ନୂଆଦିଲ୍ଲୀ:  ବ୍ରିକ ସମ୍ମିଳନୀ ୨୦୨୫ରେ ଭାରତ ପାଇଁ ଏକ ବଡ କୂଟନୈତିକ ବିଜୟ ଦେଖିବାକୁ ମିଳିଛି । ମିଳିତ ଘୋଷଣା ପତ୍ରରେ ବ୍ରିକ୍ସ ଜମ୍ମୁ-କାଶ୍ମୀରର ପହଲଗାମରେ ଏପ୍ରିଲ ୨୨ରେ ହୋଇଥିବା ଆତଙ୍କୀ ହମଲାର କଡା ଶବ୍ଦରେ ନିନ୍ଦା କରିଛନ୍ତି । ଏହି ହମଲାରେ ୨୬ ଜଣ ପର୍ଯ୍ୟଟକଙ୍କ ପ୍ରାଣହାନୀ ଘଟିଥିଲା । ପ୍ରଧାନମନ୍ତ୍ରୀ ଏହି ମଞ୍ଚରୁ ଆତଙ୍କବାଦକୁ ସମର୍ଥନ କରୁଥିବା ବେନେଇ ପାକିସ୍ତାନ ଉପରେ ବର୍ଷିବା ସହ ବୈଶ୍ୱିକ ନେତାଙ୍କୁ ଆତଙ୍କବାଦ ବିରୋଧରେ ଏକଜୁଟ ହେବାକୁ ଅପିଲ କରିଛନ୍ତି ।

ବ୍ରିକ୍ସର ଘୋଷଣାପତ୍ରରେ କୁହାଯାଇଛି ଯେ, ଆତଙ୍କବାଦକୁ କୌଣସି ବି ରୂପେ ସ୍ୱୀକାର କରାଯାଇ ପାରିବ ନାହିଁ । ଏହାର ଉଦ୍ଦେଶ୍ୟ ଯାହା ଥାଉ ନା କାହିଁକି, ଏହାକୁ କୌଣସି ଧର୍ମ, ବର୍ଣ୍ଣ,  ରାଷ୍ଟ୍ରୀୟତା ଓ ସଭ୍ୟତା ସହ ଯୋଡିବା ଉଚିତ୍  ନୁହେଁ । ସମସ୍ତ ଆତଙ୍କୀ ସଂଗଠନ ଓ ଏହାର ସମର୍ଥକଙ୍କୁ ଦଣ୍ଡ ମିଳିବା ଉଚିତ୍ । 

ବ୍ରିକ୍ସ ପହଲଗାମ ଆକ୍ରମଣକୁ 'ଅତ୍ୟନ୍ତ ନିନ୍ଦନୀୟ' ଏବଂ 'ଅପରାଧୀ' ବୋଲି କହିଛି। ଏହା ପ୍ରଥମ ଥର ଭାରତରେ ହୋଇଥିବା ଆତଙ୍କବାଦୀ ଆକ୍ରମଣକୁ ବ୍ରିକ୍ସ  ଭଳି ମଞ୍ଚରେ ଏତେ ସ୍ପଷ୍ଟ ଭାବରେ ନିନ୍ଦା କରାଯାଇଛି। ଘୋଷଣାପତ୍ରରେ ସମସ୍ତ ଦେଶକୁ କୌଣସି ଦ୍ୱନ୍ଦ୍ୱ ମାନଦଣ୍ଡ ବିନା ଆତଙ୍କବାଦ ବିରୁଦ୍ଧରେ ଦୃଢ଼ ପଦକ୍ଷେପ ନେବାକୁ ଆହ୍ୱାନ କରାଯାଇଥିଲା।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜ କହିଛନ୍ତି ଯେ ଭାରତ ଆତଙ୍କବାଦର ଶିକାର ହୋଇଥିବା ବେଳେ ପାକିସ୍ତାନ ଆତଙ୍କବାଦର ସମର୍ଥକ। ଆତଙ୍କବାଦର ପୀଡିତ ଏବଂ ଏହାକୁ ସମର୍ଥନ କରୁଥିବା ଲୋକଙ୍କୁ ସମାନ ମାପରେ ତଉଲା ଯାଇ ପାରିବ ନାହିଁ। ପ୍ରଧାନମନ୍ତ୍ରୀ ନୀରବ ରହିଥିବା ଲୋକଙ୍କୁ ମଧ୍ୟ ସମାଲୋଚନା କରିଥିଲେ ଏବଂ କହିଥିଲେ ଯେ ରାଜନୈତିକ ଲାଭ ପାଇଁ ଆତଙ୍କବାଦ ଉପରେ ନୀରବତା ଗ୍ରହଣୀୟ ନୁହେଁ।

'ଏହି ଦୁଃଖର ମୁହୂର୍ତ୍ତରେ, ମୁଁ ଆମ ସହିତ ଠିଆ ହୋଇଥିବା ଏବଂ ସମର୍ଥନ ଏବଂ ସମବେଦନା ପ୍ରକାଶ କରିଥିବା ବନ୍ଧୁ ରାଷ୍ଟ୍ରଗୁଡ଼ିକୁ ହୃଦୟରୁ କୃତଜ୍ଞତା ଜଣାଉଛି। ଆତଙ୍କବାଦକୁ ନିନ୍ଦା କରିବା ଆମର 'ନୀତି' ହେବା ଉଚିତ, କେବଳ ଏକ 'ସୁବିଧା' ନୁହେଁ। ଯଦି ଆମେ ପ୍ରଥମେ ଦେଖିବା ଯେ ଆକ୍ରମଣ କେଉଁ ଦେଶରେ ଏବଂ କାହା ବିରୁଦ୍ଧରେ ହୋଇଛି, ତେବେ ଏହା ମାନବତା ପ୍ରତି ବିଶ୍ୱାସଘାତକତା ହେବ।' ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ।