ନୂଆଦିଲ୍ଲୀ: ବାଂଲାଦେଶରେ ସଂଖ୍ୟାଲଘୁଙ୍କ ବିରୋଧରେ ହିଂସା ଭାରତ ପାଇଁ ଚିନ୍ତାର ବିଷୟ ବୋଲି ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର ଲୋକସଭାରେ କହିଛନ୍ତି। ଢାକା ସେମାନଙ୍କ ସୁରକ୍ଷା ପାଇଁ ପଦକ୍ଷେପ ନେବ ବୋଲି ନୂଆଦିଲ୍ଲୀ ଆଶା କରୁଛି। ବାଂଲାଦେଶର ନୂତନ ସରକାର ଭାରତ ସହ ପାରସ୍ପରିକ ଲାଭଦାୟକ, ସ୍ଥିର ସମ୍ପର୍କ ସ୍ଥାପନ କରିବେ ବୋଲି ଭାରତ ଆଶା ରଖିଛି ବୋଲି ମନ୍ତ୍ରୀ କହିଛନ୍ତି।

ଜୟଶଙ୍କର ଶୁକ୍ରବାର ପ୍ରଶ୍ନକାଳରେ କହିଛନ୍ତି ଯେ ବାଂଲାଦେଶରେ ସଂଖ୍ୟାଲଘୁଙ୍କ ଉପରେ ଅନେକ ଆକ୍ରମଣ ଘଟଣା ଘଟିଥିବାରୁ ସେମାନଙ୍କ ବିରୋଧରେ ହିଂସା ଚିନ୍ତାର ବିଷୟ ହୋଇଛି। ଆମେ ଆମର ଚିନ୍ତା ପ୍ରତି ସେମାନଙ୍କ ଦୃଷ୍ଟି ଆକର୍ଷଣ କରିଛୁ। ସେଠାରେ ହିନ୍ଦୁମାନଙ୍କ ଉପରେ ଅନେକ ଆକ୍ରମଣ ହୋଇଛି। ନିକଟରେ ବୈଦେଶିକ ସଚିବ ଢାକା ଗସ୍ତ କରିଥିଲେ। ସେମାନଙ୍କ ବୈଠକରେ ମଧ୍ୟ ଏହି ପ୍ରସଙ୍ଗ ଉଠିଥିଲା। ଏବଂ ଆମେ ଆଶା କରୁଛୁ ଯେ ବାଂଲାଦେଶ ନିଜର ସ୍ୱାର୍ଥକୁ ଦୃଷ୍ଟିରେ ରଖି ସଂଖ୍ୟାଲଘୁଙ୍କ ସୁରକ୍ଷା ପାଇଁ ପଦକ୍ଷେପ ନେବ।

ମନ୍ତ୍ରୀ କହିଥିଲେ ଯେ ବାଂଲାଦେଶରେ ବିକାଶ ମୂଳକ ପ୍ରକଳ୍ପର ଭାରତର ସମୃଦ୍ଧ ଇତିହାସ ରହିଛି। ବାସ୍ତବରେ, ଯେତେବେଳେ ଆମେ 'ପଡ଼ୋଶୀ ପ୍ରଥମେ' ନୀତି କଥା କହୁଛୁ, ଆମେ ପାକିସ୍ତାନ ଏବଂ ଚୀନ୍ ବ୍ୟତୀତ ପ୍ରାୟ ସମସ୍ତ ପଡ଼ୋଶୀ ଦେଶରେ ଗୁରୁତ୍ୱପୂର୍ଣ୍ଣ ବିକାଶ ପ୍ରକଳ୍ପ ହାତକୁ ନେଇଛୁ। 

ସେ ଗୃହକୁ କହିଛନ୍ତି ଯେ ଭାରତୀୟ ସୁରକ୍ଷା ବାହିନୀ ଲଦାଖର ଡେପସାଙ୍ଗର ସମସ୍ତ ପାଟ୍ରୋଲିଂ ପଏଣ୍ଟକୁ ଯିବ ଏବଂ ପୂର୍ବ ସୀମାର ସେହି ଚରମ ପ୍ରାନ୍ତକୁ ଯିବ ଯାହା ଐତିହାସିକ ଭାବରେ ଭାରତର ପାଟ୍ରୋଲିଂ ସୀମା ଥିଲା। ଗତଥର ଡେପସାଙ୍ଗ ଓ ଡେମ୍ଚୋକ୍ ପ୍ରସଙ୍ଗରେ ଚୀନ୍ ସହ ସଫଳ ଆଲୋଚନା ହୋଇଥିଲା। ଅତୀତରେ ସୀମାରୁ ହଟିବା ପାଇଁ ଚୀନ୍ ସହ ଆଲୋଚନା ସଫଳତାର ସହ ହୋଇଛି। କିନ୍ତୁ ଏହାପରେ ଏହି ବ୍ୟବସ୍ଥା ଅସ୍ଥାୟୀ ଭାବେ କରାଯାଇଥିଲା। 

ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର କହିଛନ୍ତି ଯେ ଭାରତ ପାକିସ୍ତାନ ସହ ଉତ୍ତମ ଏବଂ ଆତଙ୍କବାଦ ମୁକ୍ତ ସମ୍ପର୍କ ଚାହୁଁଛି। ତେବେ ଯଦି ସେ ନିଜର ଅତୀତର ଆଚରଣରେ ପରିବର୍ତ୍ତନ ନ କରନ୍ତି ତେବେ ଏହାର ପ୍ରଭାବ ଦ୍ୱିପାକ୍ଷିକ ସମ୍ପର୍କ ଉପରେ ପଡ଼ିବ। ୨୦୧୯ରେ ପାକିସ୍ତାନ ନେଇଥିବା କେତେକ ନିଷ୍ପତ୍ତି ଯୋଗୁଁ ବାଣିଜ୍ୟିକ ସମ୍ପର୍କ ବାଧାପ୍ରାପ୍ତ ହୋଇଛି ବୋଲି ସେ କହିଛନ୍ତି।

ଅଧିକ ପଢ଼ନ୍ତୁ: ଅଟକିଲା ଭାରତ-ଅଷ୍ଟ୍ରେଲି୍ରା ମ୍ୟାଚ୍‌