କୋଲକାତା: ପଶ୍ଚିମବଙ୍ଗ ରାଜନୀତି  ସରଗରମ ହେବାରେ ଲାଗିଛି । ଗୋଟିଏ ପଟେ ଟିଏମସିର ୨୦ ଜଣ ବିଦ୍ରୋହୀ ସାଂସଦ ଦଳ ଛାଡ଼ି ଏନଡିଏକୁ ସମର୍ଥନ ଦେବାକୁ ନେଇ ଚର୍ଚ୍ଚା ଚାଲିଥିବା ବେଳେ, ଅନ୍ୟପଟେ ବେଙ୍ଗଲ ବିଜେପିର ଟାଣୁଆ ନେତା ତଥା ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀ ପୁଣି ଥରେ ଆକ୍ସନ ମୋଡ୍‌କୁ ଆସିଛନ୍ତି । କୋଲକାତାସ୍ଥିତ ନେତାଜୀ ସୁଭାଷ ଚନ୍ଦ୍ର ବୋଷ ଆନ୍ତର୍ଜାତୀୟ ବିମାନବନ୍ଦରର ସୁରକ୍ଷା ଏବଂ ବିମାନ ଚଳାଚଳର ସୁଗମତା ପାଇଁ ସେ ଏକ ବଡ଼ ଦାବି ଉପସ୍ଥାପନ କରିଛନ୍ତି । ଏୟାରପୋର୍ଟ ରନୱେ ନିକଟରେ ଥିବା ଏକ ମସଜିଦ୍‌କୁ ଅନ୍ୟତ୍ର ସ୍ଥାନାନ୍ତର କରିବା ପାଇଁ ସେ କେନ୍ଦ୍ର ସରକାରଙ୍କ ଦ୍ୱାରସ୍ଥ ହୋଇଛନ୍ତି ।

କେନ୍ଦ୍ର ମନ୍ତ୍ରୀଙ୍କୁ ଚିଠି ଲେଖିଲେ ଶୁଭେନ୍ଦୁ

ମିଳିଥିବା ସୂଚନା ଅନୁସାରେ, ଶୁଭେନ୍ଦୁ ଅଧିକାରୀ କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀଙ୍କୁ ଏକ ଗୁରୁତ୍ୱପୂର୍ଣ୍ଣ ଚିଠି ଲେଖିଛନ୍ତି । ଏହି ଚିଠିରେ ସେ ଦର୍ଶାଇଛନ୍ତି ଯେ, କୋଲକାତା ବିମାନବନ୍ଦରର ରନୱେ ନମ୍ବର 19L ର ଅତି ନିକଟରେ, ମାତ୍ର କିଛି ମିଟର ଦୂରତାରେ ଏକ ମସଜିଦ୍ ରହିଛି । ଏହି କାରଣରୁ ବିମାନଗୁଡ଼ିକର ଅବତରଣ  ଏବଂ ଉଡ଼ାଣ ସମୟରେ ଅନେକ ବୈଷୟିକ ସମସ୍ୟା ସୃଷ୍ଟି ହେଉଛି । ଏହା ସୁରକ୍ଷା ଦୃଷ୍ଟିକୋଣରୁ ମଧ୍ୟ ଅତ୍ୟନ୍ତ ସ୍ପର୍ଶକାତର ଏବଂ ବିପଜ୍ଜନକ ବୋଲି ସେ କହିଛନ୍ତି ।

ବିମାନବନ୍ଦରର ଆଧୁନିକୀକରଣରେ ବାଧା

ଶୁଭେନ୍ଦୁଙ୍କ କହିବା ଅନୁସାରେ, ଏହି ଧାର୍ମିକ ସ୍ଥଳଟି ରନୱେର ଅତି ପାଖରେ ଥିବାରୁ ଏୟାରପୋର୍ଟର ସମ୍ପ୍ରସାରଣ ଏବଂ ସିଗନାଲ୍ ବ୍ୟବସ୍ଥାର ଉନ୍ନତିକରଣରେ ବଡ଼ ବାଧା ସୃଷ୍ଟି ହେଉଛି । ବିମାନ ଚଳାଚଳ ନିୟମାବଳୀ ଅନୁଯାୟୀ, ରନୱେ ଚାରିପାଖରେ କୌଣସି ପ୍ରକାରର ବଡ଼ ନିର୍ମାଣ ବା ପ୍ରତିବନ୍ଧକ ରହିବା ଉଚିତ୍ ନୁହେଁ । ତେଣୁ ସେ କେନ୍ଦ୍ର ମନ୍ତ୍ରଣାଳୟ ଏବଂ ଏୟାରପୋର୍ଟ ଅଥରିଟି ଅଫ୍ ଇଣ୍ଡିଆକୁ ଏହି ମସଜିଦ୍‌କୁ ସେଠାରୁ ହଟାଇ ଅନ୍ୟ କୌଣସି ଉପଯୁକ୍ତ ସ୍ଥାନରେ ସ୍ଥାନାନ୍ତର କରିବାକୁ ଅନୁରୋଧ କରିଛନ୍ତି ।

ରାଜନୈତିକ ମହଲରେ ଚର୍ଚ୍ଚା ଜୋର

ପଶ୍ଚିମବଙ୍ଗରେ ମମତା ବାନାର୍ଜୀଙ୍କ ସରକାର ଥାଉ ଥାଉ ଶୁଭେନ୍ଦୁ ଅଧିକାରୀଙ୍କ ଏଭଳି ଦାବି ଏବେ ରାଜ୍ୟ ରାଜନୀତିକୁ ଆହୁରି ଗରମ କରିଦେଇଛି । ବିଜେପି ଏହାକୁ କେବଳ ସୁରକ୍ଷା ଓ ନିୟମର ବିଷୟ ବୋଲି କହୁଥିବା ବେଳେ, ଶାସକ ତୃଣମୂଳ କଂଗ୍ରେସ ଏହାକୁ ନେଇ କିଭଳି ପ୍ରତିକ୍ରିୟା ରଖୁଛି ତାହା ଉପରେ ସମସ୍ତଙ୍କ ନଜର ରହିଛି । ସୁରକ୍ଷା ଦୃଷ୍ଟିରୁ କେନ୍ଦ୍ର ସରକାର ଏହି ମସଜିଦ ସ୍ଥାନାନ୍ତର ପ୍ରକ୍ରିୟାକୁ କେବେ ଏବଂ କେମିତି କାର୍ଯ୍ୟକାରୀ କରୁଛନ୍ତି, ତାହା ଦେଖିବାକୁ ବାକି ରହିଲା ।