ନୂଆଦିଲ୍ଲୀ: ତିରୁପତି ମନ୍ଦିରର ଲଡୁ ତିଆରିରେ ବ୍ୟବହୃତ ଘିଅରେ ପଶୁ ଚର୍ବିରେ ଅପମିଶ୍ରଣ ମାମଲାରେ ହସ୍ତକ୍ଷେପ ପାଇଁ ସୁପ୍ରିମ୍‌କୋର୍ଟରେ ହୋଇଥିବା ଜନସ୍ୱାର୍ଥ ମାମଲାର ଶୁଣାଣି ସୋମବାର ହେବ। ସର୍ବୋଚ୍ଚ ନ୍ୟାୟାଳୟ ୱେବସାଇଟରେ ପ୍ରକାଶିତ କାରଣ ତାଲିକା ଅନୁଯାୟୀ, ଜଷ୍ଟିସ ବିଆର ଗୱାଇ ଏବଂ ଜଷ୍ଟିସ କେଭି ବିଶ୍ୱନାଥନଙ୍କୁ ନେଇ ଗଠିତ ଖଣ୍ଡପୀଠ ସେପ୍ଟେମ୍ବର ୩୦ରେ ଏହି ମାମଲାର ଶୁଣାଣି କରିବେ।

ଆଇନଜୀବୀ ସତ୍ୟମ ସିଂହଙ୍କ ଦ୍ୱାରା ଦାୟର ପିଟିସନରେ ମନ୍ଦିର ପରିଚାଳନା କରୁଥିବା ତିରୁମାଲା ତିରୁପତି ଦେବସ୍ଥାନମ୍ (ଟିଟିଡି) ଟ୍ରଷ୍ଟର ଅପରାଧିକ ଷଡ଼ଯନ୍ତ୍ର ଏବଂ ଅବ୍ୟବସ୍ଥାର ତଦନ୍ତ ପାଇଁ ସୁପ୍ରିମକୋର୍ଟର ଜଣେ ପୂର୍ବତନ ବିଚାରପତିଙ୍କ ନେତୃତ୍ୱରେ ଏକ କମିଟି ଗଠନ କରିବାକୁ ଦାବି କରାଯାଇଛି। ପିଟିସନରେ କୁହାଯାଇଛି ଯେ ତିରୁମାଲାର ଲଡୁ ପ୍ରସାଦମରେ ପଶୁ ଚର୍ବି, ମାଛ ତେଲ ଏବଂ ଅନ୍ୟାନ୍ୟ ଆମିଷ ପଦାର୍ଥ ବ୍ୟବହାର କରାଯାଉଥିବା ତଦନ୍ତ ସମୟରେ ତଥ୍ୟ ସାମ୍ନାକୁ ଆସିଛି।

ଏହି କାର୍ଯ୍ୟ କେବଳ ହିନ୍ଦୁ ଧାର୍ମିକ ରୀତିନୀତିର ଘୋର ଉଲ୍ଲଂଘନ ନୁହେଁ ବରଂ ସେହି ଅଗଣିତ ଭକ୍ତଙ୍କ ଭାବନାକୁ ମଧ୍ୟ ଗଭୀର ଆଘାତ ଦେଇଛି। ତିରୁମାଲା ତିରୁପତି ବାଲାଜୀ ମନ୍ଦିରର ପ୍ରସାଦରେ ପଶୁ ଚର୍ବିରେ ଅପମିଶ୍ରଣ ସମ୍ବିଧାନର ଧାରା ୨୫ର ଗୁରୁତର ଉଲ୍ଲଂଘନ ବୋଲି ଆବେଦନରେ ଦର୍ଶାଯାଇଛି। ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ଏହି ମାମଲାର ତଦନ୍ତ ପାଇଁ ଏକ ସ୍ୱତନ୍ତ୍ର ତଦନ୍ତକାରୀ ଦଳ (ଏସ୍ଆଇଟି) ଗଠନ କରିସାରିଛନ୍ତି।

ସୁପ୍ରିମକୋର୍ଟର ପ୍ରଧାନ ବିଚାରପତି ଡିୱାଇ ଚନ୍ଦ୍ରଚୂଡ଼ ରବିବାର ତିରୁମାଲାସ୍ଥିତ ଭଗବାନ ଶ୍ରୀ ଭେଙ୍କଟେଶ୍ୱର ସ୍ୱାମୀଙ୍କ ମନ୍ଦିରରେ ପୂଜାର୍ଚ୍ଚନା କରିଛନ୍ତି। ସିଜେଆଇ ତାଙ୍କ ସମ୍ପର୍କୀୟଙ୍କ ସହ ଗର୍ଭଗୃହରେ ପ୍ରାର୍ଥନା କରିଥିଲେ। ଭଗବାନ ଭେଙ୍କଟେଶ୍ୱରଙ୍କ ଦର୍ଶନ କରିବା ପରେ ପ୍ରଧାନ ବିଚାରପତି ଏବଂ ତାଙ୍କ ସମ୍ପର୍କୀୟମାନେ ରଙ୍ଗନାୟକୁଲା ମଣ୍ଡପମରେ ମନ୍ଦିର ପୂଜକଙ୍କ ଠାରୁ ବୈଦିକ ଆଶୀର୍ବାଦ ନେଇଥିଲେ। ତିରୁମାଲା ତିରୁପତି ଦେବସ୍ଥାନମ୍ କାର୍ଯ୍ୟନିର୍ବାହୀ ଅଧିକାରୀ ଜେ ଶ୍ୟାମଲା ରାଓ ପ୍ରଧାନ ବିଚାରପତିଙ୍କୁ ଶ୍ରୀ ଭେଙ୍କଟେଶ୍ୱର ସ୍ୱାମୀ ଏବଂ ତୀର୍ଥ ପ୍ରସାଦମଙ୍କ ଫଟୋ ପ୍ରଦାନ କରିଥିଲେ।

ଅଧିକ ପଢ଼ନ୍ତୁ: କୁମ୍ଭମେଳାରେ ୩୦ କୋଟି ଶ୍ରଦ୍ଧାଳୁଙ୍କ ଆଗମନ ଆଶଙ୍କା