ନୂଆଦିଲ୍ଲୀ: ଭାରତ ଏବଂ ପାକିସ୍ତାନ ମଧ୍ୟରେ ଦୀର୍ଘ ଦିନ ଧରି ଲାଗି ରହିଥିବା ତିକ୍ତତାକୁ ଦୂର କରି ସମ୍ପର୍କକୁ ପୁଣି ଥରେ ସ୍ୱାଭାବିକ କରିବା ପାଇଁ ଏକ ବଡ଼ ପଦକ୍ଷେପ ନିଆଯାଇଛି। ଦୁଇ ଦେଶର ପ୍ରାୟ ୧୦୦ରୁ ଅଧିକ ପ୍ରତିଷ୍ଠିତ ଓ ବିଶିଷ୍ଟ ବ୍ୟକ୍ତି ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ସରିଫଙ୍କୁ ଏକ ମିଳିତ ଖୋଲା ଚିଠି ଲେଖିଛନ୍ତି।

ଏହି ଚିଠିରେ ଦୁଇ ପଡ଼ୋଶୀ ଦେଶ ମଧ୍ୟରେ ଉତ୍ତେଜନା ହ୍ରାସ କରିବା ସହ ଏୟାରସ୍ପେସ୍‌ ଏବଂ ଭିସା ସେବାକୁ ତୁରନ୍ତ ଲାଗୁ କରିବାକୁ ଜୋରଦାର ଦାବି କରାଯାଇଛି। ଫାରୁକ ଅବଦୁଲ୍ଲା ଏବଂ ମନୋଜ ଝାଙ୍କ ଭଳି ପ୍ରମୁଖ ନେତାଙ୍କ ସମେତ ମୋଟ ୧୧୭ ଜଣ ବିଶିଷ୍ଟ ବ୍ୟକ୍ତି ଏହି ପତ୍ରରେ ସ୍ୱାକ୍ଷର କରିଛନ୍ତି।

'ସେଣ୍ଟର ଫର ପିସ ଆଣ୍ଡ ପ୍ରୋଗ୍ରେସ'ର ବଡ଼ ଆହ୍ୱାନ

'ସେଣ୍ଟର ଫର ପିସ ଆଣ୍ଡ ପ୍ରୋଗ୍ରେସ' ପକ୍ଷରୁ ପ୍ରଧାନମନ୍ତ୍ରୀ ମୋଦୀ ଓ ଶେହବାଜ ଶରିଫଙ୍କ ଉଦ୍ଦେଶ୍ୟରେ ଏହି ବିଶେଷ ଚିଠି ଜାରି କରାଯାଇଛି। ଚିଠିରେ ଦର୍ଶାଯାଇଛି ଯେ, ଭାରତ ଓ ପାକିସ୍ତାନ ମଧ୍ୟରେ ପୁଣି ଥରେ ଆନୁଷ୍ଠାନିକ ଆଲୋଚନା ପ୍ରକ୍ରିୟା ଆରମ୍ଭ ହେବା ଦରକାର। ଏହା ସହିତ ପୂର୍ଣ୍ଣ କୂଟନୈତିକ ସମ୍ପର୍କର ପୁନରୁଦ୍ଧାର ଏବଂ ଦୁଇ ଦେଶର ସାଧାରଣ ଜନତାଙ୍କ ମଧ୍ୟରେ ପାରସ୍ପରିକ ଯୋଗାଯୋଗ ବୃଦ୍ଧି ଉପରେ ଗୁରୁତ୍ୱ ଦିଆଯାଇଛି। କେବଳ ସେତିକି ନୁହେଁ, ଧାର୍ମିକ ଏବଂ ସାଂସ୍କୃତିକ କାର୍ଯ୍ୟକ୍ରମ ଜରିଆରେ ଲୋକଙ୍କ ଆଦାନପ୍ରଦାନକୁ ପ୍ରୋତ୍ସାହିତ କରିବାକୁ ମଧ୍ୟ ଏହି ଚିଠିରେ ନିବେଦନ କରାଯାଇଛି।

ଭାରତରୁ ୬୧ ଓ ପାକିସ୍ତାନରୁ ୫୬ ଜଣ ସାମିଲ

ଏହି ଶାନ୍ତି ପ୍ରକ୍ରିୟା ମୁହିମରେ ଦୁଇ ଦେଶର ବିଶିଷ୍ଟ ବ୍ୟକ୍ତିମାନେ ଡିଜିଟାଲ୍ ମାଧ୍ୟମରେ ନିଜର ସହମତି ପ୍ରକାଶ କରିଛନ୍ତି। ଚିଠିରେ ଭାରତ ପକ୍ଷରୁ ୬୧ ଜଣ ବଡ଼ ଚେହେରା ସ୍ୱାକ୍ଷର କରିଛନ୍ତି। ଏଥିରେ ଜମ୍ମୁ-କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଫାରୁକ ଅବଦୁଲ୍ଲା, ମେହବୁବା ମୁଫ୍ତି, ମୀରୱାଇଜ ଉମର ଫାରୁକ, ଆରଜେଡି ସାଂସଦ ମନୋଜ ଝା ଏବଂ ହୁମାୟୁନ କବୀରଙ୍କ ଭଳି ପ୍ରମୁଖ ନେତା ସାମିଲ ଅଛନ୍ତି।

ଅପରପକ୍ଷରେ ପାକିସ୍ତାନର ପ୍ରାୟ ୫୬ ଜଣ ଜଣାଶୁଣା ବ୍ୟକ୍ତି ଏହି ଚିଠିକୁ ସମର୍ଥନ କରିଛନ୍ତି। ସେମାନଙ୍କ ମଧ୍ୟରେ ପାକିସ୍ତାନର ପୂର୍ବତନ ବୈଦେଶିକ ମନ୍ତ୍ରୀ ଖୁର୍ସିଦ ମହମୁଦ କସୁରୀ, ପୂର୍ବତନ କୂଟନୀତିଜ୍ଞ ଅଶରଫ ଜହାଙ୍ଗୀର କାଜୀ, ନ୍ୟାସନାଲ ଆସେମ୍ବଲି ସଦସ୍ୟ ଇସଫନୟାର ଭଣ୍ଡାରା ଏବଂ ପ୍ରସିଦ୍ଧ ପରମାଣୁ ବିଜ୍ଞାନୀ ପରଭେଜ ହୁଦଭୟ ପ୍ରମୁଖ ରହିଛନ୍ତି।