ନୂଆଦିଲ୍ଲୀ: ଆମେରିକା ସହିତ ଯୁଦ୍ଧ ସମୟରେ ଇରାନ ଏବଂ ଭାରତ ମଧ୍ୟରେ ସମ୍ପର୍କ ବୃଦ୍ଧି ପାଉଛି। ଗତ ୨୪ ଘଣ୍ଟା ମଧ୍ୟରେ ଇରାନ ଏବଂ ଭାରତୀୟ କୂଟନୀତିଜ୍ଞମାନେ ତିନିଥର ପରସ୍ପର ସହିତ ଯୋଗାଯୋଗ କରିଛନ୍ତି। ସଦ୍ୟତମ ଘଟଣା ହେଉଛି ଭାରତର ବୈଦେଶିକ ମନ୍ତ୍ରୀ ଏସ. ଜୟଶଙ୍କରଙ୍କ ଇରାନ ଉପ ବୈଦେଶିକ ମନ୍ତ୍ରୀ ଖାତିବଜାଦେହଙ୍କ ସହିତ ସାକ୍ଷାତ। ଜୟଶଙ୍କର ଶୁକ୍ରବାର ରାଇସିନା ଡାଏଲଗ ସମୟରେ ନୂଆଦିଲ୍ଲୀରେ ଖାତିବଜାଦେହଙ୍କ ସହିତ ସାକ୍ଷାତ କରିଛନ୍ତି ।

ଗୁରୁବାର ପୂର୍ବରୁ ଜୟଶଙ୍କର ଇରାନର ବୈଦେଶିକ ମନ୍ତ୍ରୀ ଆବାସ ଆରାଘଚିଙ୍କ ସହ ଫୋନ୍ ଯୋଗେ କଥା ହୋଇଥିଲେ। ଗୁରୁବାର  ମଧ୍ୟ ଭାରତର ବୈଦେଶିକ ସଚିବ ବିକ୍ରମ ମିସ୍ରୀ ନୂଆଦିଲ୍ଲୀସ୍ଥିତ ଇରାନ ଦୂତାବାସ ପରିଦର୍ଶନ କରିଥିଲେ, ଯେଉଁଠାରେ ଇରାନର ଦିବଂଗତ ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନିଙ୍କ ପାଇଁ ଏକ ଶୋକ ସଭା ଅନୁଷ୍ଠିତ ହୋଇଥିଲା। ମିସ୍ରୀ ମଧ୍ୟ ଶୋକ ପଞ୍ଜିକାରରେ ସ୍ୱାକ୍ଷର କରିଥିଲେ।

ଇରାନର ଉପ-ବୈଦେଶିକ ମନ୍ତ୍ରୀ ଖାତିବାଜେଦି ବର୍ତ୍ତମାନ ଦିଲ୍ଲୀରେ ଅଛନ୍ତି। ସାମ୍ବାଦିକଙ୍କ ସହ ଆଲୋଚନା ବେଳେ ଖାତିବାଜେଦି ଇରାନର ସର୍ବୋଚ୍ଚ ନେତାଙ୍କୁ ଚୟନ କରିବା ପାଇଁ ଟ୍ରମ୍ପ ପ୍ରଶାସନକୁ ସମାଲୋଚନା କରିଥିଲେ। ସେ କହିଥିଲେ,ଯେଉଁଠି ଟ୍ରମ୍ପ ନ୍ୟୁୟର୍କର ମେୟରଙ୍କୁ ଚୟନ କରି ପାରୁ ନାହାନ୍ତି ସେ ଇରାନର ସର୍ବୋଚ୍ଚ ନେତାଙ୍କୁ କିପରି ବାଛିପାରିବେ?

ଖାତିବଜାଦେହ ଏହା ମଧ୍ୟ କହିଛନ୍ତି ଯେ, ଆପଣ କ'ଣ ଏହି ଉପନିବେଶବାଦୀ ଆଭିମୁଖ୍ୟ କଳ୍ପନା କରିପାରିବେ? ସେମାନେ ନିଜ ଦେଶରେ ଗଣତନ୍ତ୍ର ଦେଖିବାକୁ ଚାହାଁନ୍ତି। ଆମେରିକା ଇରାନର ଗଣତାନ୍ତ୍ରିକ ଭାବରେ ନିର୍ବାଚିତ ରାଷ୍ଟ୍ରପତିଙ୍କୁ ହଟାଇବାକୁ ଚାହାଁନ୍ତି।

ଖାତିବଜାଦେହ ମଧ୍ୟ ଭାରତ ମହାସାଗରରେ ଇରାନର ନୌସେନା ଜାହାଜ ଡେନା ବୁଡ଼ିବା ଉପରେ ପ୍ରତିକ୍ରିୟା ପ୍ରକାଶ କରିଥିଲେ। ସେ କହିଥିଲେ,ଏହା ଏକ ଅତ୍ୟନ୍ତ ଦୁଃଖଦ ଏବଂ ଦୁର୍ଭାଗ୍ୟଜନକ ଘଟଣା। ଜାହାଜଟି ଖାଲି ଥିଲା ଏବଂ ସେଥିରେ କୌଣସି ଅସ୍ତ୍ରଶସ୍ତ୍ର ନଥିଲା। ଏହା ଅତ୍ୟନ୍ତ ଦୁର୍ଭାଗ୍ୟଜନକ ଯେ ଏହି ଅଭ୍ୟାସରେ ଅଂଶଗ୍ରହଣ କରିବାକୁ ଆସିଥିବା ଅନେକ ଯୁବ ଇରାନୀ ନାବିକ ନିଜର ଜୀବନ ହରାଇଲେ।

ନିରପକ୍ଷେ ରହିଛି ଭାରତ

ଇରାନ ଏବଂ ଆମେରିକା ମଧ୍ୟରେ ଚାଲିଥିବା ଯୁଦ୍ଧରେ ଭାରତ ନିରପେକ୍ଷ ରହିଛି। ଯୁଦ୍ଧ ଆରମ୍ଭ ହେବା ନେଇ ଭାରତ ଚିନ୍ତା ପ୍ରକାଶ କରିଥିଲା। ଯେତେବେଳେ ଇରାନ ୟୁଏଇ ଏବଂ ସାଉଦି ଆରବ ଭଳି ଦେଶ ଉପରେ ଆକ୍ରମଣ କରିଥିଲା, ସେତେବେଳେ ଭାରତୀୟ ପ୍ରଧାନମନ୍ତ୍ରୀ ସେମାନଙ୍କ ରାଷ୍ଟ୍ରମୁଖ୍ୟଙ୍କ ସହ କଥା ହୋଇଥିଲେ। ଏହା ବ୍ୟତୀତ, ଯୁଦ୍ଧ ମଧ୍ୟରେ, ଗୁରୁବାର ଭାରତର ପ୍ରଧାନମନ୍ତ୍ରୀ ମୋଦି ଏକ ଗୁରୁତ୍ୱପୂର୍ଣ୍ଣ ବିବୃତ୍ତି ଦେଇଥିଲେ। ଏକ ସାମ୍ବାଦିକ ସମ୍ମିଳନୀ ସମୟରେ ପ୍ରଧାନମନ୍ତ୍ରୀ ମୋଦି କହିଥିଲେ, ସାମରିକ ସଂଘର୍ଷ କୌଣସି ସମସ୍ୟାର ସମାଧାନ କରିପାରିବ ନାହିଁ।