ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର କୃଷି କ୍ଷେତ୍ର ପାଇଁ ଦୁଇଟି ପ୍ରମୁଖ ଯୋଜନା ଆରମ୍ଭ କରିବେ, ଯେଉଁଥିରେ ୩୫,୪୦୦ କୋଟି ଟଙ୍କା ବ୍ୟୟବରାଦ ସହିତ 'ପ୍ରଧାନମନ୍ତ୍ରୀ ଧନ ଧାନ୍ୟ କୃଷି ଯୋଜନା' ସାମିଲ ରହିଛି। ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ଏକ ବିବୃତ୍ତିରେ କହିଛି ଯେ ସେ ଭାରତୀୟ କୃଷି ଗବେଷଣା ପ୍ରତିଷ୍ଠାନରେ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ଅଂଶଗ୍ରହଣ କରିବେ ଏବଂ କୃଷକମାନଙ୍କ ସହିତ ଆଲୋଚନା କରିବେ।

ଏଥିରେ କୁହାଯାଇଛି ଯେ ଏହି କାର୍ଯ୍ୟକ୍ରମ କୃଷକ କଲ୍ୟାଣ, କୃଷି ସ୍ୱାବଲମ୍ବନ ଏବଂ ଗ୍ରାମୀଣ ଭିତ୍ତିଭୂମିକୁ ସୁଦୃଢ଼ କରିବା ପ୍ରତି ତାଙ୍କର ନିରନ୍ତର ପ୍ରତିବଦ୍ଧତାକୁ ପ୍ରତିଫଳିତ କରେ। ପ୍ରଧାନମନ୍ତ୍ରୀ ଧନ ଧନ୍ୟ କୃଷି ଯୋଜନାରେ ୨୪,୦୦୦ କୋଟି ଟଙ୍କା ବ୍ୟୟବରାଦ କରାଯାଇଛି।

ଏହାର ଲକ୍ଷ୍ୟ ହେଉଛି କୃଷି ଉତ୍ପାଦନ ବୃଦ୍ଧି କରିବା, ସ୍ଥାୟୀ କୃଷି ପଦ୍ଧତି ଗ୍ରହଣ କରିବା, ପଞ୍ଚାୟତ ଏବଂ ବ୍ଲକ ସ୍ତରରେ ଅମଳ ପରବର୍ତ୍ତୀ ସଂରକ୍ଷଣକୁ ବିସ୍ତାର କରିବା, ଜଳସେଚନ ସୁବିଧାରେ ଉନ୍ନତି ଆଣିବା ଏବଂ ୧୦୦ଟି ମନୋନୀତ ଜିଲ୍ଲାରେ ଦୀର୍ଘକାଳୀନ ଏବଂ ସ୍ୱଳ୍ପକାଳୀନ ଋଣ ଉପଲବ୍ଧତାକୁ ସହଜ କରିବା।

ବିବୃତ୍ତିରେ କୁହାଯାଇଛି ଯେ ମୋଦୀ ୧୧,୪୪୦ କୋଟି ଟଙ୍କା ବ୍ୟୟରେ ଡାଲି କ୍ଷେତ୍ରରେ 'ଆତ୍ମନିର୍ଭରଶୀଳତା ମିଶନ' ମଧ୍ୟ ଆରମ୍ଭ କରିବେ। ଏହାର ଲକ୍ଷ୍ୟ ଡାଲିର ଉତ୍ପାଦକତା ସ୍ତରକୁ ଉନ୍ନତ କରିବା, ଡାଲି ଚାଷ କ୍ଷେତ୍ରକୁ ବିସ୍ତାର କରିବା, ମୂଲ୍ୟ ଶୃଙ୍ଖଳା- କ୍ରୟ, ସଂରକ୍ଷଣ, ପ୍ରକ୍ରିୟାକରଣ ଏବଂ କ୍ଷତି ହ୍ରାସ ସୁନିଶ୍ଚିତ କରିବା।

ଅଧିକ ପଢ଼ନ୍ତୁ: ‘କବଚ’ ତାଲିମ ଷ୍ଟେସନ ମାଷ୍ଟର ଏବଂ ଟ୍ରେନ ପରିଚାଳକଙ୍କୁ କରିବ ସଶକ୍ତ