୀ ଏକ ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି। ସମ୍ବିଧାନର ଦଶମ ଅନୁସୂଚୀର ପାରା-୪ ର ସୂତ୍ର ଦେଇ ସେ ସ୍ପଷ୍ଟ କରିଛନ୍ତି ଯେ, କେବଳ ଗୋଟିଏ ରାଜନୈତିକ ଦଳ ହିଁ ଅନ୍ୟ ଏକ ରାଜନୈତିକ ଦଳ ସହ ମିଶ୍ରଣ କରିପାରିବ। କୌଣସି ସାଂସଦ କିମ୍ବା ବିଧାୟକ ବ୍ୟକ୍ତିଗତ ବା ଗୋଷ୍ଠୀଗତ ଭାବେ ନିଜ ସ୍ତରରେ ଏଭଳି ବିଲୟ କରିପାରିବେ ନାହିଁ।ଯଦି ମୂଳ ଦଳର ନେତୃତ୍ୱ ଅନ୍ୟ ଦଳ ସହ ମିଶ୍ରଣ ପାଇଁ ନିଷ୍ପତ୍ତି ନିଅନ୍ତି, ତେବେ ସାଂସଦ ଓ ବିଧାୟକମାନେ ସେହି ନିଷ୍ପତ୍ତି ସହ ସହମତ ହେବା ଆବଶ୍ୟକ। ନିଜ ଆଡ଼ୁ ସେମାନଙ୍କର ଏଭଳି କୌଣସି ସାମ୍ବିଧାନିକ ଅଧିକାର ନାହିଁ।