ଭାରତୀୟ ରେଳବାଇ ୧୭ ଜୁଲାଇରେ ଏକ ନୂଆ ସଫଳତା ହାସଲ କରିବାକୁ ଯାଉଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ହରିୟାଣାରେ ଦେଶର ପ୍ରଥମ ହାଇଡ୍ରୋଜେନ୍ ଚାଳିତ ଟ୍ରେନ୍କୁ ସବୁଜ ପତାକା ଦେଖାଇ ଶୁଭାରମ୍ଭ କରିବେ। ଏହି ଟ୍ରେନ୍ ଜିନ୍ଦ ଏବଂ ସୋନିପତ ମଧ୍ୟରେ ୮୯ କିଲୋମିଟର ଦୀର୍ଘ ରୁଟ୍ରେ ଚଳାଚଳ କରିବ। ହାଇଡ୍ରୋଜେନ୍ ଫ୍ୟୁଏଲ୍ ସେଲ୍ ଟେକ୍ନୋଲୋଜି ଉପରେ ଆଧାରିତ ଏହି ଟ୍ରେନ୍ ଭାରତୀୟ ରେଳବାଇ ପାଇଁ ଗ୍ରୀନ୍ ଟ୍ରାନ୍ସପୋର୍ଟ ଦିଗରେ ଏକ ବଡ଼ ପଦକ୍ଷେପ ବୋଲି ବିବେଚନା କରାଯାଉଛି। ଏହାର ଉଦ୍ଘାଟନ ୧୭ ଜୁଲାଇରେ ହେବ, କିନ୍ତୁ ସାଧାରଣ ଯାତ୍ରୀଙ୍କ ପାଇଁ ଏହାର ନିୟମିତ ସେବା କେବେଠାରୁ ଆରମ୍ଭ ହେବ, ସେ ନେଇ ନିଷ୍ପତ୍ତି ଉତ୍ତର ରେଳବାଇକୁ ନେବାକୁ ପଡ଼ିବ।

ଦୁଇ ଘଣ୍ଟାରେ ପୂରା କରିବ ୮୯ କିଲୋମିଟରର ସଫର

ରେଳ ବୋର୍ଡ ପକ୍ଷରୁ ଜାରି କରାଯାଇଥିବା ଅପରେସନ୍ ସିଡ୍ୟୁଲ୍ ଅନୁଯାୟୀ, ନିୟମିତ ଚଳାଚଳ ସମୟରେ ହାଇଡ୍ରୋଜେନ୍ ଟ୍ରେନ୍ ନମ୍ବର ୭୪୦୧୦ ସକାଳ ୭:୪୦ ମିନିଟ୍ରେ ଜିନ୍ଦରୁ ଛାଡ଼ିବ ଏବଂ ପ୍ରାୟ ଦୁଇ ଘଣ୍ଟା ପରେ ସକାଳ ୯:୪୦ ମିନିଟ୍ରେ ସୋନିପତରେ ପହଞ୍ଚିବ। ସେହିପରି ଫେରିବା ବେଳେ ଟ୍ରେନ୍ ନମ୍ବର ୭४୦୦୯ ସକାଳ ୧୦:४୦ ମିନିଟ୍ରେ ସୋନିପତରୁ ବାହାରି ଅପରାହ୍ନ ୧:୦୦ ଟାରେ ଜିନ୍ଦରେ ପହଞ୍ଚିବ।

ଉଦ୍ଘାଟନ ପରେ ଯଥାଶୀଘ୍ର ନିୟମିତ ଯାତ୍ରୀ ସେବା ଆରମ୍ଭ କରିବା ପାଇଁ ତାରିଖ ସ୍ଥିର କରି ସୂଚନା ଦେବାକୁ ରେଳ ବୋର୍ଡ ଉତ୍ତର ରେଳବାଇକୁ ନିର୍ଦ୍ଦେଶ ଦେଇଛି।

ଏହି ୧୨ଟି ଷ୍ଟେସନରେ ରହିବ ଟ୍ରେନ୍ର ରହଣି

ଜିନ୍ଦରୁ ସୋନିପତ ମଧ୍ୟରେ ଏହି ଟ୍ରେନ୍ ସମୁଦାୟ ୧୨ଟି ଷ୍ଟେସନରେ ଅଟକିବ। ଏଥିମଧ୍ୟରେ ଜିନ୍ଦ ସିଟି, ପାଣ୍ଡୁ ପିଣ୍ଡାରା, ଲଳିତ ଖେଡ଼ା, ଭମ୍ଭେଭା, ଇଶାପୁର ଖେଡ଼ି, ବୁଟାନା, ଖଣ୍ଡରାଇ, ଗୋହାନା, ରାଭଡ଼ା, ଲାଠ, ମୋହାନା ହରିୟାଣା ଏବଂ ବରବାସନୀ ଷ୍ଟେସନ ସାମିଲ ରହିଛି। ଫେରିବା ସମୟରେ ମଧ୍ୟ ଟ୍ରେନ୍ ଏହି ସବୁ ଷ୍ଟେସନରେ ଅଟକିବ। ଏହି ରୁଟ୍ରେ ଯାତ୍ରା କରୁଥିବା ହଜାର ହଜାର ଯାତ୍ରୀ ଏହି ଦ୍ରୁତ, ଆଧୁନିକ ଏବଂ ପରିବେଶ ଅନୁକୂଳ ରେଳ ସେବାର ଲାଭ ପାଇପାରିବେ ବୋଲି ଆଶା କରାଯାଉଛି।

ପ୍ରତିଦିନ ଦୁଇଟି ରାଉଣ୍ଡ ଟ୍ରିପ୍ କରିବ ଟ୍ରେନ୍

ରେଳ ବୋର୍ଡ ଦ୍ୱାରା ପୂର୍ବରୁ ଜାରି କରାଯାଇଥିବା ଦସ୍ତାବିଜ୍ ଅନୁଯାୟୀ, ଏହି ୧୦ଟି କୋଚ୍ ବିଶିଷ୍ଟ ହାଇଡ୍ରୋଜେନ୍ ଡିଇଏମ୍ୟୁ (DEMU) ଟ୍ରେନ୍ ପ୍ରତିଦିନ ପ୍ରାୟ ୩୫୬ କିଲୋମିଟର ଯାତ୍ରା କରିବ। ଏହା ଜିନ୍ଦ ଏବଂ ସୋନିପତ ମଧ୍ୟରେ ଦୁଇଟି ଲେଖାଏଁ ରାଉଣ୍ଡ ଟ୍ରିପ୍ (ଯିବା ଆସିବା) କରିବ। ଟ୍ରେନ୍ରେ ୬୮୨ ଜଣ ଯାତ୍ରୀ ବସିବା ପାଇଁ ବ୍ୟବସ୍ଥା ଥିବାବେଳେ ସମୁଦାୟ ପ୍ରାୟ ୨,୬୦୦ ଯାତ୍ରୀ ଏଥିରେ ସଫର କରିବାର କ୍ଷମତା ରହିଛି।

ଟ୍ରାଏଲ୍ ସମୟରେ ୧୨୦ କିମି ବେଗ, କିନ୍ତୁ ଚାଲିବ ୭୫ କିମି ପ୍ରତି ଘଣ୍ଟା ବେଗରେ

ହାଇଡ୍ରୋଜେନ୍ ଟ୍ରେନ୍ ଟ୍ରାଏଲ୍ (ପରୀକ୍ଷଣ) ସମୟରେ ସର୍ବାଧିକ ୧୨୦ କିଲୋମିଟର ପ୍ରତି ଘଣ୍ଟା ବେଗ ହାସଲ କରିଥିଲା। ତେବେ ଯାତ୍ରୀମାନଙ୍କ ସୁରକ୍ଷା ଏବଂ ସୂଚାରୁ ପରିଚାଳନାକୁ ଦୃଷ୍ଟିରେ ରଖି ଏହାର ସର୍ବାଧିକ ଚଳାଚଳ ବେଗ ୭୫ କିଲୋମିଟର ପ୍ରତି ଘଣ୍ଟା ଧାର୍ଯ୍ୟ କରାଯାଇଛି।

ମେ ୨୦२୬ ରେ ରେଳ ବୋର୍ଡରୁ ମଞ୍ଜୁରୀ ମିଳିବା ପରେ ପ୍ରସ୍ତୁତ ହୋଇଥିବା ଏହି ଟ୍ରେନ୍ରେ ଡିଜେଲ ଇଞ୍ଜିନ ବଦଳରେ ହାଇଡ୍ରୋଜେନ୍ ଫ୍ୟୁଏଲ୍ ସେଲ୍ ବ୍ୟବହାର କରାଯାଇଛି। ଏହି ପ୍ରଯୁକ୍ତିବିଦ୍ୟା ବିଦ୍ୟୁତ୍ ଶକ୍ତି ଉତ୍ପନ୍ନ କରି ଟ୍ରେନ୍ ଚଳାଇଥାଏ ଏବଂ ଏହାଦ୍ୱାରା ପ୍ରଦୂଷଣ ମଧ୍ୟ ବହୁତ କମ୍ ହୋଇଥାଏ।

ପ୍ରାରମ୍ଭିକ ତିନି ମାସ ସ୍ୱତନ୍ତ୍ର ନଜରରେ ଚାଲିବ ଟ୍ରେନ୍

ରେଳ ମନ୍ତ୍ରାଳୟ ସୁରକ୍ଷାକୁ ସର୍ବୋଚ୍ଚ ପ୍ରାଥମିକତା ଦେଇ ନିର୍ଦ୍ଦେଶ ଦେଇଛି ଯେ, ଟ୍ରେନ୍ ଚଳାଚଳର ପ୍ରାରମ୍ଭିକ ତିନି ମାସ ପର୍ଯ୍ୟନ୍ତ ହାଇଡ୍ରୋଜେନ୍ ପ୍ରଯୁକ୍ତିବିଦ୍ୟାରେ ପ୍ରଶିକ୍ଷିତ ଇଞ୍ଜିନିୟର ଏବଂ ବୈଷୟିକ ବିଶେଷଜ୍ଞମାନେ ଟ୍ରେନ୍ରେ ଉପସ୍ଥିତ ରହିବେ। ଯଦି ଯାତ୍ରା ସମୟରେ କୌଣସି ବୈଷୟିକ ସମସ୍ୟା ଦେଖାଦିଏ, ତେବେ ତାର ତୁରନ୍ତ ସମାଧାନ କରାଯିବ। ଭାରତୀୟ ରେଳବାଇର ବିଶ୍ୱାସ ଯେ ଏହି ପ୍ରକଳ୍ପ ଭବିଷ୍ୟତରେ ସ୍ୱଚ୍ଛ ଏବଂ ସ୍ଥାୟୀ ରେଳ ପରିବହନ ଦିଗରେ ଏକ ନୂଆ ମାର୍ଗ ପ୍ରଶସ୍ତ କରିବ।