ନୂଆଦିଲ୍ଲୀ: କଂଗ୍ରେସ ନେତା ରାହୁଲ ଗାନ୍ଧୀ ବିଦେଶରୁ ଫେରିବା ପରେ ତୁରନ୍ତ ଦଳ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେଙ୍କ ସହ ଏକ ଗୁରୁତ୍ୱପୂର୍ଣ୍ଣ ବୈଠକ କରିଛନ୍ତି। ଆସନ୍ତା ବର୍ଷ ପ୍ରାରମ୍ଭରେ ବିଧାନସଭା ନିର୍ବାଚନ ପୂର୍ବରୁ ପଞ୍ଜାବ କଂଗ୍ରେସରେ ଚାଲିଥିବା ନେତୃତ୍ୱ ସଙ୍କଟ ଉପରେ ବୈଠକରେ ଗମ୍ଭୀରତାର ସହ ଆଲୋଚନା ହୋଇଥିବା ଜଣାପଡିଛି। 

ସୂତ୍ର ଅନୁସାରେ ରାହୁଲ ଗାନ୍ଧୀ ଏବଂ ଖାର୍ଗେ ପଞ୍ଜାବ ପାର୍ଟି ପ୍ରଭାରୀ ଭୂପେଶ ବାଘେଲଙ୍କୁ ଦିଲ୍ଲୀ ଡକାଇଛନ୍ତି। ସେ ଆଜି ହାଇକମାଣ୍ଡଙ୍କ ସହ ସାକ୍ଷାତ କରିବେ, ଯାହା ପରେ ସଙ୍କଟର ସମାଧାନ ପାଇଁ ଆଗକୁ ବଢିବାର ରାସ୍ତା ଚିହ୍ନଟ କରାଯିବ। ମଲ୍ଲିକାର୍ଜୁନ ଖାଡ୍‌ଗେଙ୍କ ବାସଭବନରେ ଅନୁଷ୍ଠିତ ବୈଠକରେ ଅଖିଳ ଭାରତ କଂଗ୍ରେସ କମିଟି ସଂଗଠନ ମହାସଚିବ କେ.ସି. ଭେନୁଗୋପାଳ ମଧ୍ୟ ଉପସ୍ଥିତ ଥିଲେ। ସୂତ୍ର ଅନୁସାରେ ରାହୁଲ ଗାନ୍ଧୀ ପଞ୍ଜାବ ନେତାଙ୍କ ମତ ଶୁଣିବାକୁ ପ୍ରସ୍ତୁତ ଏବଂ ରାଜ୍ୟ ୟୁନିଟ୍ ମଧ୍ୟରେ ଚାଲିଥିବା 'ବିଦ୍ରୋହ'କୁ ଯଥାଶୀଘ୍ର ଦମନ କରିବାକୁ ଚାହାଁନ୍ତି। ରାଜ୍ୟ ୟୁନିଟ୍ ଭିତରେ ଚାଲିଥିବା ଗୋଷ୍ଠୀବାଦ ଏବଂ ଅନ୍ତର୍ଦ୍ୱନ୍ଦ୍ୱ ମଧ୍ୟରେ କଂଗ୍ରେସ ବିଧାନସଭା ନିର୍ବାଚନ ଲଢ଼ିପାରିବ ନାହିଁ ବୋଲି ଦଳୀୟ ନେତୃତ୍ୱ ଚିନ୍ତିତ।

ପ୍ରକୃତରେ ଅମରିନ୍ଦର ସିଂହ ରାଜା ୱାରିଂଙ୍କୁ ପଞ୍ଜାବ କଂଗ୍ରେସ ସଭାପତି ଭାବରେ ବଜାୟ ରଖିବା ପାଇଁ ହାଇକମାଣ୍ଡଙ୍କ ନିଷ୍ପତ୍ତି ରାଜ୍ୟ ୟୁନିଟ୍ ମଧ୍ୟରେ ଅସନ୍ତୋଷ ସୃଷ୍ଟି କରିଛି। ପୂର୍ବତନ ମୁଖ୍ୟମନ୍ତ୍ରୀ ଚରଣଜିତ ସିଂହ ଚନ୍ନୀ ଏବଂ ପୂର୍ବତନ ଉପମୁଖ୍ୟମନ୍ତ୍ରୀ ସୁଖଜିନ୍ଦର ସିଂହ ରନ୍ଧାୱାଙ୍କ ସମେତ ଅନେକ ବରିଷ୍ଠ ନେତା ଖୋଲାଖୋଲି ଭାବରେ ଏହି ନିଷ୍ପତ୍ତିକୁ ବିରୋଧ କରୁଛନ୍ତି। ପଞ୍ଜାବ ବିଧାନସଭାରେ କଂଗ୍ରେସ ବିଧାୟକ ଦଳ ନେତା ପ୍ରତାପ ସିଂହ ବାଜୱା ଏବଂ ଅନ୍ୟ କିଛି ବରିଷ୍ଠ ନେତା ମଧ୍ୟ ରାଜା ୱାରିଂଙ୍କୁ ରାଜ୍ୟ ସଭାପତି ଭାବରେ ବଜାୟ ରଖିବାର ବିରୋଧ କରୁଛନ୍ତି।

ଅଧିକ ପଢ଼ନ୍ତୁ: 'ଯଦି ଇ୨୦ ଦରକାର ନାହିଁ, ୧୦୦% ପେଟ୍ରୋଲ କିଣନ୍ତୁ, କିନ୍ତୁ ଅଧିକ ଟଙ୍କା ଦେବାକୁ ପଡିବ'