ବେଙ୍ଗାଲୁରୁ: କର୍ଣ୍ଣାଟକରେ ଖାଦ୍ୟ ସୁରକ୍ଷାକୁ ନେଇ ଏକ ଚାଞ୍ଚଲ୍ୟକର ଖବର ସାମ୍ନାକୁ ଆସିଛି। ରାଜ୍ୟର ବିଭିନ୍ନ ପ୍ରାନ୍ତରେ ଥିବା ପ୍ରସିଦ୍ଧ ହୋଟେଲ ଏବଂ ରେସ୍ତୋରାଁରେ ଖାଦ୍ୟର ମାନ ଯାଞ୍ଚ ପାଇଁ ଖାଦ୍ୟ ସୁରକ୍ଷା ବିଭାଗ ପକ୍ଷରୁ ଚଢ଼ାଉ ଜାରି ରହିଛି। ଏହି କ୍ରମରେ ମାଙ୍ଗାଲୁରୁରେ ଥିବା ଏକ ପ୍ରସିଦ୍ଧ KFC ଆଉଟଲେଟ୍‌ରୁ ସଢ଼ା ମାଂସ ଜବତ ହେବା ପରେ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।

ମିଳିଥିବା ସୂଚନା ଅନୁଯାୟୀ, ମାଙ୍ଗାଲୁରୁ ସିଟି ସେଣ୍ଟର ମଲ୍‌ରେ ଥିବା KFC ଆଉଟଲେଟ୍‌ରେ ପରସା ଯାଉଥିବା ଚିକେନ୍‌ର ଗୁଣବତ୍ତା ନେଇ ଜଣେ ଗ୍ରାହକ ଅଭିଯୋଗ କରିଥିଲେ। ଗ୍ରାହକ ଜଣଙ୍କ ଅଭିଯୋଗ କରିଥିଲେ ଯେ ଚିକେନ୍‌ରୁ ଦୁର୍ଗନ୍ଧ ବାହାରୁଛି। ଏହି ଅଭିଯୋଗକୁ ଗୁରୁତର ସହ ନେଇ ଖାଦ୍ୟ ସୁରକ୍ଷା ବିଭାଗର ଅଧିକାରୀମାନେ ଅଚାନକ ସେଠାରେ ଚଢ଼ାଉ କରିଥିଲେ। ଯାଞ୍ଚ ସମୟରେ ଷ୍ଟୋର୍ ରୁମ୍ ଏବଂ କୋଲ୍ଡ ଷ୍ଟୋରେଜ୍‌ରୁ ନିମ୍ନମାନର ଓ ସଢ଼ା ମାଂସ ମିଳିଥିଲା। ଅଧିକାରୀମାନେ ଏହାକୁ ଜବତ କରି ପରୀକ୍ଷା ପାଇଁ ପଠାଇଛନ୍ତି।

କେବଳ KFC ନୁହେଁ, ଅନେକ ହୋଟେଲ ରାଡାରରେ

ଖାଦ୍ୟ ସୁରକ୍ଷା ବିଭାଗର ଏହି ଅଭିଯାନ କେବଳ ମାଙ୍ଗାଲୁରୁରେ ସୀମିତ ନାହିଁ। ମହୀଶୂରରେ ମଧ୍ୟ ଅନେକ ହୋଟେଲରୁ ଏକ୍ସପାୟାର୍ ହୋଇଯାଇଥିବା ମାଂସ ଜବତ କରାଯାଇଛି। ସୂଚନା ମୁତାବକ, ରିଓ ମେରିଡିୟନ ହୋଟେଲରୁ ପ୍ରାୟ ୯ କେଜି ଏକ୍ସପାୟାର୍ ଚିକେନ୍ ଜବତ ହୋଇଛି।

ସେହିପରି ବେଙ୍ଗାଲୁରୁର ବିଭିନ୍ନ ବଡ଼ ହୋଟେଲ ମଧ୍ୟ ବିଭାଗର ରାଡାରରେ ରହିଛି। ୟୁବି ସିଟି ଏବଂ ବ୍ରିଗେଡ୍ ରୋଡ୍ ଅଞ୍ଚଳର ଛଅଟି ହାଇ-ପ୍ରୋଫାଇଲ୍ ରେସ୍ତୋରାଁରେ ଯାଞ୍ଚ ବେଳେ ଆଶ୍ଚର୍ଯ୍ୟଜନକ ତଥ୍ୟ ସାମ୍ନାକୁ ଆସିଛି। ସେଠାରୁ ୧୦ ଦିନ ପୂର୍ବରୁ ଏକ୍ସପାୟାର୍ ହୋଇଯାଇଥିବା କ୍ଷୀର ଓ ଦହି ଜବତ କରାଯାଇଛି।

ଏହାଛଡ଼ା ୫୦ କେଜି ବତକ ମାଂସ, ମାଛ, ହରି ମଟର ଓ ମଶରୁମ୍ ସମେତ ମୋଟ ୧୩୨ କେଜି ଖାଦ୍ୟ ସାମଗ୍ରୀକୁ ନଷ୍ଟ କରିଦିଆଯାଇଛି। ଅପରିଷ୍କାର ପରିବେଶରେ ରୋଷେଇ ଚାଲିଥିବା ଅଭିଯୋଗରେ ଏକ ପ୍ରସିଦ୍ଧ ରୁଫ୍‌ଟପ୍ ଲାଉଞ୍ଜକୁ ମଧ୍ୟ ବନ୍ଦ କରି ଦିଆଯାଇଛି।