ଗୋରଖପୁର: ଉତ୍ତରପ୍ରଦେଶର ଗୋରଖପୁରରେ ଏକ ଲୋମଟାଙ୍କୁରା ଘଟଣା ଦେଖିବାକୁ ମିଳିଛି। ଘର ପାଖରେ ଛିଡ଼ା ହୋଇ ବିବାହ ଶୋଭାଯାତ୍ରା ଦେଖିଥିବା ବେଳେ ୨ ଜଣ ଯୁବକଙ୍କୁ ଛୁରିରେ ପ୍ରାଣାନ୍ତକ ଆକ୍ରମଣ ହୋଇଛି। ଉଭୟଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାକୁ ନିଆଯାଇଥିଲା। କିନ୍ତୁ ଚିକିତ୍ସାଧୀନ ଅବସ୍ଥାରେ ଜଣକୁ ଡାକ୍ତର ମୃତ ଘୋଷଣା କରିଛନ୍ତି। ଅନ୍ୟ ଜଣକୁ ବିଆରଡି ମେଡିକାଲ କଲେଜ ଓ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି। ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଜାରି ରଖିଛି। 

ପୁଲିସ କହିଛି, ଶନିବାର ରାତି ୧୦ଟାରେ ଏହି ଘଟଣା ଘଟିଛି। ହୁମାୟୁପୁରରୁ ବରଯାତ୍ରୀ ବାହାରିଥିଲା। ଏହି ବରଯାତ୍ରୀ ଆର୍ଯ୍ୟନଗରସ୍ଥିତ ଅଗ୍ରୱାଲ ଭବନରେ ପହଞ୍ଚିବାର ଥିଲା ରାସ୍ତାରେ ତିରାହା ନିବାସୀ ଶୋଭିତ ଓ ଆର୍ଯ୍ୟନଗର କୁର୍ମିୟାନ ଟୋଲାର ରୋହିତ କନୌଜିୟା ପୁରୁଷୋତ୍ତମ ଦାସଙ୍କ କୋଠୀ ନିକଟରେ ଛିଡ଼ା ହୋଇ ବରଯାତ୍ରୀ ଦେଖୁଥିଲେ। ଏହି ସମୟରେ ବରଯାତ୍ରୀ ସମୟରେ ନୃତ୍ୟ କରୁଥିବା ଯୁବକମାନଙ୍କ ସହିତ କୁହାକୁହି ହୋଇଥିଲା, ଯାହାକି ପିଟାପିଟିରେ ବଦଳିଥିଲା। 

ବରଯାତ୍ରୀରେ ସାମିଲ ଥିବା କିଛି ଯୁବକମାନେ ଶୋଭିତ ଓ ରୋହିତଙ୍କୁ ଛୁରିରେ ଆକ୍ରମଣ କରିଥିଲେ। ଉଭୟ ରକ୍ତ ଜୁଡୁବୁଡୁ ହୋଇଥିଲେ। ଉଭୟଙ୍କୁ ଗୁରୁତର ଅବସ୍ଥାରେ ଡାକ୍ତରଖାନା ନିଆଯାଇଥିଲା। ଏହା ପରେ ଉତ୍ତେଜିତ ଲୋକେ ଅତିଥିମାନଙ୍କ ଉପରେ ଯୁବକଙ୍କ ଉପରେ ଆକ୍ରମଣ ନେଇ ଅଭିଯୋଗ ଆଣି ବିବାହ ସ୍ଥଳ ଘେରାଉ କରିଥିଲେ। ଏନେଇ ପୁଲିସକୁ ସୂଚନା ଦିଆଯାଇଥିଲା। 

ଅତିରିକ୍ତ ପୁଲିସ ଅଧୀକ୍ଷକ କୃଷ୍ଣ କୁମାର ବିଶ୍ନୋୟୀ କହିଛନ୍ତି, ପୁଲିସକୁ ଦେଖି ଲୋକେ ବିବାହକୁ ଆସିଥିବା ଅତିଥିମାନେ ଯୁବକଙ୍କ ଉପରେ ଅକ୍ରମଣ କରିଥିବା ନେଇ ଅଭିଯୋଗ ଆଣିଥିଲେ। ଏହା ପରେ ପୁଲିସ ହସ୍ତକ୍ଷେପ କରିତିଲା। ୨ ଜଣ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ପାଇଁ ପ୍ରତିଶ୍ରୁତି ଦେବା ପରେ ସ୍ଥିତି ସ୍ବାଭାବିକ ହୋଇଥିଲା। ପରେ ବିବାହ ଶାନ୍ତିପୂର୍ଣ୍ଣ ଭାବେ ସଂପନ୍ନ ହୋଇଥିଲା।