ନୂଆଦିଲ୍ଲୀ:  ପଞ୍ଜାବର ମୁଖ୍ୟମନ୍ତ୍ରୀ ତଥା ଆମ୍ ଆଦମୀ ପାର୍ଟିର ନେତା ଭଗବନ୍ତ ମାନ ଲଗାତାର ଦ୍ୱିତୀୟ ଦିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିଦେଶ ଗସ୍ତକୁ ନେଇ ଆକ୍ଷେପ କରିଛନ୍ତି । ମାନ ୨୦୧୫ରେ ପ୍ରଧାନମନ୍ତ୍ରୀଙ୍କ ପାକିସ୍ତାନ ଗସ୍ତ ଉଲ୍ଲେଖ କରି ବିବାଦୀୟ ବୟାନ ଦେଇଛନ୍ତି । 

ହାସ୍ୟ କଳାକାରରୁ ନେତା ହୋଇଥିବା ମାନ ଶୁକ୍ରବାର ବିଧାନସଭାରେ ପଞ୍ଜାବୀ ଭାଷାରେ କହିଛନ୍ତି ଯେ, ଏମିତି ଲାଗୁଛି ଯେବେ ପିଏମ ମୋଦୀ ନିଜର ବିମାନରେ ଉଡୁଥିବେ ସେ ତଳକୁ ଦେଖି ପଚାରୁଥିବେ ଯେ, ଏହା କେଉଁ ଦେଶ ? ତାଙ୍କୁ ଯେତେବେଳେ ଏହା ଏହି ଦେଶ ବୋଲି କୁହାଯାଉଥିବା ସେ କହୁଥିବେ ଚାଲ ଏଠି ଓହ୍ଲାଇ ପଡିବା । ଯେଉଁ ଦେଶକୁ ଆମେ ଯାଉଛନ୍ତି ସେଠାରେ ଘଣ୍ଟାଏ ବିଳମ୍ବରେ ପହଞ୍ଚିଲେ ଚଳିବ ।  ଏହିପରି ପ୍ରଧାନମନ୍ତ୍ରୀ ତାଙ୍କ ଇଚ୍ଛା ଅନୁସାରେ ନିଷ୍ପତ୍ତି ନେଉଥିବେ । ଏହି ଅନୁସାରେ ମୋଦୀ ପାକିସ୍ତାନରେ ଓହ୍ଲାଇଥିଲେ ।

ଏହା ପରେ ମାନ ପ୍ରଧାନମନ୍ତ୍ରୀ ମୋଦୀଙ୍କ ୨୦୨୫ରେ ତତ୍କାଳୀନ ପାକିସ୍ତାନୀ ପ୍ରଧାନମନ୍ତ୍ରୀ ନୱାଜ ସରିଫଙ୍କ ସହ ସାକ୍ଷାତ ପାଇଁ ଅଚାନକ ପାକିସ୍ତାନ ଯାତ୍ରାର ଉଲ୍ଲେଖ କରିଛନ୍ତି । ସେ କହିଛନ୍ତି, ପ୍ରଧାନମନ୍ତ୍ରୀ ତ ଚୁଟକିରେ ପାକିସ୍ତାନ ଯିବାକୁ ନିଷ୍ପତ୍ତି ନେଇଥିଲେ । ସେଠାରେ ସେ ବିରିୟାନୀ ଖାଇଥିଲେ ଏବଂ ସ୍ୱଦେଶ ଫେରିଥିଲେ । ଆମେ ପାକିସ୍ତାନ  ଯାଇ ପାରିବୁନି, ମାତ୍ର ସେ  ଓହ୍ଲାଇ ପାରିବେ ।

ସୂଚନାଯୋଗ୍ୟ, ୨୦୧୫ରେ ପ୍ରଧାନମନ୍ତ୍ରୀ ରୁଷ ଯାତ୍ରା ସମୟରେ ଆଫଗାନିସ୍ତାନରେ କିଛି ସମୟ ରହିବା ପରେ ସ୍ୱଦେଶ ଫେରୁଥିଲେ । ଏହି ସମୟରେ ସେ ଅଚାନକ ପାକିସ୍ତାନରେ ଓହ୍ଲାଇବାକୁ ନିଷ୍ପତ୍ତି ନେଇଥିଲେ । ଏହାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମାଲୋଚନା କରିଥିଲେ ବିରୋଧୀ ।